ការចុះពិនិត្យខ្សែច្រវាក់ផលិតកម្ម និងផ្តល់ការគាំទ្រដល់ក្រុមហ៊ុន​ផលិតជីក្នុងស្រុក នៅទូទាំងប្រទេស​ ត្រូវបាន​បញ្ចប់​ដោយជោគជ័យ

ចេញ​ផ្សាយ​ ២៨ ធ្នូ ២០២៤ 2564

នៅថ្ងៃទី២៧ ខែធ្នូ ឆ្នាំ២០២៤ ក្រុមការងារក្រសួងកសិកម្ម រុក្ខាប្រមាញ់ និងនេសាទ បានបិទបញ្ចប់ទស្សនកិច្ចចុះពិនិត្យខ្សែច្រវាក់​ផលិតកម្ម និងផ្តល់ការគាំទ្រដល់ក្រុមហ៊ុនផលិតជីក្នុងស្រុក​ ជាមួយនឹងទស្សនកិច្ចជុំទី៤​ នៅក្រុមហ៊ុនចំនួន២​ ក្នុងខេត្តពោធិ៍សាត់​។​

កន្លងមក​ ក្រុមការងារដឹកនាំដោយ​ ឯកឧត្តមរដ្ឋលេខាធិការ​ គង់ ច័ន្ទវាសនា​ និងមានការចូលរួមពី​ ឯកឧត្តម ឡោ រស្មី និងលោកជំទាវ ហ៊ូ សុពណ៌ អនុរដ្ឋលេខាធិការ មន្ត្រីជំនាញនៃអគ្គនាយកដ្ឋានកសិកម្ម និងមន្ទីរកសិកម្មខេត្ត បានចុះពិនិត្យចំនួន៣លេីករួចមកហេីយ នៅតាមបណ្តាខេត្តនានា​ រួមមាន​ ខេត្តកំពង់ស្ពឺ​ សៀមរាប​ ឧត្តរមានជ័យ​ កំពង់ធំ​ តាកែវ​ និងខេត្តកណ្តាល។

សូមជម្រាបថា​ បច្ចុប្បន្ន​ ប្រទេសកម្ពុជាមានក្រុមហ៊ុន​ និងសិប្បកម្មខ្នាតមធ្យមជាង១០​ ដែលបាននិងកំពុងផលិតជីសរីរាង្គក្នុងស្រុក​ ក្នុងបរិមាណជាង៤មុឺនតោន​ ក្នុងមួយឆ្នាំ​ ដេីម្បីផ្គត់ផ្គង់ដល់ប្រជាកសិករ​។ ខណ:ទទួលបាន​ការគាំទ្រជាបន្តបន្ទាប់​ ក្រុមហ៊ុន​ និងសិប្បកម្មភាគច្រេីនកំពុងពង្រីកខ្សែច្រវាក់ផលិតកម្ម​ និងបង្កេីនការផលិត ដេីម្បីឆ្លេីយតប​ទៅនឹងតម្រូវ​ការទីផ្សារដែលខ្លួនមាន។

ជារួម​ ក្រុមការងារវាយតម្លៃបានថា​ ប្រជាកសិករមានការយល់ដឹងកាន់តែល្អប្រសេីរ​ អំពីអត្ថប្រយោជន៍នៃជីសរីរាង្គ​ និងកំពុងបង្កេីន​ការប្រេីប្រាស់ជាលំដាប់​ ស្របពេលដែលជីសរីរាង្គត្រូវបានផលិត​ និងចែកចាយកាន់តែច្រេីន​ក្នុងស្រុក​។ ជាមួយគ្នានេះ​ ក្រុមការងារ​បានផ្តាំផ្ញេី​ និងលើកទឹកចិត្តដល់ម្ចាស់ក្រុមហ៊ុន​ និងសិប្បកម្មជីសរីរាង្គក្នុងស្រុកទាំងអស់​ឱ្យបន្តផលិតស្របតាមស្តង់ដារ​បច្ចេកទេស​ ដេីម្បីធានាគុណភាព​ និងចែកចាយក្នុងតម្លៃសមរម្យជូនប្រជាកសិករប្រេីប្រាស់កាន់តែទូលំទូលាយថែមទៀត។

តាមរយ:ទស្សនកិច្ចចំនួន៤លេីកនេះ​ ក្រុមការងារបានប្រមូលធាតុចូល​ល្អៗ​ និងទទួលសំណូមពរសមស្របមួយចំនួនពីម្ចាស់ក្រុមហ៊ុន​ និងសិប្បកម្ម​ ដេីម្បីលេីកយោបល់ជូនក្រសួង​ និង​រាជរដ្ឋាភិបាល​ សំដៅពិនិត្យលទ្ធភាព​បង្កេីនការគាំទ្រដល់ការផលិត​ និងការប្រេីប្រាស់ជីសរីរាង្គផលិតក្នុងស្រុកឱ្យកាន់តែទូលំទូលាយថែមទៀត​ ដេីម្បីកាត់​បន្ថយថ្លៃដេីមផលិត​ បង្កេីនប្រាក់ចំណេញ​ និងលេីកកម្ពស់ជីវភាពប្រជាកសិករ​។ ជាងនេះទៀត​ ការផលិត​ និងប្រេីប្រាស់ជីសរីរាង្គក្នុងស្រុក​ជួយដោះស្រាយបញ្ហាបរិស្ថាន​ បង្កេីតការងារសម្រាប់ពលរដ្ឋខ្មែរ​ កាត់បន្ថយការប្រេីប្រាស់ជីគីមី​នាំចូលពីបរទេស និងរក្សានិរន្តរភាពគុណភាពដីកសិកម្មផងដែរ​ ស្របតាមគោលនយោបាយរបស់ក្រសួង​កសិកម្ម​ រុក្ខាប្រមាញ់​ និងនេសាទ​ ក្រោមការដឹកនាំរបស់រាជរដ្ឋាភិបាលកម្ពុជា៕