ឯកឧត្តមបណ្ឌិត យ៉ង សាំង កុមារ រដ្ឋលេខាធិការ នៃក្រសួងកសិកម្ម អញ្ជើញជាអធិបតីក្នុងពិធីសំណេះសំណាល ជាមួយតំណាងសហគមន៍កសិកម្មចំនួន៣ នៅឃុំគោកធ្លកលើ ស្រុកជីក្រែង ខេត្តសៀមរាប

ចេញ​ផ្សាយ​ ២៨ មីនា ២០២៤ 1438

នៅថ្ងៃទី២៨ ខែមីនា ឆ្នាំ២០២៤ ឯកឧត្តមបណ្ឌិត យ៉ង សាំង កុមារ រដ្ឋលេខាធិការ នៃក្រសួងកសិកម្ម រុក្ខាប្រមាញ់ និងនេសាទ បានអញ្ជើញជាអធិបតី ក្នុងពិធីសំណេះសំណាល ជាមួយតំណាងសហគមន៍កសិកម្មចំនួន៣  នៅភូមិតាភ្ញា ឃុំគោកធ្លកលើ ស្រុកជីក្រែង ខេត្តសៀមរាប។ កិច្ចប្រជុំនេះមានការអញ្ជើញចូលរួមពីសមាជិកសហគមន៍កសិកម្ម អាជ្ញាធរភូមិ-ឃុំ មន្ត្រីកសិកម្មឃុំ-សង្កាត់ និងដៃគូអភិវឌ្ឍន៍ គម្រោង WAT4C។

គោលបំណងនៃការជួបប្រជុំពិភាក្សានេះគឺដើម្បី៖១.សិក្សាអំពីសក្ដានុពល និងបញ្ហាប្រឈមរបស់សហគមន៍ កសិកម្ម ២.ណែនាំតម្រង់ទិសដល់មន្រ្តីកសិកម្មឃុំ ក្នុងការជួយដល់សហគមន៍កសិកម្ម ៣. តម្រង់ទិសគម្រោង (WAT4CAM) ចំពោះការសហការជាមួយមន្រ្តីកសិកម្មក្នុង ការផ្តល់ការគាំទ្រដល់សហគមន៍លើការកសាងខ្សែច្រវាក់ផលិតផលកសិកម្មដំណាំស្រូវ និងប្រព័ន្ធពូជសុទ្ធ។

ក្នុងពិធីសំណេះសំណាលនេះ ឯកឧត្តមបណ្ឌិត បានផ្តល់អនុសាសន៍ជារួមដោយផ្តោតលើកម្មវិធីដាក់ពង្រាយមន្ត្រីកសិកម្ម ឃុំ-សង្កាត់ ការរៀបចំសហគមន៍កសិកម្មទំនើប និងកម្មវិធីហិរញ្ញប្បទាន ដោយសំដៅលើកស្ទួយផលិតកម្ម រកទីផ្សារ និងរក្សាលំនឹងថ្លៃកសិផលសំខាន់ៗ តាមរយៈ ការកសាងប្រព័ន្ធពូជសុទ្ធ ដោយមានគម្រោង WAT4CAM អនុវត្តគាំទ្រយ៉ាងពេញទំហឹងក្នុងផ្តល់បច្ចេកទេសដាំដុះតាមកម្មវិធីស្រែល្អ និងបង្កើនការសហការគ្នាក្នុងការទិញរួម លក់រួម ក្នុងខេត្តសៀមរាប ឱ្យស្របតាមដំណើរការខ្សែច្រវាក់ផលិតផល កសិកម្មដាំណាំស្រូវ ដោយចាប់ផ្ដើមពីក្រុមកសិករផលិតប្រព័ន្ធ ពូជសុទ្ធ ក្រុមហ៊ុនជី និងរោងម៉ាស៊ីនកិនស្រូវតាមកិច្ចសន្យា ឈរលើ គោលការណ៍ បង្កើនការផលិតជំរុញការលក់ ហើយធានាបាននិរន្តរភាព សេដ្ឋកិច្ច និងបរិស្ថានកាន់តែល្អប្រសើរឡើង៕