ឯកឧត្តមរដ្ឋលេខាធិការ តូច ប៊ុនហួរ ដឹកនាំក្រុមការងារចុះពិនិត្យមើលការបង្កបង្កើនផលស្រូវ និងជួបសំណេះសំណាលជាមួយប្រជាពលរដ្ឋនៅស្រុកចំនួនបី ក្នុងខេត្តតាកែវ

ចេញ​ផ្សាយ​ ១៩ មករា ២០២៥ 262

នៅថ្ងៃទី១៨ ខែមករា ឆ្នាំ២០២៥ ឯកឧត្តម តូច ប៊ុនហួរ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានដឹកនាំក្រុមការងារក្រសួងកសិកម្ម ឯកឧត្តម ឈុំ ឆុនលី និង ឯកឧត្តម សុខ វិសាល អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ លោក ញ៉ិប ស្រ៊ន ប្រធានមន្ទីរកសិកម្ម រុក្ខាប្រមាញ់ និងនេសាទខេត្តតាកែវ និងមន្រ្តីជំនាញ ដោយមានការចូលរួមពីលោកអភិបាលរងស្រុកទាំងពីរ លោកប្រធានការិយាល័យកសិកម្មធនធានធម្មជាតិ និងបរិស្ថានស្រុកទាំងពីរ  ដើម្បីចុះពិនិត្យមើលការបង្កបង្កើនផលស្រូវ និងជួបសំណេះសំណាលជាមួយប្រជាពលរដ្ឋសរុបប្រមាណ១០០នាក់ នៅ៣ទីតាំង គឺនៅក្នុងស្រុកទ្រាំងចំនួន២ទីតាំង និងស្រុកបូរីជលសារចំនួន១ទីតាំង។

នៅរសៀលថ្ងៃដដែល ក្រុមការងារក៏បានចុះពិនិត្យមើលការនាំស្រូវចេញតាមទូក នៅកំពង់ផែ កំពង់អំពិល ឃុំបូរីជលសារ ស្រុកបូរីជលសារ និងការទិញស្រូវរបស់ឈ្មួញ នៅភូមិរមេញជើង ឃុំរមេញ ស្រុកកោះអណ្ដែត និងបានជួបសំណេះសំណាល ជាមួយលោកអភិបាល អភិបាលរង ស្រុកកោះអណ្ដែត លោកប្រធាន អនុប្រធានការិយាល័យកសិកម្ម ធនធានធម្មជាតិ និងបរិស្ថានស្រុក លោកមេឃុំរមេញជើង។

ដំណើរនេះ ធ្វើឡើងក្នុងគោលបំណងចុះពិនិត្យពីស្ថានភាពបង្កបង្កើនផល ការប្រមូលផលស្រូវប្រាំង ស្ថានភាពតម្លៃស្រូវ និងធ្វើការផ្សព្វផ្សាយអំពីបញ្ហាតម្លៃស្រូវធ្លាក់ចុះ ដោយសារមូលហេតុ ការដាំដុះពូជស្រូវប្រភេទ OM និងអ៊ីអែរ មិនមែនជាពូជស្រូវរបស់ខ្មែរ។

ទន្ទឹមនឹងនេះ ឯកឧត្តម បានលើកទឹកចិត្តដល់ប្រជាកសិករ ទី១.គួរងាកមកដាំដុះស្រូវផ្ការំដួលនិងសែនក្រអូប ដែលជាពូជស្រូវខ្មែរ តាមរយៈការបង្កើតជាសហគមន៍កសិកម្មទំនើបវិញ ជាជាងប្រើប្រាស់ ពូជប្រភេទស្រូវ OM របស់វៀតណាម ដើម្បីធានាតម្លៃស្រូវបានយូរអង្វែង ចៀសវាងបញ្ហាធ្លាក់ថ្លៃ ដូចពេលបច្ចុប្បន្ននេះទៀត។ ទី២.គោលការណ៍នៃសហគមន៍កសិកម្មទំនើប ធ្វើឡើងដោយការចូលរួមស្មគ្រ័ចិត្ត ប្រសិនកសិករមិនបានចូលរួមក្នុងសហគមន៍កសិកម្មទំនើបនោះ ក្រសួងកសិកម្មនៅតែជួយគាំទ្រដល់កសិករនៅក្រៅសហគមន៍ តាមរយៈមន្រ្តីកសិកម្មឃុំ ការផ្តល់បច្ចេកទេសផ្សេងៗផងដែរ។ ទី៣.ដើម្បីដោះស្រាយបញ្ហាតម្លៃស្រូវក្នុងអំឡុងពេលចូលឆ្នាំចិន-វៀតណាម ធ្វើឱ្យចំនួនអ្នកទិញថយចុះ សូមឱ្យកសិករពន្យាពេលច្រូតកាត់សិន បើករណីស្រូវទុំដល់ពេលច្រូត ត្រូវច្រូតហើយហាលសម្ងួតទុកសិន រង់ចាំស្រូវមានតម្លៃល្អចាំលក់។

សូមបញ្ជាក់ជូនថា ខេត្តតាកែវ ជាខេត្តផលិតស្រូវប្រាំងច្រើនជាងគេ បន្ទាប់ពីខេត្តព្រៃវែង ហើយប្រើប្រាស់ពូជ OM & IR ១០០% លើផ្ទៃដីស្រែប្រាំងប្រមាណជា១២ម៉ឺនហិកតា៕