ព័ត៌មានផ្សេងៗទៀត
សហគមន៍គឺជាមធ្យោបាយសម្រាប់បង្កើនចំណូល
ចេញផ្សាយ ២២ មករា ២០១៨ 3326
ឯកឧត្តមរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានដាស់តឿនដល់សិករថា មានតែសមាគមន៍ទេ ដែលជាមធ្យោបាយមួយ ដើម្បីបង្កើនចំណូលរបស់កសិករ។ ថ្លែងក្នុងពិធីប្រកាស ទទួលសហគមន៍កសិកម្មចំនួន៣ នៅឃុំស្រុករលាប្អៀរ ខេត្តកំពង់ឆ្នាំង ឯកឧត្តមបណ្ឌិត ច័ន្ទ សារុន រដ្ឋមន្ត្រីក្រសួងកសិកម្ម បានប្រាប់ដល់កសិករជាច្រើនរយនាក់ អំពីសារសំខាន់នៃការច្របាច់ចូលគ្នា ជាសហគមន៍របស់កសិករ ។
គាត់បានពន្យល់ថា សហគមន៍ គឹជាមធ្យោបាយ សម្រាប់បង្កើនចំណូល និងបង្កើនអំណាច ជូនដល់កសិករ ក្រៅពីនេះក៏អាចទទួលបាន និងបង្កើនចំណេះដឹងបច្ចេកទេសមុខជំនួញ កាត់បន្ថយការកេងប្រវ័ញ្ច និងទទួលបាននូការគាំទ្រ ការលើកទឹកចិត្ត ពីមជ្ឈដ្ឋាននានា ។
ឯកឧត្តមរដ្ឋមន្ត្រី ក៏បានអំពាវនាវដល់អាជ្ញាធរមូលដ្ឋាន អង្កការនានាជួយយ៉ាងណា ជំរុញក្នុងការបង្កើតសហគមន៍ ការជួយឧបត្ថម្ភគាំទ្រ ទាំងស្មារតីសម្ភារៈ ដោយធ្វើយ៉ាងណាឱ្យសហគមន៍ មានការអភិវឌ្ឍន៍ឈានឡើង សំដៅកាត់បន្ថយភាពក្រីក្រ និងកំណើនសេដ្ឋកិច្ច។
សហគមន៍ទាំងបី ដែលបានប្រកាសទទួលស្គាល់ កាលពីពេលថ្មីៗនេះ មានសហគមន៍អភិវឌ្ឍន័កសិកម្ម ពេលរុងរឿងក្នុងស្រុកបរិបូរណ៌ សហគមន៍អភិវឌ្ឍន៍កសិកម្មជ្រលងសេកមាស ក្នុងស្រុកកំពង់លែង និងសហគមន៍អភិវឌ្ឍន៍កសិកម្មភ្នំតូច រស្មីសុខសាន្ត ក្នុងស្រុករលាប្អៀរ ។
តាមរយៈរបាយការណ៍ របស់អគ្គនាយកដ្ឋានកសិកម្មបានឪ្យដឹងថា ការរៀបចំសហគមន៍ របស់កសិករបានចាប់ដំណើរការ តាំងពីឆ្នាំ២០០១ ហើយរហូតមកដល់ពេលនេះ មាន២២០សហគមន៍ ត្រូវបង្កើតរួចជាស្រេច ជាមួយនឹងមានសមាជិកចំនួន២២១.០០០នាក់ ស្ថិតនៅ២៣ខេត្ត លើកលែងតែរាជធានីភ្នំពេញ។ សហគមន៍ក៏មានដើមទុនចំនួន៥.០០០លានរៀល ដែលបានមកពីប្រភពផ្សេងៗ ដូចជាប្រាក់សមាជិកភាព ប្រាក់ភាគហ៊ុន និងប្រាក់ឧបត្ថម្ភពីប្រភពនានា។
ឯកឧត្តមរដ្ឋមន្ត្រី បានរំលឹកដល់សហគមន៍ទាំង៣ ទាំងសមាជិក ទាំងថ្នាក់ដឹកនាំ ត្រូវប្រកាន់នូវតម្លៃជាមូលដ្ឋាន៣ គឺចេះជួយខ្លួនឯង មានប្រជាធិបតេយ្យ និងតម្លាភាព និងចេះជួយគ្នាទៅវិញទៅមក ក្នុងសហគមន៍ និងអ្នកដទៃ ដើម្បីកសាងសម្ព័នភាពផ្សេងៗ ក្នុងមូលដ្ឋាន។ ក៏ត្រូវមានសាគ្គីភាពឯកភាពផ្ទៃក្នុងរួមគ្នា ដោះស្រាយប្រសិនជាមានបញ្ហាអ្វីកើតឡើង ។
