ព័ត៌មានផ្សេងៗទៀត
ឯកឧត្តមរដ្ឋលេខាធិការ ចាន់ សុវុឌ្ឍ អញ្ជើញជាគណៈអធិបតី ក្នុងពិធីអបអរសាទរខួបអនុស្សាវរីយ៍លើកទី៦០ នៃការបង្កើតសាកលវិទ្យាល័យភូមិន្ទកសិកម្ម
ចេញផ្សាយ ០៧ ធ្នូ ២០២៤ 773
នៅថ្ងៃទី០៦ ខែធ្នូ ឆ្នាំ២០២៤ ឯកឧត្តម ចាន់ សុវុឌ្ឍ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានអញ្ជើញជាគណៈអធិបតី ក្នុងពិធីអបអរសាទរខួបអនុស្សាវរីយ៍លើកទី៦០ (៧ ខែធ្នូ ១៩៦៤ - ៧ ខែធ្នូ ២០២៤) នៃការបង្កើតសាកលវិទ្យាល័យភូមិន្ទកសិកម្ម។ ពិធីនោះប្រារព្ធធ្វើឡើងនៅសាកលវិទ្យាល័យភូមិន្ទកសិកម្ម ដោយមានការចូលរួមពី ឯកឧត្តម លោកជំទាវ រដ្ឋលេខាធិការ អនុរដ្ឋលេខាធិការ ថ្នាក់ដឹកនាំក្រសួង និងថ្នាក់ដឹកនាំគ្រប់អង្គភាព នៃក្រសួងកសិកម្ម រុក្ខាប្រមាញ់ និងនេសាទ សាកលវិទ្យាធិការ ប្រធានក្រុមប្រឹក្សាភិបាល មន្ត្រីសាស្ត្រាចារ្យ លោកគ្រូអ្នកគ្រូ បុគ្គលិក និងប្អូនៗនិស្សិត។
នៅក្នុងអង្គពិធីនោះ ឯកឧត្តម ចាន់ សុវុឌ្ឍ បានថ្លែងអបអរសាទរយ៉ាងក្លៀវក្លា នៃខួបអនុស្សាវរីយ៍លើកទី៦០ នៃការបង្កើតសាកលវិទ្យាល័យ និងសូមកោតសរសើរ ចំពោះសាស្ត្រាចារ្យ លោកគ្រូ អ្នកគ្រូ បុគ្គលិក និងនិស្សិតនៃសាកលវិទ្យាល័យភូមិន្ទកសិកម្មទាំងអស់ ដែលបានខិតខំប្រឹងប្រែង ទ្រាំទ្រការលំបាកគ្រប់បែបយ៉ាង ដែលបន្សល់ទុកពីរបបខ្មែរក្រហម នាពេលកន្លងមក ហើយពុះពារស្តារ កសាង និងអភិវឌ្ឍសាកលវិទ្យាល័យឱ្យបានរីកចម្រើនមកដល់បច្ចុប្បន្ននេះ ។
ឯកឧត្តមរដ្ឋលេខាធិការ បានផ្តល់នូវអនុសាសន៍ណែនាំមួយចំនួន ដើម្បីជាទុនបន្ថែមទៀតសម្រាប់ការគ្រប់គ្រងដឹកនាំសាកលវិទ្យាល័យ ដែលរួមមាន៖
១. ត្រូវពិនិត្យកែលម្អកម្មវិធីសិក្សាអប់រំ ដោយបញ្ចូលបន្ថែមពាក់ព័ន្ធនឹងគោលនយោបាយអភិវឌ្ឍកសិកម្ម ការគ្រប់គ្រងសមត្ថភាពជាអ្នកដឹកនាំ ការវិភាគសេដ្ឋកិច្ចសង្គម និងសហគ្រិនភាពក្នុងវិស័យកសិកម្ម ដើម្បីចូលរួមអនុវត្តគោលនយោបាយរបស់រាជរដ្ឋាភិបាល និងក្រសួងកសិកម្ម រុក្ខាប្រមាញ់ និងនេសាទ។
២. ត្រូវពង្រឹង និងលើកកម្ពស់សមត្ថភាពសាស្ត្រាចារ្យបន្ថែម លើការងារស្រាវជ្រាវបច្ចេកទេសវិទ្យាសាស្ត្រ និង នវានុវត្តន៍ ពិសេសធ្វើការស្រាវជ្រាវដើម្បីបង្កើតបច្ចេកទេសសមស្របថ្មីៗ សម្រាប់អភិវឌ្ឍន៍វិស័យកសិកម្ម។
៣. ត្រូវជំរុញការផ្សាភ្ជាប់រវាងការសិក្សាទ្រឹស្តីក្នុងថ្នាក់ ទៅនឹងការអនុវត្តន៍ជាក់ស្តែងក្នុងផលិតកម្ម និងអាជីវកម្មផ្សេងៗ តាមរយៈទស្សនកិច្ចសិក្សា កម្មសិក្សា ការហាត់ការរយៈពេលវែង ទាំងក្នុងនិងក្រៅប្រទេស។
៤. ត្រូវបង្កើនសមត្ថភាពទំនាក់ទំនង និងផ្សព្វផ្សាយបច្ចេកទេសកសិកម្មគ្រប់ប្រភេទដល់អ្នកពាក់ព័ន្ធ ដូចជាសិស្ស គ្រួសារកសិករ ផលិតករ និងជាពិសេសត្រូវបន្តចូលរួមចំណែកជួយពង្រឹងសមត្ថភាពបំពេញការងារដល់មន្ត្រីកសិកម្មឃុំថ្មី។
៥. លើកទឹកចិត្តដល់សាស្ត្រាចារ្យ លោកគ្រូ អ្នកគ្រូ ចែករំលែកឱ្យបានទូលំទូលាយដល់និស្សិតនូវរាល់គោល នយោបាយអភិវឌ្ឍវិស័យកសិកម្ម ជាពិសេស គោលនយោបាយអាទិភាពទី៥ និងទី៦ (រក្សាតម្លៃកសិផល, មន្ត្រី កសិកម្មឃុំ និងសហគមន៍កសិកម្មទំនើប) និង គោលនយោបាយរបស់ក្រសួងកសិកម្ម រុក្ខាប្រមាញ់ និងនេសាទ គឺ មានហូប មានប្រើ មានបាន និងមានរហូត។
៦. ប្អូនៗនិស្សិតត្រូវខិតខំសិក្សារៀនសូត្រ និងក្រេបជញ្ជក់យកបទពិសោធន៍និងចំណេះដឹង ចំណេះធ្វើផ្សេងៗ សម្រាប់អនាគតរបស់ខ្លួន៕
