ឯកឧត្តមរដ្ឋលេខាធិការ អ៊ួង កុសល អញ្ជើញដឹកនាំក្រុមការងារចុះពិនិត្យនិងសំណេះសំណាលជាមួយក្រុមហ៊ុន AMRU RICE នៅស្រុកកោះញែក ខេត្តមណ្ឌលគិរី

ចេញ​ផ្សាយ​ ២ ធ្នូ ២០២៥ 1759

នៅថ្ងៃទី២ ខែធ្នូ ឆ្នាំ២០២៥ ឯកឧត្តម អ៊ួង កុសល រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ ដោយមានការចូលរួមពីលោកបណ្ឌិត សុង ឃាង ប្រធានមន្ទីរកសិកម្ម រុក្ខាប្រមាញ់ និងនេសាទខេត្តមណ្ឌលគិរី  លោកប្រធានការិយាល័យសហគមន៍កសិកម្ម និងលោកអនុប្រធានការិយាល័យក្សេត្រសាស្រ្ត និងផលិតភាពកសិកម្ម សហការជាមួយអាជ្ញាធរមូលដ្ឋាន និង មន្ត្រីកសិកម្មឃុំ បានចុះពិនិត្យនិងសំណេះសំណាលជាមួយក្រុមហ៊ុន AMRU RICE មានទីតាំងនៅស្រុកកោះញែក ដែលកំពុងប្រមូលទិញស្រូវសរីរាង្គ និងស្រូវមិនមែនសរីរាង្គ ដែលបានចុះកិច្ចសន្យានាពេលកន្លងមករវាងក្រុមហ៊ុនសាជីវកម្មសហគមន៍កសិកម្មកម្ពុជា (CACC) និងសហគមន៍កសិកម្មចំនួន៦ ស្មើនឹង ៦កិច្ចសន្យា ដែលមានបរិមាណសរុបចំនួន ៤ ៦៧២តោន។
ឯកឧត្តមរដ្ឋលេខាធិការ បានគូសបញ្ជាក់ថា  បច្ចុប្បន្ននេះក្រុមការងារជំនាញប្រមូលទិញបានចំនួន ៩៧១,៥៧តោន ក្នុងនោះ ប្រភេទស្រូវអង្ករស សរីរាង្គចំនួន ៩៦០,៣៧តោន ស្រូវសែនក្រអូប (មិនមែនសរីរាង្គ) ៨,៤៨០តោន និងស្រូវដំណើបខ្មៅសរីរាង្គ ២,៧២០តោន ស្មើនឹង ២០,៧៨% នៃផែនការឆ្នាំ។ ប្រភេទស្រូវអង្ករសសរីរាង្គ តម្លៃ៩៥០៛ ក្នុងមួយគីឡូក្រាម ស្រូវសែនក្រអូប (មិនមែនសរីរាង្គ) តម្លៃ ៨៣០៛ ក្នុងមួយគីឡូក្រាម និងស្រូវដំណើបខ្មៅសរីរាង្គតម្លៃ ២០០០៛ ក្នុងមួយគីឡូក្រាម។
ជាមួយគ្នានេះ ឯកឧត្តមរដ្ឋលេខាធិការ បានណែនាំដល់ក្រុមហ៊ុនប្រមូលទិញស្រូវ សហគមន៍កសិកម្ម មន្រ្តីកសិកម្មឃុំ ជួយសម្របសម្រួល បន្តកិច្ចសហប្រតិបត្តិការយ៉ាងជិតស្និទ្ធដើម្បីធានាលំហូរនៃការប្រមូលទិញ ឱ្យគ្រប់ទៅតាមតាមផែនការកំណត់៕