ព័ត៌មានផ្សេងៗទៀត
ឯកឧត្តមរដ្ឋលេខាធិការ ហាស់ សារ៉េត អញ្ជើញជួបពិភាក្សាការងារជាមួយក្រុមប្រឹក្សាភិបាលសហគមន៍កសិកម្មបាភ្នំមានជ័យ នៅខេត្តព្រៃវែង
ចេញផ្សាយ ២២ ធ្នូ ២០២៤ 2256
នៅថ្ងៃទី២១ ខែធ្នូ ឆ្នាំ២០២៤ ឯកឧត្តម ហាស់ សារ៉េត រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានអញ្ជើញជួបសួរសុខទុក្ខ និងពិភាក្សាការងារជាមួយក្រុមប្រឹក្សាភិបាលសហគមន៍កសិកម្មបាភ្នំមានជ័យ ស្ថិតនៅភូមិរោងដំរី ឃុំជើងភ្នំ ស្រុកបាភ្នំ ខេត្តព្រៃវែង។
យោងតាមកិច្ចពិភាក្សា ក្រុមប្រឹក្សាភិបាលសហគមន៍ បានរៀបរាប់ជូនឯកឧត្តម ជ្រាបថា សហគមន៍បង្កើតឡើងនៅថ្ងៃទី១៤ ខែមិនា ឆ្នាំ ២០១០ មានសមាជិកសរុប ២៣៤នាក់ ស្រី៩៦នាក់ មានភាគហ៊ុនសម្រាប់ធ្វើដើមទុនសរុប ៣១១៦ហ៊ុន ដែលក្នុងមួយហ៊ុនមានទឹកប្រាក់ ៤0000រៀល ទុនសរុប ឆ្នាំ២០២៤ មានចំនួន៧៤៦ ៧៥៧ ៩០០រៀល សម្រាប់ប្រើប្រាស់ក្នុងប្រតិបត្តិការការងារទូទៅក្នុងសហគមន៍។
ចំណែកមុខរបរសំខាន់ៗចម្បងរបស់សហគមន៍ គឺធ្វើផលិតកម្មស្រូវពូជ និងកែច្នៃគ្រាប់ពូជស្រូវសុទ្ធលក់ លើផ្ទៃដីស១៤៥ហិកតា ផលិតគ្រាប់ពូជស្រូវបីប្រភេទរួមមាន៖ ពូជស្រូវផ្ការំដួល៤១.២៥១ គក្រ ពូជស្រូវ OM5451 ៦៥០ ០០០គ.ក្រ និងពូជស្រូវ អូអឹម5451 បានចំនួន ៩១ ៨០០៩ គ.ក្រ នឹងចុះកិច្ចសន្យាផលិតកម្ម គ្រាប់ពូជ ជាមួយសមាជិក និងសហគមន៍នានា ដើម្បីបានគ្រាប់ពូជសុទ្ធយកមកកែច្នៃ និងវេចខ្ចប់បានជាង៧00តោន សម្រាប់ឆ្នាំ២០២៤។
សម្រាប់ផែនការផលិតឆ្នាំ២០២៥ គឺផលិតពូជស្រូវផ្ការំដួល២៥ ហិកតា ផលិតពូជស្រូវOM 5451 ១២០ហិកតា និងផលិតពូជស្រូវ IR 504 ៥០ហិកតា ហើយការអនុវត្តដាំដុះប្រើម៉ាស៊ីនស្ទូង និងពង្រួសតាមលក្ខណៈបច្ចេកទេស។ ចំណែកការចំណាយថវិកា តាមការបាន់ស្មាន ប្រហែលជា ១៤ ៣៨៣ ៦០០ រៀល។
ក្រោយពីបានស្តាប់សេចក្តីរាយការណ៍សង្ខេបរបស់សហគមន៍ ឯកឧត្តមបានសម្តែងនូវការកោតសរសើរ ដល់អាជ្ញាធរគ្រប់លំដាប់ថ្នាក់ ដែលបានជួយគាំទ្រដល់សហគមន៍ និងថ្នាក់ដឹកនាំសហគមន៍ ធ្វើឱ្យសហគមន៍មានវឌ្ឍនភាពល្អ បង្កើតការងារលើកកម្ពស់គុណភាពគ្រាប់ពូជស្រូវបានល្អ ដែលអាចចរាចរលក់ចែកចាយគ្រាប់ពូជក្នុងនិងក្រៅខេត្តបានល្អ។ បន្ថែមពីនេះឯកឧត្តមបានលើកទឹកចិត្តដល់សហគមន៍បន្តការយកចិត្តទុកដាក់ពង្រីកផលិតកម្មថែមទៀត ដើម្បីឆ្លើយតបតាមតម្រូវការទីផ្សារគ្រាប់ពូជស្រូវនៅក្នុងស្រុក៕
