លោកជំទាវអនុរដ្ឋលេខាធិការ អ៊ឹម រចនា អញ្ជើញក្នុងនាមតំណាង​ក្រសួងកសិកម្ម ចូលរួមក្នុងពិធីប្រារព្ធខួប២៥ឆ្នាំ នៃការងារអភិរក្សរបស់​អង្គការសមាគមអភិរក្សសត្វព្រៃ (WCS)

ចេញ​ផ្សាយ​ ០៧ ធ្នូ ២០២៤ 774

នៅល្ងាចថ្ងៃទី០៦ ខែធ្នូ ឆ្នាំ២០២៤ បន្ទាប់ពីទទួលបានការអនុញ្ញាត ពីឯកឧត្តមរដ្ឋមន្ត្រី ឌិត ទីណា លោកជំទាវ អ៊ឹម រចនា អនុរដ្ឋលេខាធិការ​ក្រសួងកសិកម្ម រុក្ខាប្រមាញ់ និងនេសាទ បានអញ្ជើញចូលរួម​ក្នុង​នាម​តំណាង​ក្រសួងកសិកម្ម ក្នុងពិធីប្រារព្ធខួប២៥ឆ្នាំ នៃការងារអភិរក្សរបស់​អង្គការសមាគមអភិរក្សសត្វព្រៃ ដែលពិធីនេះប្រារព្ធធ្វើឡើងនៅ​សណ្ឋាគារ​ហៃយ៉ាត់រីជិនស៊ី ភ្នំពេញ។

ពិធីប្រារព្ធខួប២៥ឆ្នាំ នៃការងារអភិរក្សរបស់អង្គការសមាគម​អភិរក្ស​សត្វព្រៃ ប្រព្រឹត្តទៅក្រោមអធិបតីភាពដ៏ខ្ពង់ខ្ពស់ពី ឯកឧត្តម​បណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន និងការចូលរួមពីតំណាងក្រសួង​ស្ថាប័ន​ពាក់ព័ន្ធ ដៃគូអភិវឌ្ឈ ប្រជាសហគមន៍មូលដ្ឋាន និងអង្គការ WCS សរុបអ្នកចូលរួមប្រមាណ១៧០នាក់។

គោលបំណងនៃការប្រារព្ធពិធីប្រារព្ធខួប២៥ឆ្នាំនេះ គឺដើម្បីទទួលស្គាល់​នូវសមិទ្ធិផលរួមនៃកិច្ចសហប្រតិបិត្តការ លើកិច្ចការងារអភិរក្សកន្លងមក ជាមួយនឹងការបន្តកសាងកេរដំណែល នឹងធានាបានថា សត្វព្រៃ​និង​ធម្មជាតិ​​នៃប្រទេសកម្ពុជា បន្តនូវភាពធនសម្រាប់កូនចៅជំនាន់ក្រោយ។

ថ្លែងនៅក្នុងឱកាសនៃការប្រារព្ធពិធី លោកជំទាវ អ៊ឹម រចនា គូសបញ្ជាក់ថា ដើម្បីធានាបាន​នូវភាព​គង់វង្សនៃប្រភេទសត្វដ៏កម្រ និងមានតម្លៃនេះ រដ្ឋបាលជលផល នៃក្រសួងកសិកម្ម រុក្ខាប្រមាញ់ និងនេសាទ សហការជាមួយអាជ្ញាធរ​មូលដ្ឋាន និងដោយមានការគាំទ្របច្ចេកទេសនិង ថវិកាពីអង្គការ WCS បានចាត់វិធានការការពារសំបុក ទប់ស្កាត់បទល្មើសនេសាទ បទល្មើស​ជួញ​ដូរសត្វព្រៃ ការលែងមេពូជអណ្ដើកចូលដែនជម្រកធម្មជាតិ ការអប់រំ​ផ្សព្វផ្សាយ និងលើកកម្ពស់ជីវភាពសហគមន៍ នេសាទ។

បើតាមលោកជំទាវ សមិទ្ធផលជាមោទនៈនេះ មិនអាចកើតឡើងបានឡើយ បើគ្មានកិច្ចសហការល្អ ប្រកបដោយភាពជិតស្និទ្ធ និងស្មោះត្រង់បំផុត រវាងក្រសួងកសិកម្ម រុក្ខាប្រមាញ់ និងនេសាទ អាជ្ញាធរមូលដ្ឋាន ដៃគូអភិវឌ្ឍ វិស័យឯកជន និងសហគមន៍នេសាទ។

លោកជំទាវ សង្ឃឹម និងជឿជាក់យ៉ាងមុតមាំថា អង្គការ សមាគម និងដៃគូពាក់ព័ន្ធទាំងអស់ ដែលមានសេចក្ដីស្រឡាញ់យ៉ាងជ្រាលជ្រៅចំពោះធនធានធម្មជាតិនៅកម្ពុជា នឹងបន្តការងាររបស់ខ្លួន ប្រកបដោយឆន្ទៈមោះមុតនិងស្មារតីស្មោះត្រង់ជាទីបំផុត ជាមួយក្រសួងកសិកម្ម រុក្ខាប្រមាញ់ និងនេសាទ ព្រមទាំងក្រសួង-ស្ថាប័ន និងអាជ្ញាធរពាក់ព័ន្ធទាំងអស់ ដើម្បីនិរន្ដរភាពធនធានធម្មជាតិនៅកម្ពុជា និយាយដោយឡែក និងនៅលើពិភពលោក និយាយជារួម៕