ឯកឧត្តមអនុរដ្ឋលេខាធិការ សៀក ឡេង អញ្ជើញចុះពិនិត្យការងារបង្កបង្កើនផលស្រូវរដូវប្រាំង និងសំណេះសំណាលជាមួយកសិករ នៅក្នុងឃុំចំនួន២ និងរោងម៉ាស៊ីនកិនស្រូវ ក្នុងខេត្តឧត្តរមានជ័យ

ចេញ​ផ្សាយ​ ២១ មករា ២០២៥ 2735

នៅថ្ងៃទី២០ ខែមករា ឆ្នាំ២០២៥ ឯកឧត្តម សៀក ឡេង អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ អមដំណើរដោយលោកអភិបាលស្រុកចុងកាល់ មេឃុំ មេភូមិ មន្ទីរកសិកម្មខេត្តឧត្តរមានជ័យ និងមន្ត្រីកសិកម្មឃុំ បានអញ្ជើញចុះពិនិត្យការងារបង្កបង្កើនផលស្រូវរដូវប្រាំង និងជួបសំណេះសំណាលជាមួយប្រជាកសិករ នៅក្នុងឃុំជើងទៀន និងឃុំចុងកាល់ ស្រុកចុងកាល់ និងរោងម៉ាស៊ីនកិនស្រូវមួយចំនួន នៅក្រុងសំរោង  ខេត្តឧត្តរមានជ័យ។

នាឱកាសនោះ ឯកឧត្តមអនុរដ្ឋលេខាធិការ បានជួបសំណេះសំណាលជាមួយប្រជាកសិករ នៅភូមិឆ្កែស្រែង ឃុំជើងទៀន ស្រុកចុងកាល់ ដោយបានដាំដុះស្រូវរដូវប្រាំង សរុបចំនួន ៣៧៧ហិកតា ស្មើនឹង ៨៩គ្រួសារ លើប្រភេទពូជស្រូវ OM៥៤៥១។ និងជួបជាមួយប្រជាកសិករនៅភូមិក ឃុំចុងកាល់ ស្រុកចុងកាល់ ដោយបានដំាដុះស្រូវរដូវប្រាំងសរុបចំនួន ៤៥៨ហិកតា ស្មើនឹង ១៩០គ្រួសារ លើប្រភេទពូជស្រូវ OM៥៤៥១ ចំនួន ៣៣២ហិកតា និងស្រូវដំណើប IR៤៦២៥ ចំនួន ១២៦ហិកតា។

នៅក្នុងជំនួបសំណេះសំណាលនោះ ប្រជាកសិករបានលើកឡើងថា នាពេលកន្លងមក ពួកគាត់ជួបប្រទះបញ្ហាខ្វះខាតទឹកក្នុងការដាំដុះស្រូវប្រាំង ក៏ប៉ុន្តែដោយមានកិច្ចអន្តរាគមន៍ពីរដ្ឋបាលខេត្ត និងសហការរវាងមន្ទីរកសិកម្ម និងមន្ទីរធនធានទឹក បានកាយបើកផ្លូវទឹក ដើម្បីបង្ហូរទឹកចូលក្នុងអាងស្តុកទឹកបន្ថែម។ ជាមួយគ្នានេះ ឯកឧត្តមអនុរដ្ឋលេខាធិការ មន្ទីរកសិកម្ម និងអភិបាលស្រុក បានឧបត្ថម្ភប្រេងម៉ាស៊ូតក្នុង១នាក់ ចំនួន១០០លីត្រ ដើម្បីឱ្យសហគមន៍ប្រើប្រាស់ទឹក ត្រៀមបូមទឹកបង្ហូរចូលក្នុងអាង និងបើកទ្វារទឹកបង្ហូរចូលតាមប្រឡាយ ហើយបន្តបូមចូលទៅក្នុងស្រែរបស់ប្រជាកសិករ។  តាមរយៈការសំណូមពរពីប្រជាកសិករ ឯកឧត្តមអនុរដ្ឋលេខាធិការបានឧបត្ថម្ភថវិកាចំនួន១លានរៀលបន្ថែមទៀត ដើម្បីទិញលូដាក់កាត់ផ្លូវ ដើម្បីបង្ហូរទឹកចូលក្នុងស្រែចំនួន៦កន្លែង និងជួយសម្រួលដល់ការដឹកជញ្ជូនកសិផលរបស់ពួកគាត់នៅភូមិឆ្កែស្រែងផងដែរ។

ទន្ទឹមនឹងនេះ ប្រជាកសិករទាំងនោះ បានបង្ហាញការសប្បាយរីករាយ ដោយសារនៅក្នុងភូមិសាស្ត្រទាំងអស់នៅក្នុងស្រុកចុងកាល់ ខេត្តឧត្តរមានជ័យ មានទឹកគ្រប់គ្រាន់សម្រាប់ធ្វើស្រែប្រាំង តាមរយៈការគាំទ្រ ទាំងការងារសម្របសម្រួល និងបច្ចេកទេស ពីមន្ទីរកសិកម្មខេត្ត ការិយាល័យកសិកម្មស្រុក និងមន្ត្រីកសិកម្មឃុំ។ អ្វីដែលគួរឱ្យកត់សម្គាល់ ប្រជាកសិករក៏បានចាប់អារម្មណ៍ ចង់ស្វែងយល់បន្ថែមពីការកសាង និងចងក្រងជាសហគមន៍កសិកម្មទំនើប ដើម្បីកាត់បន្ថយថ្លៃដើម និងទទួលបានផលចំណេញផងដែរ។ លើសពីនេះ ប្រជាកសិករ ទទួលស្គាល់នូវបញ្ហានៃការធ្លាក់ថ្លៃស្រូវរដូវប្រាំង បើធៀបទៅនឹងឆ្នាំមុន ប៉ុន្តែតម្លៃស្រូវបច្ចុប្បន្នក្នុងរង្វង់៨០០រៀលនេះ នៅតែធ្វើឱ្យពួកគាត់ទទួលបានផលចំណេញខ្លះដែរ។

ជាមួយគ្នានេះដែរ ឯកឧត្តមអនុរដ្ឋលេខាធិការ ក៏បានបន្តបជួបពិភាក្សាជាមួយម្ចាស់រោងម៉ាស៊ីនកិនស្រូវរបស់លោក អេង សួរ ស្ថិតនៅភូមិដូនកែន សង្កាត់សំរោង ក្រុងសំរោង ដែលរោងម៉ាស៊ីននេះ អាចស្តុកស្រូវបានចំនួន ១០ ០០០ តោន  កិនបាន ៥តោន/ម៉ោង សម្ងួតបាន ១៥០តោន/ថ្ងៃ។ មិនត្រឹមតែប៉ុណ្ណោះ ម្ចាស់រោងម៉ាស៊ីនមានទទួលទិញស្រូវនាងខុន ចំនួន ៥ ០០០ ទៅ ៦ ០០០តោន/ឆ្នាំ និងកំពុងសាងសង់ឃ្លំាំស្តុកស្រូវបន្ថែមទៀត ដែលមានលទ្ធភាពអាចស្តុកទុកស្រូវបានចំនួន ២ ០០០តោន។

ក្នុងការជួបពិភាក្សានេះ ម្ចាស់រោងម៉ាស៊ីនកិនស្រូវ បានសំណូមពរស្នើដល់ក្រសួង និងមន្ទីរកសិកម្មខេត្ត ជួយផ្សព្វផ្សាយដល់កសិករគួរផលិតស្រូវប្រភេទពូជរបស់ខ្មែរ។ ឆ្លើយតបនឹងសំណើរនេះ ឯកឧត្តមបញ្ជាក់ថា បច្ចុប្បន្ននេះ ក្រសួងកសិកម្មបាននឹងកំពុងយកចិត្តទុកដាក់ធ្វើការផ្សព្វផ្សាយជូនប្រជាកសិករតាមរយៈផេករបស់ក្រសួង និងចាត់ឱ្យមន្ត្រីកសិកម្មនៅតាមខេត្ត ស្រុក និងឃុំចុះផ្សព្វផ្សាយជូនប្រជាសិករយ៉ាងផុសផុល ហើយឯកឧត្តមក៏បានលើកទឹកចិត្ត និងស្នើដល់ម្ចាស់រោងម៉ាស៊ីន បន្តជួយប្រមូលទិញស្រូវប្រជាកសិករតាមលទ្ធភាពដែលអាចធ្វើទៅបានផងដែរ។

និយាយជារួម គិតត្រឹមថ្ងៃទី២០ ខែមករា ឆ្នាំ២០២៥ ការងារបង្កបង្កើនផលស្រូវរដូវប្រាំងទូទាំងខេត្តឧត្តរមានជ័យ បានចំនួនសរុប១ ៣៥១ ហិកតា ស្មើនឹង២១៧.៩០% នៃផែនការប្រចាំឆ្នាំចំនួន៦២០ហិកតា ស្មើនឹង៤៨៦គ្រួសារ ក្នុងនោះរួមមាន មានពូជ OM៥៤៥១, ស្រង៉ែ និងចំប៉ីស៧០ ដំណើប IR៤៦២៥  និងសែនក្រអូប០១៕