ឯកឧត្តមរដ្ឋមន្ត្រី ឌិត ទីណា ជួបពិភាក្សាការងារជាមួយ Dr. Francois ROGER, Regional Director of CIRAD for Continental South-East Asia

ចេញ​ផ្សាយ​ ២០ មីនា ២០២៤ 3292

នៅព្រឹកថ្ងៃទី២០ ខែមីនា ឆ្នាំ២០២៤ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានទទួលជួបពិភាក្សាការងារជាមួយ Dr. Francois ROGER, Regional Director of CIRAD for Continental South-East Asia នៅទីស្តីការក្រសួងកសិកម្ម រុក្ខាប្រមាញ់ និងនេសាទ។

ក្នុងជំនួបនេះ ឯកឧត្តមរដ្ឋមន្ត្រី បានសម្តែងនូវការស្វាគមន៍ចំពោះកិច្ចសហប្រតិបត្តិការជាមួយគ្នាក្នុងការចូលរួមអភិវឌ្ឍវិស័យកសិកម្ម និងអភិរក្សបរិស្ថាន។ ជាមួយគ្នានេះដែរ ឯកឧត្តមរដ្ឋមន្ត្រី បានគូសបញ្ជាក់អំពីគោលដៅយុទ្ធសាស្ត្រក្នុងការជំរុញសហគមន៍កសិកម្មទំនើប និងការដាក់ពង្រាយមន្ត្រីកសិកម្មតាមមូលដ្ឋាន ព្រមទាំងការបង្កើតឱ្យមានបណ្ឌិតសភាកសិកម្ម្ម។ គ្រឹះស្ថានរដ្ឋបាលសាធារណៈមួយនេះនឹងដើរតួនាទីយ៉ាងសំខាន់ ក្នុងការផ្ដល់ចំណេះដឹង និងផ្តល់ភាពងាយស្រួលដល់កសិករ។

លើសពីនេះទៀត ឯកឧត្តមរដ្ឋមន្ត្រី បានបញ្ជាក់បន្ថែមអំពីភាពចាំបាច់ដែលត្រូវពិភាក្សា អំពីកិច្ចសហការរួមគ្នា ដោយបង្កើតឱ្យមាន MOU ដើម្បីឱ្យការអនុវត្តការងារ ស្របតាមគោលនយោបាយជាតិ ក្នុងការលើកស្ទួយវិស័យកសិកម្មឱ្យមានភាពរីកចម្រើន ធានាសន្តិសុខស្បៀង និងធ្វើឱ្យមាននិរន្តរភាពសេដ្ឋកិច្ចនិងបរិស្ថាន។

បើតាម ឯកឧត្តមរដ្ឋមន្ត្រី ផលិតផលកសិកម្មកម្ពុជា ផ្តោតសំខាន់លើគុណភាព សុវត្ថិភាព តាមស្តង់ដាគោលនយោបាយ ថ្លៃដើមផលិតទាប មានតម្លៃបន្ថែមខ្ពស់ មានប្រសិទ្ធភាពសេដ្ឋកិច្ចពិតប្រាកដ ដែលផ្តល់ផលចំណេញដល់កសិករ និងភាគីពាក់ព័ន្ធ។

ទន្ទឹមនឹងនេះដែរ ឯកឧត្តមរដ្ឋមន្ត្រី ក៏បានបញ្ជាក់អំពីភាពចាំបាច់នៃការធ្វើទីផ្សារឱ្យបានល្អលើផលិតផលដូចជា អង្ករ ស្វាយចន្ទី កៅស៊ូ និងផលិតផលមានសក្តានុពលដទៃទៀត ដែល CIRAD  អាចពិនិត្យលទ្ធភាពបន្ថែមលើការងារនេះ ដោយត្រូវសិក្សាឱ្យបានគ្រប់ជ្រុងជ្រោយលើប្រសិទ្ធភាពសេដ្ឋកិច្ច៕