ព័ត៌មានផ្សេងៗទៀត
ឯកឧត្ដមបណ្ឌិតរដ្ឋលេខាធិការ យ៉ង សាំង កុមារ និងក្រុមការងារអញ្ជើញចុះជួបអាជ្ញាធរពាក់ព័ន្ធ មន្រ្តីកសិកម្មឃុំ និងកសិករ ដើម្បីពិនិត្យលើស្ថានភាពនៃការប្រមូលផលស្រូវធ្ងន់ នៅខេត្តបន្ទាយមានជ័យ
ចេញផ្សាយ ២១ ធ្នូ ២០២៤ 3201
នៅថ្ងៃទី១៩ ខែធ្នូ ឆ្នាំ២០២៤ ឯកឧត្ដមបណ្ឌិត យ៉ង សាំង កុមារ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ អមដំណើរដោយឯកឧត្តម ឡឹក សុធារ អនុរដ្ឋលេខាធិការ និងលោក នាក់ ថុន ប្រធានការិយាល័យ នៃនាយកដ្ឋានដំណាំស្រូវ បានអញ្ជើញចុះជួបជាមួយអាជ្ញាធរឃុំ មេភូមិ មន្រ្តីកសិកម្មឃុំ និងកសិករ ក្នុងភូមិសាស្រ្តឃុំភ្នំលៀប ស្រុកព្រះនេត្រព្រះ ខេត្តបន្ទាយមានជ័យ ដើម្បីពិនិត្យលើស្ថានភាពនៃការប្រមូលផលស្រូវធ្ងន់។
នាឱកាសនៃជំនួបនោះ ឯកឧត្ដមបណ្ឌិតរដ្ឋលេខាធិការ បានពន្យល់អំពីកម្មវិធីគោលនយោបាយអាទិភាពទី៥ និងទី៦ សម្រាប់វិស័យកសិកម្ម និងយន្តការសំខាន់ៗក្នុងការដោះស្រាយបញ្ហា និងការរក្សាស្ថិរភាពតម្លៃស្រូវនាពេលបច្ចុប្បន្ននេះ ជាពិសេសការសម្របសម្រួលស្រូវទៅរោងម៉ាស៊ីន ព្រមទាំងបានចុះពិនិត្យស្រែស្រូវធ្ងន់ផងដែរ។
សូមបញ្ជាក់ថា ឃុំភ្នំលៀប មានផ្ទៃដីចំនួន ៣០០០ ហិកតា ដែលធ្វើស្រែ ជាប្រភេទស្រូវធ្ងន់ មានដូចជា៖ ស្រូវនាងខុន ស្រូវលលកចឹក និងស្រូវឡើងទឹក (អង្ករបាយរឹង) នឹងត្រូវប្រមូលផលនៅចន្លោះពាក់កណ្ដាលខែធ្នូ ឆ្នាំ២០២៤ ដល់ខែមករា ឆ្នាំ២០២៥៕
