ព័ត៌មានផ្សេងៗទៀត
លោកស្រី គិត វិសិដ្ឋកញ្ញា អគ្គនាយិការង នៃអគ្គនាយកដ្ឋានកសិកម្ម បានអញ្ជើញចុះស្វែងយល់ការដាំដុះ និងពិនិត្យមើលតម្លៃស្រូវនាងខុន នៅខេត្តចំនួន២
ចេញផ្សាយ ២៥ ធ្នូ ២០២៤ 2713
នៅថ្ងៃទី២៣ ដល់ថ្ងៃទី២៤ ខែធ្នូ ឆ្នាំ២០២៤ លោកស្រី គិត វិសិដ្ឋកញ្ញា អគ្គនាយិការង នៃអគ្គនាយកដ្ឋានកសិកម្ម នៃក្រសួងកសិកម្ម រុក្ខាប្រមាញ់ និងនេសាទ បានអញ្ជើញចុះសិក្សាស្វែងយល់ពីដំណើរការដាំដុះ និងតម្លៃស្រូវនាងខុននៅទីវាល និងតាមរោងម៉ាស៊ីនកិនស្រូវមួយចំនួន នៅ២ខេត្តគឺ ខេត្តបាត់ដំបង និងខេត្តបន្ទាយមានជ័យ។
ក្នុងដំណើរចុះស្វែងយល់នេះ មានការចូលរួមពីសំណាក់ លោក គង់ គា ប្រធាននាយកដ្ឋានដំណាំស្រូវ លោកស្រី ទុយ សុខខេង អនុប្រធាននាយកដ្ឋានគ្រប់គ្រងធនធានដីកសិកម្ម និងអាជ្ញាធរឃុំ អំពិលប្រាំដើម ស្រុកបវេល ខេត្តបាត់ដំបង និងឃុំឈ្នួមានជ័យ ស្រុកព្រះនេត្រព្រះ ខេត្តបន្ទាយមានជ័យ។
គោលបំណងនៃដំណើរនេះដើម្បីជួបសំណេះសំណាលជាមួយបងប្អូនប្រជាកសិករ អ្នកដាំដុះស្រូវនាងខុន ស្វែងយល់ពីដំណើរការដាំដុះ ការថែទាំ ការប្រមូលផល និងការលំបាកក្នុងផលិតកម្ម ជាពិសេសតម្លៃស្រូវនាងខុន។ សម្រាប់ឆ្នាំ២០២៤នេះ កសិករបានលើកឡើងថា ទិន្នផលស្រូវនាងខុនមានការកើនឡើងជាងឆ្នាំ២០២៣ ដោយសារមានអំណោយផលពីអាកាសធាតុ រីឯតម្លៃវិញ មានការធ្លាក់ចុះបន្តិចបន្តួច បើធៀបនឹងឆ្នាំ២០២៣ តែបើធៀបនឹងឆ្នាំ២០២២ ឬ២០២១ គឺតម្លៃស្រូវនាងខុនមិនមានការធ្លាក់ថ្លៃនោះទេ ហើយកសិករនៅតែទទួលបាននូវផលចំណេញដដែល ដោយសារទទួលបានទិន្នផលខ្ពស់។
លោកស្រី គិត វិសិដ្ឋកញ្ញា អគ្គនាយិការង នៃអគ្គនាយកដ្ឋានកសិកម្ម បានគូសបញ្ជាក់ថា ស្រូវនាងខុនជាប្រភេទស្រូវធ្ងន់ប្រកាន់រដូវ ងាយស្រួលដាំដុះ និងថែទាំ មិនចំណាយដើមទុនច្រើន ទទួលបានទិន្នផលខ្ពស់ គិតជាមធ្យមបាន៤តោនក្នុងមួយហិកតា និងតម្លៃលក់បាន៧១០០បាត ប្រហែល ៨៣០០០០រៀលក្នុង១តោន នៅទីវាល និង៧៤០០បាត ប្រហែល៨៧០០០០រៀល ក្នុង១តោននៅរោងម៉ាស៊ីនកិនស្រូវ៕
