លោកស្រី អន ស៊ីថា ប្រធាននាយកដ្ឋានសវនកម្មផ្ទៃក្នុង នៃក្រសួងកសិកម្ម ដឹកនាំក្រុមការងារចុះពិនិត្យស្ថានភាពស្រូវប្រាំងប្រជាពលរដ្ឋនៅឃុំបត់ត្រង់ ខេត្តបន្ទាយមានជ័យ

ចេញ​ផ្សាយ​ ៣១ មករា ២០២៥ 3288

នៅថ្ងៃទី ៣០ ខែមករា ឆ្នាំ២០២៥ លោកស្រី អន ស៊ីថា ប្រធាននាយកដ្ឋានសវនកម្មផ្ទៃក្នុង នៃក្រសួងកសិកម្ម រុក្ខាប្រមាញ់ និងនេសាទ និងជាប្រធានក្រុមការងាររាជរដ្ឋាភិបាលចុះមូលដ្ឋានឃុំបត់ត្រង់ ស្រុកមង្គលបូរី ខេត្តបន្ទាយមានជ័យ និងអមដំណើរដោយ លោក វ៉ឹង ឈាងហេង លោក ពេជ្រ សីហា និងអាជ្ញាធរថ្នាក់ក្រោមជាតិ ដើម្បីចុះទៅពិនិត្យស្ថានភាពស្រូវប្រាំងរបស់ប្រជាកសិករ ដែលប្រឈមនឹងខ្វះទឹកស្រោចស្រពចំនួន២៨០ហិកតា ស្ថិតនៅភូមិសាស្ត្រ ឃុំបត់ត្រង់ ស្រុកមង្គលបូរី ខេត្តបន្ទាយមានជ័យ។

ដំណើរចុះពិនិត្យនេះ លោកស្រី អន ស៊ីថា ប្រធាននាយកដ្ឋានសវនកម្មផ្ទៃក្នុង នៃក្រសួងកសិកម្ម បានឱ្យដឹងថា ស្រូវប្រាំងរបស់ប្រជាកសិករចំនួន២៨០ហិកតា នៅឃុំបត់ត្រង់ ខេត្តបន្ទាយមានជ័យ  កំពុងស្ថិតក្នុងដំណាក់កាលកកើតគួរ បើសិនជាមិនមានទឹកស្រោចស្រពរយ:ពេល១សប្តាហ៍ទៀត ស្រូវនោះ អាចប្រឈមការខូចខាតទាំងស្រុង។

ស្របពេលជាមួយគ្នានោះ លោកស្រីប្រធាននាយកដ្ឋាន ក៏បានចុះពិនិត្យប្រភពទឹកនៅទឹកស្ទឹងសិរីសោភ័ណ និងបានជួបពិភាក្សាជាមួយមន្ទីរធនធានទឹក និងឧតុនិយម ខេត្តបន្ទាយមានជ័យ  ដើម្បីជួយអន្តរាគមន៍អូសទឹកពីស្ទឹងសេរីសោភ័ណ សង្កាត់ទឹកថ្លា បូមសង្រ្គោះស្រូវប្រជាកសិករចំនួន២៨០ហិកតា។ ទន្ទឹមនឹងនេះ មន្ទីរធនធានទឹក និងឧតុនិយម បានឱ្យដឹងថា ទឹកក្នុងស្ទឹងសិរីសោភ័ណ អាចស្តុកទុក សម្រាប់ផលិតជាទឹកស្អាតផ្គត់ផ្គង់ជូនប្រជាពលរដ្ឋប្រើប្រាស់នូវរដូវប្រាំងនាពេលខាងមុខផងដែរ។

នាឱកាសនោះ លោកស្រីប្រធាននាយកដ្ឋាន និងក្រុមការងារ ក៏បានជួបសំណេះសំណាលជាមួយក្រុមប្រឹក្សាឃុំ និងមេភូមិទាំង១១ភូមិ ស្ថិតនៅសាលាឃុំបត់ត្រង់  ដោយបានពន្យល់ពីតម្លៃស្រូវ អូអឹម មិនមែនធ្លាក់ថ្លៃទេ គឺតម្លៃដែលវិលត្រឡប់ទៅស្ថានភាព២ឆ្នាំមុន  និងណែនាំឱ្យក្រុមប្រឹក្សាឃុំ មេភូមិទាំង១១ បន្តជួយផ្សព្វផ្សាយដល់ប្រជាកសិករពីបញ្ហាខ្វះទឹកបូមដាក់ស្រែប្រាំង ព្រមទាំងលើកឡើងពីសារប្រយោជន៍ នៃសហគមន៍កសិកម្មទំនើប ដែលជួយប្រជាកសិករ ក្នុងការកាត់បន្ថយថ្លៃដើមផលិត មានផែនការផលិតកម្មត្រឹមត្រូវផ្គត់ផ្គង់តាមតម្រូវការទីផ្សារ មានកិច្ចសន្យាផលិតកម្មច្បាស់លាស់ ទទួលបានកម្ចីការប្រាក់ទាប និងមានទីផ្សារពិតប្រាកដ៕