ឯកឧត្តមរដ្ឋមន្ត្រី វេង សាខុន បានអញ្ជើញបន្តដំណើរទៅពិនិត្យស្ថានភាព និងវឌ្ឍនភាពរបស់សហគ្រាសស្រាវជ្រាវ ផលិត និងវេចខ្ចប់ពូជស្រូវឈ្មោះ Bio Rice (Hunan) Co., Ltd

ចេញ​ផ្សាយ​ ១៧ ឧសភា ២០១៨ 3533

នៅរសៀលថ្ងៃដដែលនេះឯកឧត្តមរដ្ឋមន្ត្រីបានបន្តដំណើរទៅពិនិត្យស្ថានភាព និងវឌ្ឍនភាពរបស់សហគ្រាសស្រាវជ្រាវ ផលិត និងវេចខ្ចប់ពូជស្រូវឈ្មោះ Bio Rice (Hunan) Co., Ltd។

សហគ្រាស Bio Rice គឺជាក្រុមហ៊ុនឯកជន បង្កើតឡើងនៅឆ្នាំ ២០១២ គោលបំណងបំពេញនូវភាពខ្វះខាតនៃការវេចខ្ចប់ពូជស្រូវតាមស្តង់ដារមុនបញ្ចេញទៅទីផ្សារ។ បច្ចុប្បន្នសហគ្រាសនេះ មានលទ្ធភាពផលិតនិងលក់ចែកចាយពូជស្រូវបានជាង ៣ពាន់តោនក្នុង ១ឆ្នាំ។ សហគ្រាសក៏បានកសាងម៉ាស៊ីនសំរិតសំរាំង និងជ្រើសរើសពូជសុទ្ធល្អ គុណភាពខ្ពស់ និងឃ្លាំងស្តុកពូជស្រូវ ដែលអាចស្តុកបានរហូតដល់ ៥ពាន់តោន ប្រកបដោយអនាម័យ សុវត្ថិភាព និងប្រសិទ្ធភាពខ្ពស់ដើម្បីធានាដល់គុណភាពពូជស្រូវជូនប្រជាកសិករ។

សូមបញ្ជាក់ផងដែរថា សមិទ្ធផលដ៏ធំមួយដែលក្រុមហ៊ុនសម្រេចបាន ពោលគឺផលិតបាននូវពូជស្រូវ Y900 ដែលមានលទ្ធភាពផ្តល់ផលបានជាង ១៥តោនក្នុង ១ហត។

ក្នុងជំនួបនេះ ឯកឧត្តមរដ្ឋមន្ត្រីបានធ្វើការកោតសរសើរ និងវាយតម្លៃខ្ពស់ ចំពោះសមិទ្ធផលដែលសហគ្រាសសម្រេចបានកន្លងមក។ ឯកឧត្តមរដ្ឋមន្ត្រីក៏បានគូសបញ្ជាក់អំពីបំណងប្រាថ្នារបស់រាជរដ្ឋាភិបាលកម្ពុជា ក្នុងការលើកកម្ពស់ទិន្នផលដើម្បីឆ្លើយតបទៅនឹងកំណើនសេដ្ឋកិច្ចជាតិ និងឆន្ទៈនៃការប្រែក្លាយប្រទេសទៅជាប្រទេសដែលមានចំណូលមធ្យមកម្រិតខ្ពស់នាឆ្នាំ ២០៣០។

ឯកឧត្តមរដ្ឋមន្ត្រីក៏ស្វាគមន៍ និងគាំទ្រយ៉ាងខ្លាំងចំពោះបំណងវិនិយោគផលិតពូជស្រូវនៅកម្ពុជារបស់សហគ្រាស ពោលគឺបានឆ្លើយតបទៅនិងឆន្ទៈរបស់ក្រសួងក្នុងការផ្សាភ្ជាប់ទំនាក់ទំនងមិត្តភាព សាមគ្គីភាព និងកិច្ចសហប្រតិបត្តិការទ្វេភាគីរវាងប្រទេសទាំងពីរ ដើម្បីជម្រុញផលិតកម្មស្រូវ និងការនាំចេញអង្ករឲ្យអស់លទ្ធភាពនាពេលអនសគត។