វគ្គបណ្តុះបណ្តាលស្ដីពី “សវនកម្មបច្ចេកវិទ្យាព័ត៌មាន”

ចេញ​ផ្សាយ​ ៣០ កញ្ញា ២០២៦ 677

ក្រសួងកសិកម្ម រុក្ខាប្រមាញ់ និងនេសាទ៖ ថ្ងៃអង្គារ ៣រោច ខែភទ្របទ ឆ្នាំមមី ឆស័ក ព.ស.២៥៧០ ត្រូវនឹងថ្ងៃទី២៩ ខែកញ្ញា ឆ្នាំ២០២៦ អគ្គនាយកដ្ឋានសវនកម្មផ្ទៃក្នុង នៃក្រសួងកសិកម្ម រុក្ខាប្រមាញ់ និងនេសាទ បានបើកវគ្គបណ្តុះបណ្តាលស្ដីពី “សវនកម្មបច្ចេកវិទ្យាព័ត៌មាន” ក្រោមអធិបតីភាព ឯកឧត្តម គឹម សុន រដ្ឋលេខាធិការ និងជាប្រធានក្រុមការងារកែទម្រង់ការគ្រប់គ្រងហិរញ្ញវត្ថុសាធារណៈប្រចាំក្រសួងកសិកម្ម រុក្ខាប្រមាញ់ និងនេសាទ និងដោយមានការអញ្ជើញចូលរួមពីមន្រ្តីសវនករនៃអគ្គនាយកដ្ឋានសវនកម្មផ្ទៃក្នុង និងមន្រ្តីសវនដ្ឋានដែលទទួលបន្ទុកការងារប្រព័ន្ធបច្ចេកវិទ្យាព័ត៌មាន តាមបណ្តា​អង្គភាព និងមន្ទីរកសិកម្ម រុក្ខាប្រមាញ់ និងនេសាទរាជធានី ខេត្ត ​ក្រោមឱវាទក្រសួងកសិកម្ម រុក្ខាប្រមាញ់ និងនេសាទ សរុបចំនួន ១៧០ នាក់ ​ ដោយវគ្គបណ្ដុះបណ្ដាលនេះប្រព្រឹត្តទៅចាប់ពីថ្ងៃទី២៩-១៣០ ខែកញ្ញា ឆ្នាំ២០២៦។ វគ្គបណ្តុះបណ្តាលនេះ គឺជាផែនការសកម្មភាពការងារប្រចាំឆ្នាំ ដែលត្រូវអនុវត្តក្រោមកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ របស់ក្រុមការងារកែទម្រង់ការគ្រប់គ្រងហិរញ្ញវត្ថុសាធារណៈ នៃក្រសួងកសិកម្ម រុក្ខាប្រមាញ់ និងនេសាទ។

គោលបំណងវគ្គបណ្ដុះបណ្ដាលគឺដើម្បីចូលរួមចំណែកពង្រឹង និងបង្កើនប្រសិទ្ធភាព ប្រសិទ្ធផល និងស័ក្តិសិទ្ធិភាព នៃការអនុវត្តសវនកម្មបច្ចេកវិទ្យាព័ត៌មាន​ និងពង្រឹងសមត្ថភាពដល់សវនករ និងមន្រ្តីសវនដ្ឋានដែលទទួលបន្ទុកការងារប្រព័ន្ធបច្ចេកវិទ្យាព័ត៌មាន តាមបណ្តា​អង្គភាព និងមន្ទីរកសិកម្ម រុក្ខាប្រមាញ់ និងនេសាទរាជធានី ខេត្ត ​ក្រោមឱវាទក្រសួងកសិកម្ម រុក្ខាប្រមាញ់ និងនេសាទ ដើម្បីរួមចំណែកគាំទ្រនូវយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាលកម្ពុជានីតិកាលទី៧ នៃរដ្ឋសភា ដែលផ្ដល់អាទិភាពលើការពង្រឹងអភិបាលកិច្ចឌីជីថល ឱ្យមានប្រសិទ្ធភាព និងស័ក្តិសិទ្ធិភាព។

មុខងារសវនកម្មបច្ចេកវិទ្យាព័ត៌មាន គឺនាំមកនូវអភិក្រមសវនកម្មមានលក្ខណ:ជាប្រព័ន្ធ និងវិន័យ ដើម្បីវាយតម្លៃ និងជួយថ្នាក់ដឹកនាំ ក្នុងការបង្កើនប្រសិទ្ធភាពនៃការគ្រប់គ្រងហានិភ័យបច្ចេកវិទ្យាព័ត៌មាន ប្រព័ន្ធត្រួតពិនិត្យ និងដំណើរការអភិបាលកិច្ច។ សវនកម្មបច្ចេកវិទ្យាព័ត៌មានរួមបញ្ចូលការត្រួតពិនិត្យឯករាជ និងការធ្វើតេស្តលើការអនុវត្ត និងនីតិវិធីរបស់អង្គភាព ដែលពាក់ព័ន្ធទៅនឹងដំណើរការសម្រាប់អភិវឌ្ឍ និងទទួលយកប្រព័ន្ធ និងបរិក្ខារបច្ចេកវិទ្យាថ្មីៗ ការផ្តល់សុវត្ថិភាពនៃដំណើរការធុរកិច្ចលក្ខណ:អេឡិចត្រូនិច និងស័ក្តិសិទ្ធិភាព ប្រសិទ្ធភាព និងប្រសិទ្ធផលនៃការប្រើប្រាស់បរិក្ខារបច្ចេកវិទ្យា។ គោលការណ៍ណែនាំសវនកម្មបច្ចេកវិទ្យាព័ត៌មាន ត្រូវបានក្រសួងសេដ្ឋកិច្ច និងហិរញ្ញវត្ថុ ដាក់ឱ្យប្រើប្រាស់តាមរយ:ប្រកាសលេខ៥៤៣ សហវ.ប្រក ចុះថ្ងៃទី៣០ ខែមិថុនា ឆ្នាំ២០២០ ស្តីពីការដាក់ឱ្យប្រើប្រាស់គោលការណ៍ណែនាំសវនកម្មបច្ចេកវិទ្យាព័ត៌មាន។

វគ្គបណ្ដុះបណ្ដាលនេះធ្វើបទបង្ហាញដោយលោក អ៊ុំ យុត្ថារ៉ូ មកពីអគ្គនាយកដ្ឋានសវនកម្មផ្ទៃក្នុង នៃក្រសួងសេដ្ឋកិច្ច និងហិរញ្ញវត្ថុ ស្ដីពី “គោលការណ៍ណែនាំសវនកម្មបច្ចេកវិទ្យាព័ត៌មាន” និងបទបង្ហាញដោយលោក គឹម ខេមរាចេដ្ថា មកពីអគ្គនាយកដ្ឋានបច្ចេកវិទ្យាព័ត៌មានគ្រប់គ្រងហិរញ្ញវត្ថុសាធារណៈ នៃក្រសួងសេដ្ឋកិច្ច និងហិរញ្ញវត្ថុ ស្ដីពី “ការប្រើប្រាស់ប្រព័ន្ធ FMIS សម្រាប់ក្រសួងកសិកម្ម រុក្ខាប្រមាញ់ និងនេសាទ”។