ព័ត៌មានផ្សេងៗទៀត
ឯកឧត្តមរដ្ឋលេខាធិការ ហាស់ សារ៉េត តំណាងដ៏ខ្ពង់ខ្ពស់ឯកឧត្តមរដ្ឋមន្រ្តី ឌិត ទីណា អញ្ជើញជួបសំណេះសំណាល និងដោះស្រាយបញ្ហាប្រឈមជាមួយបងប្អូនអាជីវករដែលមានបញ្ហាទិញ-លក់ស្រូវ នៅខេត្តព្រៃវែង
ចេញផ្សាយ ១៩ កុម្ភៈ ២០២៥ 2859
នាព្រឹកថ្ងៃទី១៩ ខែកុម្ភៈ ឆ្នាំ២០២៥ ឯកឧត្តម ហាស់ សារ៉េត រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងជាតំណាងដ៏ខ្ពង់ខ្ពស់ឯកឧត្តមរដ្ឋមន្រ្តី ឌិត ទីណា អមដំណេីរដោយ ឯកឧត្តម ទឹម បូរក្ស អនុរដ្ឋលេខាធិការ ឯកឧត្តម ហុឺ បាវី ប្រធានក្រុមការងាររាជរដ្ឋាភិបាលចុះមូលដ្ឋានស្រុកព្រះស្តេច ឯកឧត្តម អន ភារៈ អភិបាលរង នៃគណៈអភិបាលខេត្ត លោកប្រធានមន្ទីរកសិកម្មខេត្ត អភិបាលស្រុក និងមន្រ្តីជំនាញ បានអញ្ជើញជួបសំណេះសំណាល និងដោះស្រាយបញ្ហាប្រឈមជាមួយបងប្អូនអាជីវករដែលមានបញ្ហាទិញ-លក់ស្រូវ នៅសាលាស្រុកព្រះស្តេច ខេត្តព្រៃវែង។
ជាកិច្ចចាប់ផ្តេីម ឯកឧត្តមរដ្ឋលេខាធិការ បានលេីកឡេីងថាការធ្វេីពាណិជ្ជកម្មឆ្លងប្រទេសត្រូវមានការប្រុងប្រយ័ត្នខ្ពស់ មានកិច្ចចរចាត្រឹមត្រូវ និងគោរពតាមនីតិវិធីផ្លូវច្បាប់ច្បាស់លាស់ ធ្វេីយ៉ាងណាឱ្យមានសុខសុវត្ថិភាព និងមានការទទួលខុសត្រូវខ្ពស់ទាំងអាជីវករ ប្រជាកសិករ ដោយមិនឱ្យខាតបង់ផលប្រយោជន៍ និងប៉ះពាល់ការរស់នៅប្រចាំថ្ងៃឡេីយ។
ពាក់ព័ន្ធនឹងការងារនេះ ឯកឧត្តមរដ្ឋលេខាធិការ បានផ្តល់អនុសាសន៍ណែនាំឱ្យបណ្តាអាជីវករ និងប្រជាកសិករទាំងអស់ត្រូវរក្សាប្រពៃណីនៃវប្បធម៌សន្ទនា និងពិភាក្សាស្វែងរកយល់ដំណោះស្រាយជាមួយអាជ្ញាធរខេត្ត-ស្រុក ជៀសវាងការផុសឡាយក្នុងបណ្តាញសង្គម ដែលនាំឱ្យបាត់បង់តម្លៃ និងមានផលប៉ះពាល់ដល់សង្គម ដែលមិនមែនជាដំណោះស្រាយដ៏ល្អនោះទេ។
ទន្ទឹមនឹងនេះ ឯកឧត្តមរដ្ឋលេខាធិការ បានលើកទឹកចិត្តក្នុងការចងក្រងសហគមន៍កសិកម្មទំនើប ដែលមានសារៈសំខាន់ជាច្រេីនក្នុងការកាត់បន្ថយថ្លៃដេីមផលិត មានផែនការផលិតកម្មច្បាស់លាស់ ផលិតតាមតម្រូវការទីផ្សារ មានកិច្ចសន្យាផលិតកម្ម ទទួលបានកម្ចីការប្រាក់ទាប មានការគាំទ្របច្ចេកទេសពីក្រសួងកសិកម្ម និងមានទីផ្សារពិតប្រាកដ។
ជាទីបញ្ចប់ ឯកឧត្តមរដ្ឋលេខាធិការ បានសង្កត់ធ្ងន់ថាក្នុងនាមរាជរដ្ឋាភិបាល ដែលមានក្រសួងកសិកម្ម ជាសេនាធិការតែងតែឈរលេីគោលជំហរគិតគូរសុខទុក្ខរបស់បងប្អូនប្រជាកសិករ ជួយដោះស្រាយបញ្ហាប្រឈម និងតម្កល់ផលប្រយោជន៍ជាតិជាធំ៕
