ព័ត៌មានផ្សេងៗទៀត
ឯកឧត្តមឧបនាយករដ្ឋមន្រ្តី ហ៊ុន ម៉ានី អញ្ជើញជាគណៈអធិបតីក្នុងសិក្ខាសាលា ស្តីពី «ការពិនិត្យឡើងវិញ ការវិភាគមុខងារនិងរចនាសម្ព័ន្ធ នៃក្រសួងកសិកម្ម រុក្ខាប្រមាញ់ និងនេសាទ»
ចេញផ្សាយ ៤ មីនា ២០២៥ 2629
នៅរសៀលថ្ងៃទី០៣ ខែមីនា ឆ្នាំ២០២៥ ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ បានអញ្ជើញជាគណៈអធិបតីក្នុងសិក្ខាសាលា ស្តីពី «ការពិនិត្យឡើងវិញ ការវិភាគមុខងារនិងរចនាសម្ព័ន្ធ នៃក្រសួងកសិកម្ម រុក្ខាប្រមាញ់ និងនេសាទ» នៅទីស្តីការក្រសួងកសិកម្ម រុក្ខាប្រមាញ់ និងនេសាទ។
ថ្លែងទៅកាន់អង្គសិក្ខាសាលា ឯកឧត្តមរដ្ឋមន្ត្រី ឌិត ទីណា បានរាយការណ៍អំពីស្ថានភាពការវិភាគមុខងារ និងកំណែទម្រង់រដ្ឋបាលសាធារណៈនៃក្រសួងកសិកម្ម រុក្ខាប្រមាញ់ និងនេសាទ ព្រមទាំងបានកែសម្រួលរចនាសម្ព័ន្ធ ដោយលុប និងកែលម្អ ព្រមទាំងច្របាច់បញ្ចូលអង្គភាពមួយចំនួន ដោយរាល់ការរៀបចំទាំងអស់ ត្រូវអនុលោមស្មារតីនៃការងារកំណែទម្រង់រដ្ឋបាលសាធារណៈ «ពង្រឹង ជាជាងពង្រីក»។
ឯកឧត្តមរដ្ឋមន្ត្រី ជឿជាក់ថា សិក្ខាសាលានេះ នឹងរួមចំណែកផ្ដល់នូវចំណេះដឹង និងធាតុចូលជាវិជ្ជមានបន្ថែមទៀតដល់ថ្នាក់ដឹកនាំ និងមន្ត្រីរាជការនៃក្រសួងកសិកម្ម រុក្ខាប្រមាញ់ និងនេសាទ គាំទ្រដល់ការពិនិត្យការវិភាគមុខងារនិងរចនាសម្ព័ន្ធឱ្យកាន់តែមានប្រសិទ្ធភាព ឆ្លើយតបទៅនឹងកម្មវិធីកំណែទម្រង់រដ្ឋបាលសាធារណៈ ជាពិសេសរួមចំណែកសម្រេចបាននូវបេសកកម្ម និងកម្មវិធីគោលនយោបាយអាទិភាពរបស់រាជរដ្ឋាភិបាល។
នាឱកាសនេះដែរ ឯកឧត្តមឧបនាយករដ្ឋមន្ត្រី ហ៊ុន ម៉ានី រដ្ឋមន្ដ្រីក្រសួងមុខងារសាធារណៈ បានកោតសរសើរ និងវាយតម្លៃខ្ពស់ ចំពោះរាល់កំណែទម្រង់របស់ក្រសួងកសិកម្ម រុក្ខាប្រមាញ់ និងនេសាទ ក្រោមការដឹកនាំរបស់ឯកឧត្តមរដ្ឋមន្ដ្រី ឌិត ទីណា គិតចាប់តាំងពីចុងអាណត្តិទី៦នៃរាជរដ្ឋាភិបាល មកដល់អាណត្តិទី៧នេះ។
ឯកឧត្តមឧបនាយករដ្ឋមន្ត្រី បានពន្យល់ថា អង្គសិក្ខាសាលាដែលរៀបចំធ្វើនាពេលនេះ មានភាពចាំបាច់ណាស់ ដើម្បីជម្រាបដល់ថ្នាក់ដឹកនាំ និងមន្ដ្រីរាជការគ្រប់ជាន់ថ្នាក់ ជ្រាបបន្ថែម អំពីការកែទម្រង់ប្រព័ន្ធរដ្ឋបាលសាធារណៈឱ្យកាន់តែមានទំនើបកម្ម និងមានភាពស្អាតស្អំ។
បើតាមឯកឧត្តមឧបនាយករដ្ឋមន្ដ្រី ដំណើរការនៃកំណែទម្រង់រដ្ឋបាលសាធារណៈ ជាពិសេសការពិនិត្យឡើងវិញ ការវិភាគមុខងារនិងរចនាសម្ព័ន្ធ ដើម្បីបង្កើនប្រសិទ្ធភាពការងារ និងសក្តិសិទ្ធិភាពនៃការអនុវត្តតួនាទីភារកិច្ច សំដៅបង្កើនល្បឿននៃការអភិវឌ្ឍវិស័យកសិកម្ម និងរួមចំណែកជំរុញអភិវឌ្ឍសេដ្ឋកិច្ចជាតិ ស្របតាមគោលនយោបាយរបស់រាជរដ្ឋាភិបាល។
ឯកឧត្តមឧបនាយករដ្ឋមន្ដ្រី បានផ្ដល់អនុសាសន៍ដល់អង្គសិក្ខាសាលា ត្រូវរួបរួមគ្នាជាធ្លុងមួយ កែទម្រង់ប្រព័ន្ធរដ្ឋបាលសាធារណៈឱ្យកាន់តែមានទំនើបកម្ម មានភាពស្អាតស្អំ ដើម្បីរួមចំណែកអភិវឌ្ឍប្រទេសជាតិឱ្យកាន់តែរីកចម្រើន និងដើម្បីពង្រឹងកិច្ចសហប្រតិបត្តិការនៃភាពប្រទាក់ក្រឡាគ្នាបានកាន់តែល្អប្រសើរ៕
