ព័ត៌មានផ្សេងៗទៀត
ឯកឧត្ដមបណ្ឌិត ហ៊ាន វណ្ណហន អញ្ជើញដឹកនាំវេទិកាសាធារណៈស្តីពីការត្រួតពិនិត្យ និងតាមដានការអនុវត្តកម្មវិធីនយោបាយយុទ្ធសាស្ត្របញ្ចកោណ ដំណាក់កាលទី១ នៅខេត្តរតនគិរី
ចេញផ្សាយ ១៨ កក្កដា ២០២៦ 1458
នៅថ្ងៃទី១៧-១៨ ខែកក្កដា ឆ្នាំ២០២៦ ឯកឧត្ដមបណ្ឌិត ហ៊ាន វណ្ណហន រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងជាប្រធានក្រុមការងាររាជរដ្ឋាភិបាលចុះមូលដ្ឋានស្រុកបរកែវ ខេត្តរតនគិរី បានអញ្ជើញដឹកនាំវេទិកាសាធារណៈ ស្តីពីការត្រួតពិនិត្យ និងតាមដានការអនុវត្តកម្មវិធីនយោបាយយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាលកម្ពុជា សម្រាប់នីតិកាលទី៧ នៃរដ្ឋសភា របស់ក្រុមការងាររាជរដ្ឋាភិបាលចុះមូលដ្ឋានស្រុកបរកែវ។
ក្នុងវេទិកានេះ មានការចូលរួមពីឯកឧត្ដមអនុប្រធាន លោក លោកស្រី សមាជិក សមាជិកាក្រុមការងាររាជរដ្ឋាភិបាលចុះមូលដ្ឋានស្រុកបរកែវ ក្រុមប្រឹក្សាស្រុក លោក លោកស្រីអភិបាលរងស្រុក មន្ត្រីនគរបាល និងកងកម្លាំងប្រដាប់អាវុធទាំងបីប្រភេទ ប្រធានការិយាល័យ អង្គភាពចំណុះរចនាសម្ព័ន្ធរដ្ឋបាលស្រុក ក្រុមប្រឹក្សាឃុំ មេប៉ុស្តិ៍នគរបាល លោកនាយក លោកគ្រូ អ្នកគ្រូ នៃឃុំទាំង៦ ក្នុងស្រុកបរកែវ ខេត្តរតនគិរី។
វេទិកាសាធារណៈនេះ បានផ្តល់ឱកាសដល់អ្នកពាក់ព័ន្ធក្នុងការលើកឡើងនូវមតិយោបល់ សំណូមពរ បញ្ហាប្រឈម និងពិភាក្សារួមគ្នាដើម្បីស្វែងរកដំណោះស្រាយ សំដៅលើកកម្ពស់ការផ្តល់សេវាសាធារណៈឱ្យកាន់តែមានប្រសិទ្ធភាព តម្លាភាព និងគណនេយ្យភាព។ វេទិកានេះក៏បានបង្ហាញពីការយកចិត្តទុកដាក់របស់ថ្នាក់ដឹកនាំក្នុងការពង្រឹងអភិបាលកិច្ចល្អ និងជំរុញការចូលរួមរបស់ប្រជាពលរដ្ឋក្នុងការអភិវឌ្ឍមូលដ្ឋានឱ្យកាន់តែរីកចម្រើន ប្រកបដោយចីរភាព។
ថ្លែងក្នុងឱកាសនោះ ឯកឧត្ដមបណ្ឌិត ហ៊ាន វណ្ណហន បានផ្តល់អនុសាសន៍ដល់មន្ទីរ អង្គភាពពាក់ព័ន្ធ ជាពិសេសមន្ទីរកសិកម្ម រុក្ខាប្រមាញ់ និងនេសាទខេត្ត និងមន្ត្រីកសិកម្មឃុំ ក្នុងស្រុកបរកែវ ត្រូវសហការជាមួយរដ្ឋបាលស្រុក ត្រៀមលក្ខណៈឱ្យបានរួចរាល់ក្នុងការចូលរួមអនុវត្តកម្មវិធី CIP របស់រាជរដ្ឋាភិបាល តាមរយៈកម្មវិធីគាំទ្រឆ្លើយតបបន្ទាន់សម្រាប់កសិកម្មឆ្លាតវៃធន់នឹងអាកាសធាតុ និងពង្រឹងជីវភាពរស់នៅ (CERC) ក្រោមក្របខណ្ឌគម្រោងកែលម្អសន្តិសុខទឹកកម្ពុជា (CaWSIP)។
ឯកឧត្ដមបណ្ឌិត បានបញ្ជាក់ថា ការអនុវត្តកម្មវិធីនេះ ត្រូវផ្តោតការយកចិត្តទុកដាក់លើការកំណត់លក្ខខណ្ឌវិនិច្ឆ័យអ្នកទទួលផលឱ្យបានច្បាស់លាស់ ត្រឹមត្រូវ និងមានតម្លាភាព ដើម្បីធានាឱ្យប្រជាពលរដ្ឋដែលមានតម្រូវការពិតប្រាកដ អាចទទួលបានការគាំទ្រពីកម្មវិធី និងចូលរួមលើកកម្ពស់ផលិតភាពកសិកម្ម ព្រមទាំងជីវភាពរស់នៅរបស់ប្រជាពលរដ្ឋក្នុងមូលដ្ឋាន៕
