ព័ត៌មានផ្សេងៗទៀត
លោកជំទាវអនុរដ្ឋលេខាធិការ អ៊ឹម រចនា អញ្ជើញពិនិត្យមើលទីតាំង និងជួបពិភាក្សាការងារជាមួយប្រជាសហគមន៍នេសាទអេកូទេសចរណ៍ «បឹងរំអិល» នៅស្រុកចិត្របុរី ខេត្តក្រចេះ
ចេញផ្សាយ ២៩ មករា ២០២៦ 1507
នារសៀលថ្ងៃទី២៨ ខែមករា ឆ្នាំ២០២៦ លោកជំទាវ អ៊ឹម រចនា អនុរដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ បានដឹកនាំក្រុមការងារពិនិត្យមើលទីតាំង និងជួបពិភាក្សាការងារជាមួយប្រជាសហគមន៍នេសាទអេកូទេសចរណ៍ «បឹងរំអិល» ស្ថិតនៅឃុំសំបុក ស្រុកចិត្របុរី ខេត្តក្រចេះ។
ក្រុមការងារជំនាញ មានសមាសភាពចូលរួមពី លោកស្រី កាំង ឃីម អនុប្រធានរដ្ឋបាលជលផល លោក ម៉ៅ វិចិត្រ អនុប្រធានមន្ទីរកសិកម្ម រុក្ខាប្រមាញ់ និងនេសាទខេត្តក្រចេះ មន្រ្ដីជំនាញពាក់ព័ន្ធ អាជ្ញាធរមូលដ្ឋាន ព្រមទាំងសមាជិកប្រជាសហគមន៍ទេសចរនៅតំបន់នោះ។
បន្ទាប់ពីបានពិនិត្យមើលទីតាំងនិងស្ដាប់បទបង្ហាញរបស់ប្រធានសហគមន៍ ព្រមទាំងអាជ្ញាធរមូលដ្ឋាន លោកជំទាវ អ៊ឹម រចនា បានចាត់ទុកទីតាំងសហគមន៍នេសាទអេកូទេសចរណ៍ «បឹងរំអិល» ថាជាតំបន់ទេសចរណ៍ប្រកបដោយសក្ដានុពលមួយកន្លែងទៀត បន្ទាប់ពីរមណីដ្ឋានទេសចរកាំពី។ ចុះបញ្ជីនៅឆ្នាំ២០១១ សហគមន៍នេះមានតំបន់អភិរក្សត្រីមេពូជ មានសត្វស្លាបកម្រ និងមានបរិយាកាសព្រមទាំងទេសភាពល្អ ដែលអាចទាក់ទាញភ្ញៀវទេសចរមកទស្សនាកម្សាន្ត និងស្នាក់នៅ។
តាមរយៈការប្រជុំពិភាក្សាផ្លាស់ប្ដូរយោបល់រួចមក លោកជំទាវអនុរដ្ឋលេខាធិការ បានគូសបញ្ជាក់ថា លោកជំទាវនឹងពិនិត្យលទ្ធភាពពន្លឿនការអភិវឌ្ឍសហគមន៍នេសាទអេកូទេសចរណ៍ «បឹងរំអិល» នេះ ឲ្យបានលឿនតាមដែលអាចធ្វើទៅបាន ដោយសហការជាមួយអគ្គនាយកដ្ឋានជលផល ក្រោមជំនួយបច្ចេកទេសពីអង្គការ FAO និងថវិកាឧបត្ថម្ភពីសារធារណរដ្ឋកូរ៉េខាងត្បូង។ ជំនួយសម្រាប់អភិវឌ្ឍសហគមន៍នេះ មានជាអាថិ៍ ការសាងសង់ស្នាក់ការសហគមន៍ ភោជនីយដ្ឋាន ផ្ទះស្នាក់ បន្ទប់ទឹក និងទូកសម្រាប់ទេសចរជួលចែវកម្សាន្តមើលទេសភាពជាដើម ដែលនឹងជួយលើកស្ទួយជីវភាពប្រជាសហគមន៍នេសាទ អាចរកចំណូលបន្ថែម និងកាត់បន្ថយការនេសាទក្នុងដែនទឹកធម្មជាតិ៕
