ឯកឧត្តមអនុរដ្ឋលេខាធិការ ប៉ែន ផល្លីកា អញ្ជើញចុះពិនិត្យការប្រើឧបករណ៍នេសាទ ស្ថិតក្នុងភូមិសាស្រ្តខេត្តចំនួន២

ចេញ​ផ្សាយ​ ១៣ ឧសភា ២០២៦ 2183

នៅថ្ងៃទី១២ ខែឧសភា ឆ្នាំ២០២៦ ឯកឧត្ដម ប៉ែន ផល្លីកា អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ តំណាងដ៏ខ្ពង់ខ្ពស់ឯកឧត្ដមរដ្ឋមន្ត្រី ឌិត ទីណា  បានអញ្ជើញចុះពិនិត្យការប្រើឧបករណ៍នេសាទ ស្ថិតក្នុងភូមិសាស្ត្រមាត់ពាមចុងឃ្នៀស ក្រុងសៀមរាប ខេត្តសៀមរាប ដល់ភូមិព្រែកទាល់ ឃុំកោះជីវាំង ស្រុកឯកភ្នំ ខេត្តបាត់ដំបង។ 
ប្រតិបត្តិការនេះ អមដំណើរដោយលោក ទា គឹមសុទ្ធ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តសៀមរាប លោក ធិននី សុទ្ធី នាយខណ្ឌរដ្ឋបាលជលផលសៀមរាប លោកនាយរងខណ្ឌរដ្ឋបាលជលផល នាយផ្នែករដ្ឋបាលជលផលចុងឃ្នៀស និងក្រឡាញ់ នាយរងផ្នែករដ្ឋបាលជលផលចុងឃ្នៀស នាយសង្កាត់រដ្ឋបាលជលផលភ្នំក្រោម មន្ត្រីខណ្ឌ និងសហគមន៍នេសាទចុងឃ្នៀស ដោយមានការចូលរួមសហការពីកងកម្លាំងយោធភូមិភាគទី៤ ដឹកនាំដោយ លោកឧត្តមសេនីយត្រី អាន ប៊ុនទិ មេបញ្ជាការរងយោធភូមិភាគទី៤។
ក្នុងដំណើរនេះ ឯកឧត្តមអនុរដ្ឋលេខាធិការ និងក្រុមការងារជំនាញបានពិនិត្យប្រជានេសាទដោយឧបករណ៍អួនហ៊ុមដោយដៃចំនួន៦វង់ និងពិនិត្យឧបករណ៍លបរ៉ាវ បានចំនួន ១២របាំង  ហើយឧបករណ៍ទាំងនេះ ប្រើជាលក្ខណៈគ្រួសារត្រឹមត្រូវតាមច្បាប់ស្តីពីជលផល។
មុននឹងបញ្ចប់បេសកកម្ម ឯកឧត្តមក៏បានថ្លែងអរគុណចំពោះបងប្អូនប្រជានេសាទ ចំពោះការគោរពច្បាប់បានល្អ និងឱ្យពួកគាត់ជួយផ្សព្វផ្សាយបន្តដល់អ្នកនេសាទផ្សេងទៀត ដើម្បីជួយទប់ស្កាត់បទល្មើស និងចូលរួមអភិរក្ស អភិវឌ្ឍធនធានជលផលក្នុងបឹងទន្លេសាបឱ្យមានចីរភាព។ 
ជាចុងក្រោយឯកឧត្តមក៏បានថ្លែងអំណរគុណ និងសូមសរសើរដល់ក្រុមការងារចម្រុះ ដែលជានិច្ចកាលតែងតែខិតខំប្រឹងប្រែងទប់ស្កាត់បទល្មើសជលផលបានយ៉ាងសកម្មដូចភ្លៀងរលឹម ជាពិសេសកងកម្លាំងប្រដាប់អាវុធ ដែលតែងតែចុះល្បាតជាប្រចាំផងដែរ៕