ព័ត៌មានផ្សេងៗទៀត
លោកជំទាវអនុរដ្ឋលេខាធិការ អ៊ឹម រចនា អញ្ជើញដឹកនាំក្រុមការងារ ជួបសំណេះសំណាលជាមួយប្រជាកសិករ និងពិនិត្យមើលស្ថានភាពដំណាំស្រូវដែលរងផលប៉ះពាល់ពីជំនន់ទឹកភ្លៀង និងទន្លេមេគង្គ នៅស្រុកចិត្របុរី ខេត្តក្រចេះ
ចេញផ្សាយ ១១ សីហា ២០២៥ 906
នារសៀលថ្ងៃទី៩ ខែសីហា ឆ្នាំ២០២៥ លោកជំទាវ អ៊ឹម រចនា អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ អញ្ជើញដឹកនាំក្រុមការងារ និងមន្រ្តីកសិកម្មឃុំ ចំនួន១០ឃុំ ជួបសំណេះសំណាលជាមួយប្រជាកសិករ និងពិនិត្យមើលស្ថានភាពដំណាំស្រូវដែលរងផលប៉ះពាល់ពីជំនន់ទឹកភ្លៀង និងទន្លេមេគង្គ ស្ថិតនៅឃុំគោលាប់ ស្រុកចិត្របុរី ខេត្តក្រចេះ។
ដំណើរបេសកកម្មមានការចូលរួមពី លោក ស៊ន វិចិត្រ ប្រធាននាយកដ្ឋានរដ្ឋបាលផែនការ គណនេយ្យ និងសហប្រតិបត្តិការអន្តរជាតិ នៃអគ្គនាយកដ្ឋានកសិកម្ម លោក ម៉ៅ វិចិត្រ អនុប្រធានមន្ទីរកសិកម្ម រុក្ខាប្រមាញ់ និងនេសាទខេត្តក្រចេះ លោក សំ សំអាង ប្រធានការិយាល័យក្សេត្រសាស្ត្រ និងផលិតភាពកសិកម្ម និងលោក ជូ ចាន់សត្យា អនុប្រធានការិយាល័យកសិឧស្សាហកម្ម ព្រមទាំងមន្រ្តីកសិកម្មឃុំ ចំនួន១០ឃុំ នៃស្រុកចិត្របុរី ខេត្តក្រចេះ។
នាឱកាសដែលលោកជំទាវអនុរដ្ឋលេខាធិការ បានជួបសំណេះសំណាលជាមួយប្រជាកសិករម្ចាស់ស្រែផ្ទាល់ ដែលជួបបញ្ហា លោកជំទាវបានពាំនាំនូវការផ្តាំសួរសុខទុក្ខ ពីឯកឧត្តមរដ្ឋមន្រ្តី ឌិត ទីណា ជូនដល់ប្រជាកសិករ។ លោកជំទាវបានស្តាប់ការលើកឡើងបន្ថែមរបស់អាជ្ញាធរ និងប្រជាកសិករដែលថាទឹកជំនន់ឆ្នាំនេះឡើងលឿនខុសរាល់ឆ្នាំ ដែលភាគច្រើនឡើងនៅចុងខែសីហា និងដើមខែកញ្ញា។ បើទោះបីជាដូច្នេះក៏ដោយ កសិករមួយចំនួនអាចប្រមូលផលមុនពេលទឹកជន់លិច ខណៈស្រែមួយចំនួនទៀតកំពុងរងផលប៉ះពាល់ដោយសារទឹកជំនន់ និងឈានទៅខូចខាតទាំងស្រុង។
លោកជំទាវ បានគូសបញ្ជាក់ជូនដល់អ៊ំពូមីងប្រជាកសិករអំពីយន្តការតាមដានស្ថានភាពទឹកជំនន់ តាមរយៈការចុះពិនិត្យ វាយតម្លៃពីការខូចខាត ដើម្បីឈានទៅស្នើសុំពូជស្រូវពីប្រព័ន្ធស្បៀងបម្រុង សម្រាប់ចែកជូនអ៊ំពូមីងប្រជាកសិករដែលមានផ្ទៃដីអាចស្ដារឡើងវិញបាន។
នៅចំពោះមុខលោកជំទាវ និងក្រុមការងារ ប្រជាកសិករដែលរងផលប៉ះពាល់ បានសម្តែងនូវក្តីរីករាយ និងបានថ្លែងអំណរគុណចំពោះការយកចិត្តទុកដាក់ពីក្រសួងកសិកម្ម មន្ទីរកសិកម្មខេត្ត អាជ្ញាធរមូលដ្ឋានគ្រប់លំដាប់ថ្នាក់ រួមជាមួយមន្រ្តីកសិកម្មឃុំតែងចុះមកជួបប្រជាកសិករ ពាំនាំបញ្ហារបស់កសិករទៅថ្នាក់លើបន្តដើម្បីស្វែងរកដំណោះស្រាយ៕
