ឯកឧត្តម មាស ពិសិដ្ឋ អនុរដ្ឋលេខាធិការក្រសួងកសិកម្ម បានចូលរួមធ្វើជាប្រធានគណៈអធិបតីនៃសិក្ខាសាលាពិគ្រោះយោបល់របស់ក្រុមការងារបច្ចេកទេសកសិកម្ម និងទឹក ស្តីពី “ ការធ្វើបច្ចុប្បន្នភាពនៃស្ថានភាពដំបូងរបស់ស្ថានីយកសិ-ឧតុនិយម នៅសណ្ឋាគារ Sunway រាជធានីភ្នំពេញ

ចេញ​ផ្សាយ​ ៧ កក្កដា ២០២៤ 2542

នៅព្រឹកថ្ងៃទី៥ ខែកក្កដា ឆ្នាំ ២០២៤ ឯកឧត្តម មាស ពិសិដ្ឋ អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ ក្នុងនាមជានាយកគម្រោង “ ភាពជាដៃគូរវាងរដ្ឋ សហគមន៍ និងវិស័យឯកជន ដើម្បីកសិកម្មមានលក្ខណៈភាតរបរិស្ថាន និងជីវភាពប្រជាជនមានភាពធន់ នៅភាគខាងជើងបឹងទន្លេសាប បានចូលរួមធ្វើជាប្រធានគណៈអធិបតី នៃសិក្ខាសាលាពិគ្រោះយោបល់របស់ក្រុមការងារបច្ចេកទេសកសិកម្ម និងទឹក ស្តីពី “ ការធ្វើបច្ចុប្បន្នភាពនៃស្ថានភាពដំបូងរបស់ស្ថានីយកសិ-ឧតុនិយម នៅសណ្ឋាគារ Sunway រាជធានីភ្នំពេញ។

សិក្ខាសាលានេះមានអ្នកពាក់ព័ន្ធចូលរួមប្រមាណជា៣០នាក់ ដែលជាផ្នែកនៃការអនុវត្តសមាសភាគទី១ របស់គម្រោង ដើម្បីធ្វើឱ្យប្រាកដថា កសិករដែលមានទំហំផលិតកម្មតូច និងតួអង្គនានានៅក្នុងខ្សែច្រវាក់តម្លៃនៃ កសិផលគោលដៅ បានយល់ដឹងកាន់តែច្បាស់អំពីហានិភ័យនានា ដែលបង្កឡើងដោយអាកាសធាតុ ហើយប្រកាន់យក ឬអនុវត្តនូវយុទ្ធសាស្ត្រ ឬវិធីសាស្ត្រសមស្របក្នុងការបង្កើនភាពធន់ជាដើម។

ឯកឧត្តមបញ្ជាក់ថា សិក្ខាសាលាក៏បានផ្តល់ជូនជាព័ត៌មានអំពីបច្ចុប្បន្នភាពនៃស្ថានីយកសិ-ឧតុនិយម ដែលគ្រប់គ្រងដោយក្រសួងធនធានទឹក និងឧតុ និយម នៅក្នុងខេត្តគោលដៅទាំង៤របស់គម្រោង រួមមាន ខេត្តកំពង់ធំ សៀមរាប ឧត្តរមានជ័យ និងខេត្តព្រះវិហារ ហើយក៏ពិគ្រោះអំពីកិច្ចការដែលគួរអនុវត្តបន្ត ដើម្បីរួមចំណែកសម្រេចគោលបំណងរបស់គម្រោងផងដែរ។

ឯកឧត្តមក៏បានជម្រាបអំពីស្ថានភាពបច្ចុប្បន្ននៃវិស័យកសិកម្មជាតិ កម្មវិធីគោលនយោបាយថ្មីរបស់រាជរដ្ឋាភិបាល ភាពងាយរងគ្រោះរបស់វិស័យនេះ ពីបញ្ហានានាដែលបង្កឡើងដោយការប្រែប្រួលអាកាសធាតុ និងបញ្ហាសំខាន់ៗដែលគម្រោងនេះ ត្រូវរួមចំណែកដោះស្រាយ ដែលរួមមានការបង្កើនជីវភាព សុខភាព សុខមាលភាព សន្តិសុខស្បៀង និងទឹករបស់ប្រជាជន និងសហគមន៍ ព្រមទាំងបញ្ហាដែលពាក់ព័ន្ធនឹងសេវាកម្មនៃប្រព័ន្ធអេកូឡូស៊ី ។

បន្ថែមពីនេះ ឯកឧត្តមក៏បានស្នើអ្នកចូលរួមឱ្យយកចិត្តទុកដាក់ធ្វើឱ្យសិក្ខាសាលានេះ ផលិតបានលទ្ធផលច្រើន និងល្អដូចការគ្រោងទុក ជាពិសេស រៀបចំឱ្យមាន ព័ត៌មានឧតុនិយម ឬ ព័ត៌មានស្តីពីធាតុអាកាស និងអាកាសធាតុដែលគួរឲ្យទុកចិត្ត យន្តការផ្តល់ព័ត៌មាន ឬណែនាំកសិករ និងអ្នកពាក់ព័ន្ធអំពីព័ត៌មាន និងការព្យាករណ៍អាកាសធាតុ ដែលមានលក្ខណៈគ្រប់ជ្រុងជ្រោយ សាមញ្ញនិងងាយទទួលយកទៅអនុវត្ត សំដៅបង្កើនផលិតកម្មកសិកម្ម ដោយអាចកាត់បន្ថយបានជាអតិបរមានូវការខូចខាតផល ដែលបង្កឡើងដោយអាកាសធាតុមិនអំណោយផលជាដើម៕