ឯកឧត្តមរដ្ឋមន្ត្រី និងសហការី រួមដំណើរជាមួយដោយឯកឧត្តម អ៊ូច ភា អភិបាលនៃគណអភិបាលខេត្ត បានបន្តដំណើរមកស្រុកកោះអណ្តែត ដើម្បីពិនិត្យការចិញ្ចឹមកូនត្រី និងកង្កែបជាលក្ខណគ្រួសារ

ចេញ​ផ្សាយ​ ១០ សីហា ២០២០ 2520

ស្ថិតក្នុងខេត្តតាកែវដដែល នារសៀលម៉ោង ១៤:៣០ ឯកឧត្តមរដ្ឋមន្ត្រី និងសហការី រួមដំណើរជាមួយដោយឯកឧត្តម អ៊ូច ភា អភិបាលនៃគណអភិបាលខេត្ត បានបន្តដំណើរមកស្រុកកោះអណ្តែត ដើម្បីពិនិត្យការចិញ្ចឹមកូនត្រី និងកង្កែបជាលក្ខណគ្រួសាររបស់លោកពូ ហឹម វ៉ន នៅភូមិរមិញ ឃុំរមិញ និងជួបសំណេះសំណាលជាមួយប្រជាពលរដ្ឋ ៥០គ្រួសារដែលពួកគាត់ក៏ជាអ្នកចិញ្ចឹមត្រី និងធ្វើស្រែផងដែរ។ លោកពូបានរៀបរាប់ជូនឯកឧត្តមរដ្ឋមន្ត្រីថា លោកពូបានចាប់យករបរនេះនៅឆ្នាំ២០១០ ក្នុងទំហំដី ០,៥ហត កាលនោះចិញ្ចឹមត្រីក្នុងស្រែ។ ដោយទទួលបច្ចេក ទេសពីមន្ទីរកសិកម្ម រុក្ខាប្រមាញ់ និងនេសាទ បច្ចុប្បន្នពង្រីកផ្ទៃដីបាន ៥ហត ដោយចែកជា

ស្រះត្រីអណ្តែងរឹងអាយុម្ភៃថ្ងៃដាក់កូន ១៥ម៉ឺនកូន ស្រះត្រីអណ្តែងទន់អាយុ ២០ថ្ងៃដាក់កូន   ១០ ម៉ឺនកូន ស្រះកូនត្រីឆ្ពិនដាក់កូន ២០ម៉ឺនកូន ស្រះត្រីកាបឥណ្ឌាដាក់កូន ៨ម៉ឺនកូន ស្រះ   កង្ក្កែបមេ និងកូនមាន ៤ (ស្រះផ្លាស្ទិច) និងស្រះបង្កងចិញ្ចឹមសាកល្បងដាក់កូន ១៥០០០កូន។ លោកពូចិញ្ចឹមជារបៀបពាក់កណ្តាលផលិតផលសម្រេចគឺគាត់ទិញកូនត្រីទើបញាស់ (ហៅថាកូនម្សៅ) ក្នុង ១លានកូនម្សៅថ្លៃ ៦០ម៉ឺនរៀល មកចិញ្ចឹមក្នុងស្រះដល់អាយុ ៤៥ថ្ងៃ ជាមធ្យមបាន កូន ៤-៥ ម៉ឺនកូន (អាស្រ័យលើធាតុអាកាស និងលក្ខខណ្ឌរស់នៅ) ទើបគាត់ចាប់លក់បាន ១០០រៀល/ក្បាល សរុបក្នងរយ:ពេល ៤៥ថ្ងៃ គាត់បានចំណូល ៤-៥លានរៀល (រួមទាំងប្រាក់ដើម)។

ឃើញកសិករចិញ្ចឹមត្រីទទួលបានផលជាផ្លែផ្កាយ៉ាងនេះ ឯកឧត្តមរដ្ឋមន្ត្រី និងឯកឧត្តមអភិបាល ខេត្ត បានកោតសរសើរចំពោះការខិតខំប្រឹងប្រែងរបស់លោកពូ ព្រមទាំងប្រជាពលរដ្ឋផ្សេងទៀត ដែលបានចាប់យករបរចិញ្ចឹមត្រីបន្ថែម ក្រៅពីការងារធ្វើស្រែ។ ទាំងផលស្រូវ និងចិញ្ចឹមត្រី ធ្វើឲ្យពួកគាត់បានរំដោះខ្លួនចេញពីភាពក្រីក្រ មិនតែប៉ុណ្ណោះកម្រិតជីវភាពកំពុងតែកើនឡើងជាលំដាប់ សមស្របតាមអ្វីដែលសម្តេចតេជោ ហ៊ុន សែន ចង់ឃើញ និងចង់បាន។ ហេតុដូច្នេះ ហើយបានជាសម្តេច ជំរុញ លើកទឹកចិត្ត ផ្តល់អនុសាសន៍ និងថែមទាំងឧបត្ថម្ភថវិកា ដើម្បីលើកកម្ពស់ផលិតភាពផលិតកម្មវារីវប្បកម្មឲ្យបានទូលំទូលាយ និងមានការរីកចម្រើនថែមទៀត ក្នុងគ្រាដែលវិស័យមួយចំនួនកំពុងជាប់គាំងដោយសារវិបត្តិជំងឺឆ្លងកូវីដ-១៩។ ឯកឧត្តមរដ្ឋមន្ត្រី ណែនាំឲ្យរដ្ឋបានជលផលពិនិត្យលើសំណើរបស់លោកពូដែលចង់បានចំណេះ រួមជាមួយឧបករណ៍ភ្ញាស់កូនត្រីដើម្បីផលិតខ្លួនឯងនាពេលអនាគត។