ឯកឧត្តមរដ្ឋមន្រ្តី វេង សាខុន បានអញ្ជើញចូលរួមពិធីសន្និបាតបញ្ញវន្តពិភពលោកលើកទី៤ ដែលរៀបចំនៅសណ្ឋាគារសូហ្វីតែល ភូគាត្រាភ្នំពេញ

ចេញ​ផ្សាយ​ ១២ វិច្ឆិកា ២០១៨ 4021

នៅល្ងាចថ្ងៃសៅរ៍ ៣កើត ខែកត្តិក ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី១០ ខែវិច្ឆិកា ឆ្នាំ២០១៨ នៅសណ្ឋាគារសូហ្វីតែល ភូគាត្រាភ្នំពេញ មានរៀបចំសន្និបាតបញ្ញវន្តពិភពលោកលើកទី៤ ក្រោមអធិបតីភាព ឯកឧត្តម វេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ ឯកឧត្តម ជច អេដហ្គា ឯកអគ្គរដ្ឋទូតសហភាពអ៉ឺរ៉ុបប្រចាំកម្ពុជា លោកអគ្គរាជទូតរងអូស្រ្តាលី និងលោក ម៉ៅ ស្រេង នាយក IDP ប្រចាំកម្ពុជា និងមានការអញ្ជើញចូលពីភ្ញៀវជាតិ អន្តរជាតិ វិស័យឯកជន និងអតីតនិស្សិតមកពីជាង ៥០ប្រទេស លើពិភពលោក។
សន្និបាតបញ្ញវន្តពិភពលោកនេះរៀបចំឡើងដើម្បីជាវេទិកាជួបជុំ ផ្សារភ្ជាប់ទំនាក់ទំនងរវាងអតីតបញ្ញវន្ត និងដើម្បីចែករំលែកនូវបទពិសោធន៍នៅក្នុងជំនួញ ក៏ដូចជាបទពិសោធន៍ការងារ ក្រោយបញ្ចប់ការសិក្សាក្រៅប្រទេស និងដើម្បីរួមគ្នាពិភាក្សានូវប្រធានបទសំខាន់ៗមួយចំនួន ដែលអាចចូលរួមក្នុងការអភិវឌ្ឍន៏វិស័យចំបងៗក្នុងសង្គមកម្ពុជាបច្ចុប្បន្ន និងនាពេលខាងមុខ។
ឆ្លៀតក្នុងឱកាសនោះ ឯកឧត្តមរដ្ឋមន្រ្តី វេង សាខុន បានសម្តែងនូវសេចក្តីរីករាយ និងកោតសរសើរដល់ IDP ដែលបានរៀបចំកម្មវិធីដ៏មានអត្ថន័យ និងសារៈសំខាន់នាពេលនេះ។ មានមតិក្នុងការបើកសន្និបាតបញ្ញវន្តពិភពលោកលើកទី៤នេះ ឯកឧត្តមរដ្ឋមន្រ្តី បានបញ្ជាក់ថា វិស័យកសិកម្មនៅកម្ពុជានៅតែជាវិស័យអាទិភាពមួយក្នុងចំណោមវិស័យដទៃទៀតដែលចូលរួមដល់កំណើនសេដ្ឋកិច្ច ការងារ និងសុខដុមនីយកម្មសង្គម។ ក្រសួងកសិកម្ម រុក្ខាប្រមាញ់ និងនេសាទ មានគោលដៅកែប្រែពីការធ្វើកសិកម្មជាលក្ខណៈគ្រួសារទៅជាកសិធុរៈកិច្ចតាមរយៈការជំរុញការធ្វើទំនើបកម្មកសិកម្ម ធានាសន្តិសុខស្បៀង អាហារូបត្ថម្ភ ធន់នឹងការប្រែប្រួលអាកាសធាតុ និងនិរន្តភាព។ ទន្ទឹមនឹងនេះក្រសួងកសិកម្ម រុក្ខាប្រមាញ់ និងនេសាទ តាមរយៈសាកលវិទ្យាល័យភូមិន្ទកសិកម្ម សាលាកសិកម្មព្រែកលាប និងសាលាកសិកម្មកំពង់ចាម បានចូលរួមចំណែកក្នុងការអភិវឌ្ឍធនធានមនុស្សនៅក្នុងវិស័យកសិកម្ម ក៏ដូចជាបានបង្កើនសមត្ថភាពការងារក្នុងវិស័យផងដែរ។ នាឱកាសនោះ តាមរយៈសន្និបាតបញ្ញវន្តពិភពលោកនេះ ឯកឧត្តមរដ្ឋមន្រ្តី ក៏សង្ឃឹមថានឹងមាននិស្សិតជាច្រើនចាប់អារម្មណ៍បន្តការសិក្សាពីជំនាញពាក់ព័ន្ធនឹងកសិកម្មបន្ថែមទៀតដើម្បីចូលរួមចំណែកក្នុងការអភិវឌ្ឍន៍វិស័យកសិកម្មនៅកម្ពុជាឲ្យកាន់តែប្រសើរឡើង។