ព័ត៌មានផ្សេងៗទៀត
ឯកឧត្តមរដ្ឋលេខាធិការ ហ៊ាន វណ្ណហន អញ្ជើញជាអធិបតីភាព ក្នុងកិច្ចប្រជុំ «ពិនិត្យពាក់កណ្តាលអាណតិ្តកម្មវិធីសកម្មភាពដូហាសម្រាប់ប្រទេសមានការអភិវឌ្ឍនតិចតួចនៃតំបន់អាស៊ីប៉ាស៊ីហ្វិក»
ចេញផ្សាយ ៣១ មីនា ២០២៦ 2581
នាព្រឹកថ្ងៃទី៣១ ខែមីនា ឆ្នាំ២០២៦ ឯកឧត្តមបណ្ឌិត ហ៊ាន វណ្ណហន រដ្ឋលេខាធិការ តំណាងដ៏ខ្ពង់ខ្ពស់ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ អញ្ជើញជាអធិបតីភាព ក្នុងកិច្ចប្រជុំស្តីពី «ការពិនិត្យពាក់កណ្តាលអាណតិ្តកម្មវិធីសកម្មភាពដូហាសម្រាប់ប្រទេសមានការអភិវឌ្ឍតិចតួចនៃតំបន់អាស៊ីប៉ាស៊ីហ្វិក (Asia-Pacific Regional Mid-term Review of the Doha Programme of Action for the least Development Countries) នៅសណ្ឋាគារ ហ៊ីម៉ាវ៉ារី រាជធានីភ្នំពេញ។
កិច្ចប្រជុំមានការអញ្ជើញចូលរួមពីលោកជំទាវ Armida Salsiah Alisjabana អគ្គលេខាធិការរងនៃអង្គការសហប្រជាជាតិ និងជាប្រធានគណៈកម្មាធិការជាតិ អេស្កាប់ (ESCAP) លោកជំទាវ Rabab Fatima អគ្គលេខាធិការរងនៃអង្គការសហប្រជាជាតិ ទទួលបន្ទុកការិយាល័យតំណាងជាន់ខ្ពស់ របស់អង្គការសហប្រជាជាតិសម្រាប់ប្រទេសអភិវឌ្ឍន៍តិចតួច ប្រទេសកំពុងអភិវឌ្ឍន៍ដែលគ្មានឆ្នេរសមុទ្រ និងរដ្ឋកំពុងអភិវឌ្ឍន៍កោះតូចៗ (UN-OHRLLS)។ បន្ថែមពីនេះ ក៏មានការចូលរួមពីឧត្តមមន្ត្រីជំនាញ អ្នកស្រាវជ្រាវ ដៃគូអភិវឌ្ឍន៍ វិស័យឯកជន អង្គការជាតិ និងអន្តរជាតិ និងគណៈប្រតិភូពីបណ្តាប្រទេស ក្នុងតំបន់អាស៊ី និងប៉ាស៊ីហ្វិក រួមមាន បង់ក្លាដេស ឡាវ គីរីបាទី នេប៉ាល់ ទីម័រឡេស្តេ ទូវ៉ាលូ និងកម្ពុជា។
ព្រឹត្តិការណ៍ធ្វើឡើងក្នុងគោលបំណងដើម្បី៖ (១) ពិនិត្យ និងវាយតម្លៃវឌ្ឍនភាពនៃការអនុវត្តកម្មវិធីដូហា សម្រាប់ប្រទេសមានការអភិវឌ្ឍតិចតួចក្នុងរយៈពេលប្រាំឆ្នាំកន្លងមកនេះ (២)ស្វែងរកនូវវិធានការ និងយុទ្ធសាស្រ្តថ្មីដើម្បីជំរុញដល់ការអនុវត្តកម្មវិធីសកម្មភាពដូហាឱ្យទទួលបានជោគជ័យ។
សរុបជារួម កិច្ចប្រជុំនេះបានបង្ហាញពីការប្តេជ្ញាចិត្តរួមរបស់ប្រទេសក្នុងតំបន់ និងដៃគូអភិវឌ្ឍន៍ ក្នុងការគាំទ្រប្រទេសមានការអភិវឌ្ឍតិចតួច ឱ្យអាចឆ្ពោះទៅរកការអភិវឌ្ឍប្រកបដោយចីរភាព និងការរីកចម្រើនសេដ្ឋកិច្ចសង្គមយ៉ាងរឹងមាំ។ លទ្ធផលនៃកិច្ចប្រជុំនេះនឹងជាគោលដៅសំខាន់សម្រាប់ការបន្តអនុវត្តកម្មវិធីសកម្មភាពដូហា និងការសហការរួមគ្នាដើម្បីឆ្លើយតបទៅនឹងបញ្ហាប្រឈមនានានាពេលអនាគត៕
