ឯកឧត្តមរដ្ឋលេខាធិការ ម៉ាន សុគ្រី អញ្ជើញដឹកនាំក្រុមការងារ​ចុះត្រួត​ពិនិត្យ​ការងារពាក់ព័ន្ធផលិតកម្មសត្វ ផ្តោតសំខាន់លើការគ្រប់គ្រងកសិដ្ឋាន សត្តឃាតដ្ឋាន និងការធ្វើអាជីវកម្មពិឃាតសត្វ នៅខេត្តចំនួន៣

ចេញ​ផ្សាយ​ ១៥ មករា ២០២៥ 2257

ចាប់ពីថ្ងៃទី១២ ដល់ ថ្ងៃទី១៥ ខែមករា ឆ្នាំ២០២៥ ឯកឧត្តម ម៉ាន សុគ្រី រដ្ឋលេខាធិការ​ក្រសួងកសិកម្ម រុក្ខាប្រមាញ់ និងនេសាទ បានដឹកនាំក្រុមការងារ​ចុះតាមដាន ត្រួតពិនិត្យការងារពាក់ព័ន្ធផលិតកម្មសត្វ ដោយផ្តោតសំខាន់​លើការ​គ្រប់គ្រងកសិដ្ឋាន សត្តឃាតដ្ឋាន និងការធ្វើអាជីវកម្មពិឃាតសត្វនៅ​ខេត្តមណ្ឌលគិរី ខេត្តរតនគិរី និងខេត្តស្ទឹងត្រែង។ ក្នុងនោះក៏មានចូលរួម​ពីឯកឧត្តម អេង ជាសាន អនុរដ្ឋលេខាធិការ ថ្នាក់ដឹកនាំអគ្គនាយកដ្ឋាន​សុខភាពសត្វ និងផលិតកម្មសត្វ និងតំណាងនាយកដ្ឋានជំនាញ និងថ្នាក់ដឹកនាំ និងមន្ត្រីជំនាញនៃមន្ទីរកសិកម្ម រុក្ខាប្រមាញ់ និងនេសាទ នៅខេត្តទាំង៣។

នាឱកាសនោះ ឯកឧត្តម ម៉ាន សុគ្រី បានគូសបញ្ជាក់ថា ការគ្រប់គ្រងកសិដ្ឋាន សត្តឃាតដ្ឋាន និងការធ្វើអាជីវកម្មពិឃាតសត្វ ជាកត្តាចម្បងដើម្បីទប់ស្កាត់​ការរីករាល​ដាលជំងឺសត្វ ការពារសុខភាពសត្វ ធានាគុណភាពផលិតផល និងការពារ​​សុខមាលភាពសាធារណៈ។ ការបង្កើតសត្តឃាតដ្ឋាន និងការធ្វើ​អាជីវកម្ម​​ពិឃាតសត្វ ត្រូវមានលិខិតអនុញ្ញាតចេញដោយសមត្ថកិច្ចផលិតកម្ម និងបសុព្យាបាល។

ឯកឧត្តមរដ្ឋលេខាធិការបានបន្ថែមថា ក្នុងការធានាបាននូវនិរន្តភាពនៃការផ្គត់ផ្គង់​ផលិតផលសត្វប្រកបដោយគុណភាព និងសុវត្ថិភាពសម្រាប់ទីផ្សារនោះ ត្រូវមាន​ការ​ចូលរួមសហការពីសមត្ថកិច្ចជំនាញ (ទាំងកសិដ្ឋាន ទាំងសត្តឃាត​ដ្ឋាន និង​ការ​ធ្វើ​អាជីវកម្មពិឃាតសត្វ) មន្ត្រីប្រចាំការតាមសត្វឃាតដ្ឋាន ម្ចាស់សត្តឃាត​ដ្ឋាន និងអ្នកធ្វើអាជីវកម្មពិឃាតសត្វ ទើបទទួលបានលទ្ធផល​ការងារល្អ​ប្រសើ​រ​ទាំងអស់គ្នា និងទទួលបានទំនុកចិត្តពីអ្នកប្រើប្រាស់។

ដោយឡែកចំពោះកសិដ្ឋានចិញ្ចឹមសត្វ របស់ក្រុមហ៊ុន ហ៊ងអាញ់ ស្ថិតនៅឃុំស្រែ​អង្ក្រង ស្រុកកូនមុំ ខេត្តមណ្ឌលគិរី  ឯកឧត្តម បានសម្តែងការស្វាគមន៍ និងគាំទ្រ​សកម្មភាពវិនិយោគបង្កើតកសិដ្ឋានចិញ្ចឹមសត្វគោ សម្រាប់ធ្វើការនាំទៅបរទេស ប៉ុន្តែក្រុមហ៊ុនក៏ត្រូវសហការជាមួយអង្គភាពជំនាញក្រោមឱវាទក្រសួងកសិកម្ម រុក្ខាប្រមាញ់ និងនេសាទ ដើម្បីធានាការគ្រប់គ្រង ការអភិវឌ្ឍនិងការពារ​សុខភាព​សត្វ។

ជាចុងបញ្ចប់ ឯកឧត្តមរដ្ឋលេខាធិការ បានណែនាំដល់ម្ចាស់សត្តឃាតដ្ឋាន ក្នុង​ខេត្តមណ្ឌលគិរី ខេត្តរតនគិរី និងខេត្តស្ទឹងត្រែង ឱ្យធ្វើកិច្ចសន្យាកែលម្អ​នូវចំណុច​ខ្វះខាត ដោយត្រូវជួសជុលតាមលក្ខខណ្ឌ បច្ចេកទេស ស្របតាមបទប្បញ្ញត្តិ​នៃច្បាប់ស្តីពីសុខភាពសត្វ និងផលិតកម្មសត្វ។ លើសពីនេះទៀតមន្ត្រីជំនាញ ត្រូវគ្រប់គ្រង និងតាមដានការអនុវត្តរបស់ម្ចាស់សត្តឃាតដ្ឋានឱ្យអនុវត្តបទបញ្ជាផ្ទៃក្នុងសម្រាប់ប្រតិបត្តិក្នុងសត្តឃាតដ្ឋាន ស្តីពីសុខុមាលភាពសត្វ អនាម័យ និងបរិស្ថាន ដើម្បីធានាបានសាច់ ឬផលិតផលសាច់ ត្រូវតែមានអនាម័យ ហើយត្រូវអនុវត្តតាមបទដ្ឋានបច្ចេកទេសដែលបានកំណត់ក្នុងលិខិតបទដ្ឋានគតិយុត្តដែលនៅជាធរមាន៕