ព័ត៌មានផ្សេងៗទៀត
ឯកឧត្តមបណ្ឌិត ហ៊ាន វណ្ណហន ដឹកនាំក្រុមការងារ CaWSIP-MAFF ចូលរួមក្នុងបេសកកម្មគាំទ្រគម្រោងកែលម្អសន្តិសុខទឹកកម្ពុជា លើកទី២ នៅខេត្ដក្រចេះ
ចេញផ្សាយ ៦ ធ្នូ ២០២៥ 2157
នាថ្ងៃទី៥ ខែធ្នូ ឆ្នាំ២០២៥ ឯកឧត្ដមបណ្ឌិត ហ៊ាន វណ្ណហន រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងជានាយកគម្រោងកែលម្អសន្តិសុខទឹកកម្ពុជា (CaWSIP-MAFF) បានដឹកនាំមន្ត្រីអនុវត្តគម្រោងថ្នាក់ជាតិ និងថ្នាក់ខេត្ត ចូលរួមទស្សនកិច្ចក្នុងបេសកកម្មគាំទ្រគម្រោងលើកទី២ របស់ធនាគារពិភពលោក នៅគោលដៅអនុវត្ដគម្រោង ខេត្ដក្រចេះ។ ដំណើរទស្សនកិច្ចនេះ មានការចូលរួមពីក្រុមការងារអនុវត្តគម្រោងនៃក្រសួងកសិកម្ម រុក្ខាប្រមាញ់ និងនេសាទ ក្រសួងធនធានទឹកនិងឧតុនិយម ក្រុមបេសកកម្មរបស់ធនាគារពិភពលោក ព្រមទាំងមន្ត្រីអនុវត្តគម្រោងថា្នក់ខេត្តគោលដៅខេត្តក្រចេះ ដើម្បីសិក្សាស្វែងយល់ពីស្ថានភាពបច្ចុប្បន្ននៃប្រព័ន្ធធារាសាស្ត្រ និងស្ថានភាពការអនុវត្តកសិកម្មវៃឆ្លាតរបស់កសិករនៅតំបន់គោលដៅនៃខេត្តនេះ។
ក្នុងដំណើរបេសកកម្ម ក្រុមការងារទាំងអស់ បានជួបពិភាក្សាជាមួយតំណាងសហគមន៍កសិកម្ម និងសហគមន៍ព្រៃឈើ ដែលស្ថិតក្នុងវិសាលភាពគម្រោង ក្នុងឃុំថ្មី និងឃុំកន្ទួតនៃស្រុកចិត្របុរី ដោយផ្ដោតលើព័ត៌មានចាំបាច់ លើស្ថានភាពទំនប់ ការវាយតម្លៃសក្តានុពលដំណាំ ស្ថានភាពសហគមន៍កសិកម្ម និងសហគមន៍ព្រៃឈើ ដើម្បីជំរុញការអនុវត្តន៍គម្រោង ដូចជា ការផែនការស្ថាអាងស្ដុកទឹក ប្រព័ន្ធទំនប់ ប្រឡាយ ការផ្ដល់ផ្ទះសំណាញ់ ការចិញ្ចឹមឃ្មុំ និងការជំរុញការចងក្រងបង្កើតសហគមន៍កសិកម្មទំនើប។
បើតាមឯកឧត្តមរដ្ឋលេខាធិការ កិច្ចពិភាក្សានេះ បានពិនិត្យលើបញ្ហាសំខាន់ៗពាក់ព័ន្ធ ដែលទាមទាកិច្ចសហការរវាងមន្រ្ដីបច្ចេកទេសអនុវត្តគម្រោងថ្នាក់ជាតិ-ខេត្ដ ជាមួយថ្នាក់មូលដ្ឋាន ឱ្យកាន់តែស្និទស្នាល បង្កើននូវប្រសិទ្ធភាពការងារ ការរៀបចំផែនការផលិតកម្មផ្គត់ផ្គង់ទីផ្សារប្រកបដោយនិរន្តរភាព ដើម្បីឱ្យគម្រោងទទួលបានកិច្ចដំណើរការទៅមុខប្រកបដោយប្រសិទ្ធផលខ្ពស់ ស្របតាមគោលដៅគម្រោងដែលបានកំណត់។
ជាទីបញ្ចប់ ឯកឧត្ដមរដ្ឋលេខាធិការ និងក្រុមការងារទាំងអស់ បានចុះពិនិត្យអាងស្តុកទឹក ទ្វារទឹក និងពិនិត្យស្ថានភាពផលិតកម្មកសិកម្ម ក្នុងនោះក៏បានចុះដល់ទីតាំងផលិតកម្ម ដែលនឹងជំរុញកសិកម្មឆ្លាតវៃ ទីតាំងសាងសង់ផ្ទះសំណាញ់ និងឃ្លាំងប្រមូលផ្ដុំកសិផល ក្នុងតំបន់សាលភាពគម្រោង ស្ថិតក្នុងឃុំថ្មី និងឃុំកន្ទួត ស្រុកចិត្របុរី ខេត្ដក្រចេះ ផងដែរ៕
