ឯកឧត្តមរដ្ឋលេខាធិការ ប្រាក់ ដាវីដ អញ្ជើញជាអធិបតីភាពក្នុងសិក្ខាសាលាបច្ចេកទេសបញ្ចប់គម្រោង CAPFish-Capture (លទ្ធផលទី១) ប្រព័ន្ធត្រួតពិនិត្យសុវត្ថិភាពម្ហូបអាហារក្នុងវិស័យជលផល

ចេញ​ផ្សាយ​ ៦ តុលា ២០២៥ 806

នៅថ្ងៃទី៦ ខែតុលា ឆ្នាំ២០២៥ ឯកឧត្តម ប្រាក់ ដាវីដ រដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ ជាតំណាងដ៏ខ្ពង់ខ្ពស់ឯកឧត្តមរដ្ឋមន្រ្តី ឌិត ទីណា បានអញ្ជើញជាអធិបតីភាព ក្នុងសិក្ខាសាលាបច្ចេកទេសបញ្ចប់គម្រោង CAPFish-Capture (លទ្ធផលទី១) ប្រព័ន្ធត្រួតពិនិត្យសុវត្ថិភាពម្ហូបអាហារក្នុងវិស័យជលផល។
សិក្ខាសាលានេះ  ជាការអនុវត្តល្អ មេរៀនជាបទពិសោធន៍ បញ្ហាប្រឈម និងជំហានបន្ត ដោយមានការចូលរួមពីឯកឧត្តម កែ គី រដ្ឋលេខាធិការក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ថ្នាក់ដឹកនាំ មន្ត្រីរាជការនៃរដ្ឋបាលជលផល ឯកឧត្តម ចាន់ សូផា អគ្គនាយកវិទ្យាស្ថានស្តង់ដារកម្ពុជា នៃក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ តំណាងអង្គការ UNIDO ប្រចាំប្រទេសកម្ពុជា លោកអនុប្រធានផ្នែកសហប្រតិបត្តិការនៃប្រតិភូសហភាពអឺរ៉ុបប្រចាំនៅកម្ពុជា និងភាគីពាក់ព័ន្ធសរុបចំនួន១២០នាក់។  
ឯកឧត្តមរដ្ឋលេខាធិការបានគូសបញ្ជាក់ថា សិក្ខាសាលានេះ រៀបចំឡើងក្នុងគោលបំណង ចុះហត្ថលេខាលើសេចក្តីថ្លែងការណ៍រួមរវាងរដ្ឋបាលជលផល (FIA) នៃប្រទេសកម្ពុជា និងទីភ្នាក់ងារធានាគុណភាពលើ ជលផល និងដែនសមុទ្រ (MFQAA) នៃប្រទេសឥណ្ឌូនេស៊ី ដើម្បីពង្រឹងកិច្ចសហប្រតិបត្តិការទ្វេភាគីលើប្រព័ន្ធធានាគុណភាព និងសុវត្ថិភាពផល ផលិតផលជលផលការចុះហត្ថលេខាលើអនុស្សរណៈនៃការយោគយល់គ្នា (MoU) រវាងរដ្ឋបាលជលផល នៃក្រសួងកសិកម្ម រុក្ខាប្រមាញ់ និងនេសាទ និងវិទ្យាស្ថានស្តង់ដារកម្ពុជា នៃក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ដើម្បីពង្រឹងសមត្ថភាព អាជ្ញាធរមានសមត្ថកិច្ច និងការផ្តួចផ្តើមគំនិតរួមគ្នា ក្នុងការត្រួតពិនិត្យសុវត្ថិភាពម្ហូបអាហារ ក្នុងវិស័យជលផល ក្រោយប្រមូលផល។
ជាមួយគ្នានេះ ក៏មានការប្រគល់ “ពានលើកទឹកចិត្ត” និង “ពានអ្នកដឹកនាំលើការផ្លាស់ប្តូរ” ដល់ដៃគូគម្រោងសំខាន់ៗ និងវិញ្ញាបនបត្រ CQS និង HACCP ដល់សហគ្រាសកែច្នៃក្នុងការទទួលស្គាល់ការរួមចំណែករបស់ពួកគេក្នុងការអនុវត្តគម្រោង ចែករំលែកសមិទ្ធផលសំខាន់ៗ របស់គម្រោង រួមទាំងការអនុវត្តល្អ មេរៀនជាបទពិសោធន៍ បញ្ហាប្រឈមដែលនៅសល់ និងជំហានបន្តជាមួយភាគីពាក់ព័ន្ធ៕