ការចុះធ្វើសវនកម្មផ្ទៃក្នុងឆ្នាំ២០២០ នៅអគ្គនាយកដ្ឋានកសិកម្ម

ចេញ​ផ្សាយ​ ១៤ តុលា ២០២០ 8732

អគ្គនាយកដ្ឋានកសិកម្ម៖ ចាប់ពីថ្ងៃទី៥-១៧ ខែតុលា ឆ្នាំ២០២០ ប្រតិភូសវនកម្មផ្ទៃក្នុង ដឹកនាំដោយលោកស្រី ងិន សូនាថ ប្រធាននាយកដ្ឋានសវនកម្មផ្ទៃក្នុង បានចុះធ្វើសវនកម្មតាមផែនការសវនកម្មផ្ទៃក្នុងឆ្នាំ២០២០ លើការិយបរិច្ឆេទឆ្នាំ២០១៩ និងបណ្តាឆ្នាំពាក់ព័ន្ធរបស់អគ្គនាយកដ្ឋានកសិកម្ម។

គោលបំណងសវនកម្មគឺវាយតម្លៃ​ និងធ្វើឲ្យប្រសើរឡើងនូវប្រសិទ្ធភាព​នៃដំណើរការ​គ្រប់​គ្រង​​ហានិភ័យ  ដំណើរការត្រួតពិនិត្យ  និងដំណើរការអភិបាលកិច្ច​ ក្នុងវិសាល​ភាព​គ្រប​ដណ្តប់សកម្មភាពគ្រប់គ្រង និងប្រតិបត្តិការទាំងឡាយ។ ​ជាទូទៅការងារសវនកម្មបានផ្តោតទៅលើ​ការបញ្ជាក់​ថាប្រព័ន្ធគ្រប់គ្រងផ្ទៃក្នុងផ្តល់នូវ​ការ​ធានា​សមហេតុផលមួយ​សំដៅ​​​សម្រេច​បាន​​នូវ​​​គោល​បំណង៖ ១. ប្រតិបតិ្តការ : ការសម្រេចបានប្រកបដោយប្រសិទ្ធភាពនៃគោលបំណងធុរកិច្ច ២. ព័ត៌មាន  : ភាពជឿទុកចិត្ត និងភាពពេញលេញ នៃព័ត៌មានផ្នែកហិរញ្ញវត្ថុ ​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​ដែល​ប្រើ​ប្រាស់ដោយថ្នាក់ដឹកនាំ និង ៣. អនុលោមភាព  :  អនុលោមជាមួយច្បាប់  បទប្បញ្ញត្តិ  គោលការណ៍ នីតិវិធីជា​ធរ​មាន។

ការធ្វើសវនកម្មផ្ទៃក្នុងត្រូវធ្វើការត្រួតពិនិត្យលើដំណើរការសំខាន់ៗ ដែលមានហានិភ័យ​ដូចជាប្រព័ន្ធ​​​​ត្រួតពិនិត្យ​​​ផ្ទៃក្នុង ការគ្រប់គ្រង​ហិរញ្ញវត្ថុ កា​រ​​គ្រប់គ្រងទ្រព្យ​សម្បត្តិ្តរដ្ឋ របាយការណ៍​វឌ្ឍនភាព ព្រមទាំង​​ធ្វើការសិក្សាស្រាវជ្រាវលើសកម្មភាព​​ថវិកា ​ ដែលបានអនុវត្ត​ក្នុងគោលបំណង​ធ្វើឱ្យកាន់​តែ​​​ប្រសើរឡើងនូវដំណើរការ​​​​គ្រប់គ្រង​​​ហានិភ័យ ការត្រួតពិនិត្យ​​​ផ្ទៃក្នុង និ​ង​​​​អភិបាលកិច្ច​​ល្អ។ ហានិភ័យគន្លឹះអាចរាប់បញ្ចូលនូវ៖ ១. ហានិភ័យប្រតិបតិ្តការ : ជាហានិភ័យលើការបាត់បង់ ដែលជាលទ្ធផលបរាជ័យនៃ​ដំណើរការ​មនុស្ស និង​ប្រព័ន្ធ ឬហេតុការណ៍ពីខាងក្រៅ ២.        ហានិភ័យហិរញ្ញវត្ថុ :  ជាលទ្ធភាពដែលព័ត៌មានផ្នែកហិរញ្ញវត្ថុត្រូវបានរៀបចំឡើងមិនត្រឹមត្រូវ ធ្វើឲ្យការ​​​​​សម្រេច​ចិត្តរបស់ថ្នាក់ដឹកនាំពុំសមស្រប និង ៣.         ហានិភ័យអនុលោមភាព : ជាលទ្ធភាពដែលសកម្មភាពមិនអនុលោមតាមច្បាប់ ​និង​បទ​ប្បញ្ញ​តិ្ត។

រាល់កំហុសឆ្គង មតិឆ្លើយតប និងអនុសាសន៍ ត្រូវបានឯកភាពជាលាយលក្ខណ៍អក្សរ​ ដើម្បីរៀបចំ​របាយការណ៍​​សវនកម្ម​​​​ជូនលោក​ស្រី​​​ប្រធាននាយកដ្ឋាន​​សវនកម្មផ្ទៃក្នុងពិនិត្យ និងសម្រេច ហើ​យ​ដា​ក់ជូន ឯកឧត្តម​រដ្ឋមន្រ្តី ក្រសួង​​​កសិកម្ម រុក្ខាប្រមាញ់ និងនេសាទ សុំអនុសាសន៍​​​​​បន្ថែម និងចាត់វិធានការកែលម្អ រួចផ្ញើជូនសវនដ្ឋាន ដើម្បី​​អនុវត្ត និងផ្ញើជូនអាជ្ញាធរ​​​សវនកម្មជាតិ ដើម្បីជូនជ្រាប។

នាពេលអនាគត​ នាយកដ្ឋានសវនកម្មផ្ទៃ​ក្នុងនឹងពិនិត្យឡើងវិញលើ​វឌ្ឍនភាពនៃការ​អនុវត្ត​តាម​​អនុសាសន៍​ដែលបាន​ផ្តល់ជូនដែលជាផ្នែកមួយនៃនីតិវិធីតាមដានអនុសាសន៍សវនកម្មគ្រាមុន។