ព័ត៌មានផ្សេងៗទៀត
ឯកឧត្តមអនុរដ្ឋលេខាធិការ ប៉ែន ផល្លីកា អញ្ជើញចូលរួមក្នុងពិធីបើក «សប្តាហ៍គាំពារសង្គមកម្ពុជាឆ្នាំ២០២៥» និងប្រកាសដាក់ឱ្យអនុវត្តជាផ្លូវការ «ក្របខណ្ឌគោលនយោបាយជាតិគាំពារសង្គម ឆ្នាំ២០២៤-២០៣៥»
ចេញផ្សាយ ២០ កុម្ភៈ ២០២៥ 2983
នៅព្រឹកថ្ងៃទី២០ ខែកុម្ភៈ ឆ្នាំ២០២៥ ឯកឧត្តម ប៉ែន ផល្លីកា អនុរដ្ឋលេខាធិការ និងជាប្រធានក្រុមការងារសកម្មភាពជនពិការនៃក្រសួងកសិកម្ម រុក្ខាប្រមាញ់ និងនេសាទ បានចូលរួមជាមួយក្រុមប្រឹក្សាជាតិគាំពារសង្គមរៀបចំកម្មវិធី «សប្តាហ៍គាំពារសង្គមកម្ពុជាឆ្នាំ២០២៥» និងប្រកាសដាក់ឱ្យអនុវត្តជាផ្លូវការ «ក្របខណ្ឌគោលនយោបាយជាតិគាំពារសង្គម ឆ្នាំ២០២៤-២០៣៥» ដែលប្រព្រឹត្តទៅនៅសណ្ឋាគាររ៉េស៊ីដង់សុខា ភ្នំពេញ។ កម្មវិធីនេះមានការចូលរួមពីសមាជិក-សមាជិការព្រឹទ្ធសភា រដ្ឋសភា អគ្គរាជទូត-រដ្ឋទូត តំណាងក្រសួងស្ថាប័នពាក់ព័ន្ធ អភិបាលនៃគណៈអភិបាលរាជធានី-ខេត្ត តំណាងដៃគូអភិវឌ្ឍន៍ សរុបអ្នកចូលរួមជាង១០០០នាក់។
កម្មវិធីប្រារព្វឡើងក្រោមអធិបតីភាពដ៏ខ្ពង់ខ្ពស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា ដើម្បីលើកកម្ពស់ការយល់ដឹងរបស់ភាគីពាក់ព័ន្ធ និងសាធារណជនអំពីវឌ្ឍនភាព និងបញ្ហាប្រឈម ក៏ដូចជាដើម្បីទទួលបានធាតុចូលបន្ថែមសម្រាប់បន្តអភិវឌ្ឍ និងពង្រឹងប្រព័ន្ធគាំពារសង្គមនៅកម្ពុជាប្រកបដោយប្រសិទ្ធភាព និរន្តរភាព និងស្របតាមនវានុវត្តន៍ក្នុងតំបន់ និងអន្តរជាតិ។
នាឱកាសដ៏ពិសេសនេះ សម្តេចបវរធិបតីនាយករដ្ឋមន្ត្រី បានធ្វើការប្តេជ្ញា បន្តកំណត់យក ការលើកស្ទួយសុខុមាលភាព និងជីវភាពរបស់ប្រជាពលរដ្ឋ ការអភិវឌ្ឍមូលធនមនុស្ស និងការកាត់បន្ថយភាពក្រីក្រ ជាការងារអាទិភាពចំពោះមុខ ក្នុងស្មារតី មិនបោះបង់ពលរដ្ឋណាម្នាក់ ដោយសម្តេចបវរធិបតីនៅតែបន្តប្ដូរផ្ដាច់ដឹកនាំ នាវាគាំពារសង្គមកម្ពុជា ដោយធ្វើដំណើរ ទៅមុខយ៉ាងស្វាហាប់ ប្រកបដោយនិរន្តរភាព ដើម្បីសម្រេចបានចក្ខុវិស័យ កម្ពុជាឆ្នាំ២០៥០៕
