ព័ត៌មានផ្សេងៗទៀត
លោកជំទាវអនុរដ្ឋលេខាធិការ អ៊ឹម រចនា ទទួលជួបពិភាក្សាជាលើកទី២ជាមួយសារព័ត៌មានអេអ៊ឹមអេស (AMS) អំពីកិច្ចសហការផ្សព្វផ្សាយកម្មវិធីគោលនយោបាយអាទិភាពសហគមន៍កសិកម្មទំនើប
ចេញផ្សាយ ៦ ធ្នូ ២០២៤ 2765
នៅព្រឹកថ្ងៃទី០៦ ខែធ្នូ ឆ្នាំ២០២៤ លោកជំទាវ អ៊ឹម រចនា អនុរដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ បានទទួលជួបពិភាក្សាការងារជាមួយសារព័ត៌មានអេអ៊ឹមអេស (AMS) ដែលនេះជាកិច្ចពិភាក្សាលើកទី២ អំពីកិច្ចសហការផ្សព្វផ្សាយកម្មវិធីគោលនយោបាយអាទិភាពសហគមន៍កសិកម្មទំនើប។ ជំនួបនេះធ្វើឡើងនៅទីស្តីការក្រសួងកសិកម្ម រុក្ខាប្រមាញ់ និងនេសាទ។
លោកជំទាវ អ៊ឹម រចនា បានសម្ដែងការស្វាគមន៍ និងអរគុណចំពោះសារព័ត៌មាន AMS ដែលចាប់អារម្មណ៍អំពីកម្មវិធីគោលនយោបាយសហគមន៍កសិកម្មទំនើប ដោយបានពិភាក្សាបន្តការងារកិច្ចសហការនេះ រួមមានលើកនូវគម្រោងដែលនឹងត្រូវធ្វើរួមគ្នាជាមួយក្រសួងកសិកម្មដើម្បីផលិតជាមាតិកា ទាក់ទងនឹងយុទ្ធនាការផ្សព្វផ្សាយកម្មវិធីគោលនយោបាយអាទិភាពរបស់រាជរដ្ឋាភិបាល ពីវិស័យកសិកម្ម ឱ្យបានទូលំទូលាយ។
បើតាមលោកជំទាវ អ៊ឹម រចនា ការចូលរួមរបស់សារព័ត៌មានក្នុងការផ្សព្វផ្សាយព័ត៌មានពិត និងមានខ្លឹមសារគ្រប់ជ្រុងជ្រោយអំពីវិស័យកសិកម្ម មានសារៈសំខាន់ណាស់សម្រាប់សាធារណជន និងក្រសួងកសិកម្ម រុក្ខាប្រមាញ់ និងនេសាទ ។ បើមិនមានអ្វីប្រែប្រួលគម្រោងនៃកិច្ចសហការផលិតមាតិកាពីសហគមន៍កសិកម្មទំនើប ជាមួយនូវការរៀបចំបង្កើតប្រធានបទមួយចំនួន នឹងចាប់ផ្តើមជជែករួមគ្នាបន្ថែមទៀត ហើយការផលិតនេះ នឹងធ្វើទៅតាមការគ្រោងទុកនាពេលខាងមុខ៕
