សិក្ខាសាលាស្តីពី វឌ្ឍនភាពនៃការប្រើប្រាស់គេហទំព័ររបស់អង្គភាពក្រោមឱវាទក្រសួងកសិកម្ម រុក្ខាប្រមាញ់ និងនេសាទ និងបច្ចេកវិទ្យាព័ត៌មានក្នុងវិស័យកសិកម្ម

ចេញ​ផ្សាយ​ ១៩ វិច្ឆិកា ២០១៩ 20823

ថ្ងៃអង្គារ ៨រោច ខែកត្តិក ឆ្នាំកុរ ឯកស័ក ពស២៥៦៣ ត្រូវនឹងថ្ងៃទី១៩ ខែវិច្ឆិកា ឆ្នាំ២០១៩ នៅសណ្ឋាគារខេមរាអង្គរ ខេត្តសៀមរាប៖

មជ្ឈមណ្ឌលព័ត៌មាន និងឯកសារកសិកម្ម បានរៀបចំសិក្ខាសាលាស្តីពី សិក្ខាសាលាស្តីពី វឌ្ឍនភាពនៃការប្រើប្រាស់គេហទំព័ររបស់អង្គភាពក្រោមឱវាទក្រសួងកសិកម្ម រុក្ខាប្រមាញ់ និងនេសាទ និងបច្ចេកវិទ្យាព័ត៌មានក្នុងវិស័យកសិកម្ម ក្រោមអធិបតីភាពលោក មឿង សុនិត្យា អនុប្រធានមជ្ឈមណ្ឌល រួមជាមួយនឹងក្រុមការងារ នៃមជ្ឈមណ្ឌលព័ត៌មាន និងឯកសារកសិកម្ម និងមានសិក្ខាកាមពីតាមបណ្តាលអង្គភាពក្រោមឱវាទទាំងអស់។

គោលបំណងនៃសិក្ខាសាលា គឺដើម្បីពង្រឹងសមត្ថភាពមន្រ្តីថ្នាក់កណ្តាលក្នុងការអនុវត្តការងារឲ្យកាន់តែមានប្រសិទ្ធភាព តាមរយៈការពង្រឹងចំណេះដឹងទាក់ទងនឹងការប្រើប្រាស់ឧបករណ៍បច្ចេកវិទ្យាព័ត៌មានវិទ្យាក្នុងវិស័យកសិកម្ម រួមជាមួយនឹងការណែនាំអំពីការប្រើប្រាស់ និងបច្ចុប្បន្នភាពចង្កោមគេហទំព័ររបស់ក្រសួងកសិកម្ម រុក្ខាប្រមាញ់ និងនេសាទ ដែលបានចូលរួមចំណែកដល់ការផ្សព្វផ្សាយពីសកម្មភាពរបស់ថ្នាក់ដឹកនាំក្រសួង មន្ទីរ និងបានផ្សព្វផ្សាយព័ត៌មានកសិកម្ម និងឯកសារកសិកម្មឲ្យកាន់តែទូលំទូលាយ។

ការ​ផ្តួច​ផ្តើមរៀបចំ​អង្គសិក្ខាសាលាដ៏មានអត្ថន័យនេះ គឺជាឱកាសសម្រាប់​យើង​ទាំងអស់គ្នា​ពិនិត្យ វាយតម្លៃ ស្វែង​យល់​ឲ្យ​បាន​​ស៊ី​ជម្រៅ​​នៅរាល់ការបញ្ជូលព័ត៌មាន និងឯកសារទៅក្នុងគេហទំព័រ (Website) របស់អង្គភាពនីមួយៗ ថាតើមានព័ត៌មានដែលបានបញ្ចូល ឬឯកសារមានគ្រប់គ្រាន់ និងមានលក្ខណៈត្រឹមត្រូវដែរឬទេ? ​នឹងចង់បង្ហាញអំពីការ​វិវឌ្ឍន៍ថ្មីៗនៃបច្ចេកវិទ្យាព័ត៌មានវិទ្យាដែលបម្រើឲ្យការអភិវឌ្ឍវិស័យកសិកម្មទំនើប និងមានភាពឆ្លាតវៃ ជាពិសេស​​ត្រៀ​មរៀបចំខ្លួនសម្រាប់បដិវត្តន៍ឧស្សាហកម្មជំនាន់ទី៤ ​(Industry 4.0 on Agriculture) ការធ្វើឌីជីថលរូបនីយកម្មកម្ពុជា សេដ្ឋកិច្ចឌីជីថល និងការវិវត្តន៍ផ្នែកបច្ចេកវិទ្យានៃសកលលោក ដូ​ចដែលប្រទេសជប៉ុនបានកំពុងដំណើរការបដិវត្តន៍ឧស្សាហកម្មសង្គម ៥.០ (revolution society 5.0 on Agriculture ) នាពេលបច្ចុប្បន្ននេះ ដែលជាឧទាហរណ៍ស្រាប់។ លើសពីនេះទៅទៀត ចង់ក្រើនរំលឹកឡើងវិញអំពីការរៀបចំឯកសារ និងបណ្តាសកម្មភាពផ្សេងៗរបស់អង្គភាពនីមួយៗ ថាតើមានបង្ហោះសារ (Post) ជាប្រចាំដែរឬទេ? និងស្វែងរកពីមូលហេតុថា ហេតុអ្វីបានជាគេហទំព័ររបស់អង្គភាពមួយចំនួនមិនមានព័ត៌មាន ឬឯកសារគ្រប់គ្រាន់?។​ ការពិភាក្សាជាក្រុមដើម្បីរកចំណុចខ្វះខាត និងរកដំណោះស្រាយសមស្របក្នុងការកែសម្រួលគេហទំព័រឡើងវិញ និងទទួលយកសំណូមពរផ្សេងៗរបស់អង្គភាពនីមួយៗក្នុងការកែប្រែគេហទំព័ររបស់ខ្លួន​ នៅឆ្នាំបន្តបន្ទាប់ខាងមុខ។ ជាមួយគ្នានេះដែរ សិក្ខាសាលានេះ ក៏នឹងផ្តល់ចំណេះបន្ថែមទៀតដល់អស់លោក លោកស្រីដែលជាសិក្ខាកាម លើការប្រើប្រាស់ និងគ្រប់គ្រង Web Admin (មុខងារថ្មីៗបន្ថែមទៀត) ក្នុងការអនុវត្តការងារបញ្ចូលព័ត៌មានទៅក្នុងគេហទំព័រ របស់អង្គភាពជាប្រចាំថ្ងៃរៀងៗខ្លួន។

ខ្លឹមសារមេរៀនមានដូចជា៖

• បង្ហាញអំពីវឌ្ឍនភាពនៃការប្រើប្រាស់គេហទំព័ររបស់អង្គភាពក្រោមឱវាទក្រសួងកសិកម្ម រុក្ខាប្រមាញ់ និងនេសាទ
• ពិភាក្សាអំពីវឌ្ឍនភាពនៃការប្រើប្រាស់គេហទំព័ររបស់អង្គភាពក្រោមឱវាទក្រសួងកសិកម្ម រុក្ខាប្រមាញ់ និងនេសាទ
• អនុវត្តន៍ការប្រើប្រាស់គេហទំព័ររបស់អង្គភាពក្រោមឱវាទក្រសួងកសិកម្ម រុក្ខាប្រមាញ់ និងនេសាទ
• ការផ្សព្វផ្សាយ និងការប្រើប្រាស់គេហទំព័របណ្ណាល័យកសិកម្ម
• របៀបកាត់តវីដេអូដោយស្វែងយល់ពីកម្មវិធីលើកុំព្យូទ័រ
• របៀបកាត់តវីដេអូដោយស្វែងយល់ពីកម្មវិធីលើទូរស័ព្ទស្មាតហ្វូន
• ការកំណត់ទីតាំងលើ Google Map
• របៀប Share File, Share Printer & Configure Router។