ព័ត៌មានផ្សេងៗទៀត
សហគមន៍ព្រៃឈើគឺជាបែបផែននៃការធ្វើវិមជ្ឈការនៃការគ្រប់គ្រងព្រៃឈើ
ចេញផ្សាយ ២២ មករា ២០១៨ 4909
ថ្លែងទៅកាន់ប្រជាពលរដ្ឋ ជាង១០០គ្រួសារ ដែលជាសមាជិកសហគមន៏ព្រៃឈើកំពែង ឯកឧត្ដមបណ្ឌិតច័ន្ទសារុន រដ្ឋមន្ដ្រីក្រសួងកសិកម្ម បានមានប្រសាសន៏ថា សហគមន៏ព្រៃឈើ គឺជាបែបផែននៃការធ្វើវិមជ្ឈការ នៃការគ្រប់គ្រងព្រៃឈើ ដែលជាការងារមួយ ត្រូវបានបញ្ជូនក្នុងកម្មវិធីព្រៃឈើជាតិ ដែលបានទទួលការអនុម័តពីរាជរដ្ឋាភិបាលកម្ពុជា និងបានប្រកាសផ្សព្វផ្សាយ យ៉ាងទូលំទូលាយកាលពីពេលថ្មីៗនេះ។
មន្ដ្រីខុទ្ទកាល័យឯកឧត្ដមរដ្ឋមន្ដ្រីក្រសួងកសិកម្ម បានប្រាប់ឱ្យដឹងកាលពីរសៀលថ្ងៃទី១៨ ខែមករានេះថា កាលពីថ្ងៃទី១៦ខែមករា ឯកឧត្ដមបណ្ឌិតច័ន្ទ សារុនអមដំណើរ ដោយប្រធានរដ្ឋបាលព្រៃឈើ ថា្នក់ដឹកនាំអង្គភាពជំនាញមួយចំនួន មន្ទីរកសិកម្មខេត្ដ អភិបាលស្រុកភ្នំក្រវាញ បានអញ្ជើញចុះពិនិត្យការងារ និងសំណេះសំណាល ជាមួយប្រជាពលរដ្ឋ ជាង១០០គ្រួសារ ជាសមាជិកសហគមន៏ព្រៃឈើកំពែង ស្ថិតនៅភូមិកំពែង ឃុំត្រងិល ស្រុកភ្នំក្រវាញ ខេត្ដពោធិ៏សាត់ ។
ក្នុងជំនួបលោក ចាន់រិទ្ធី នាយអធិការរដ្ឋបាលព្រៃឈើខាងត្បូងបឹងទន្លេសាប បានឱ្យដឹងថា ខេត្ដពោធិ៏សាត់ ត្រូវបានគ្របដណ្ដប់ ដោយព្រៃឈើប្រមាណ៩០ម៉ឺនហិកតា ជាផ្ទៃដីព្រៃឈើដ៏ធំ បើប្រៀបធៀបនឹងខេត្ដដ៏ទៃទៀត ។ ចំនួនសហគន៏ព្រៃឈើក្នុងខេត្ដមាន៥៧សហគមន៏ ។
ឯកឧត្ដមបានបន្ដថា ស្ថានភាពសហគមន៏ព្រៃឈើកំពែង ត្រូវបានបង្កើតនៅឆ្នាំ២០០០ លើផ្ទៃដី១៨៨ហិកតា មានប្រជាពលរដ្ឋ២៩៥គ្រួសារ ចូលរួមស្មើនឹង១.៣៣០នាក់។ បច្ចុប្បន្នមានការគាំទ្រពីអាជ្ញាធរខេត្ដ និងកំពុងដាក់ការស្នើសុំការសម្រេចពីក្រសួងកសិកម្ម។ ដោយឡែកមានបញ្ហាប្រឈមមួយចំនួន ដូចជាខ្វះខាតទឹក ខ្វះកន្លែងសម្រាប់ផ្ដល់ចំណីដល់សត្វគោ ក្របី និងមានផ្ទៃដីតូចចង្អៀត ។
នៅចំពោះមុខប្រជាពលរដ្ឋ ឯកឧត្ដមបណ្ឌិតច័ន្ទ សារុន បានថ្លែងនូវការកោតសរសើរ ដល់ប្រជាពលរដ្ឋ ដែលមានស្មារតីចូលរួម ជួយថែរក្សាការពារសម្បត្ដិព្រៃឈើឱ្យបានគង់វង្ស និងស្នើឱ្យរួបរួមគ្នាខិតខំបន្ដទៀត ។
ឯកឧត្ដមរដ្ឋមន្ដ្រី បានមានប្រសាសន៏ថា ការអភិរក្ស និងគ្រប់គ្រងព្រៃឈើ ដោយនិរន្ដរភាព គឺជាសមាសភាពដ៏សំខាន់មួយ សម្រាប់ការអភិវឌ្ឍន៏ ដោយចីរភាពរបស់ពិភពលោក ហើយបញ្ហាព្រៃឈើនេះ ក៏ក្លាយជារបៀបវារៈនយោបាយ ដ៏សំខាន់មួយដែលសហគមន៏ពិភពលោក បាននឹងកំពុងផ្ដោតការយកចិត្ដទុកដាក់ ព្រមទាំងខិតខំរួមគ្នារិះរក និងដាក់ចេញនូវវិធានការផ្សេងៗ នៅគ្រប់កម្រិតទាំងថ្នាក់ជាតិ និងអន្ដរជាតិ ។
ឯកឧត្ដមរដ្ឋមន្ដ្រី ក៏បានផ្ដល់យោបល់ ដល់កសិករទីនោះផងដែរ ដោយសុំកំពឹងផ្អែក តែលើផលអនុផលព្រៃឈើតែមួយមុខ ត្រូវតែគិតគូររកមុខរបរបន្ថែម ដូចជាការដាំបន្លែបង្កា និងចិញ្ចឹមសត្វ។ សុំឱ្យប្ដូរពូជប្ដូរទម្លាប់ ពីការចិញ្ចឹមសត្វ លែងពាសវាលពាសកាល មកចិញ្ចឹមដាក់ទ្រុងវិញម្ដង ។ ពីព្រោះការចិញ្ចឹមដាក់ទ្រុងវាមានផលល្អច្រើន ងាយស្រួលដល់ការតាមដានជំងឺផ្សេងៗ ។ ងាយស្រួលក្នុងការថែទាំ ការឱ្យចំណីការបន្ដពូជ និងកាកសំណល់ (លាមក)សម្រាប់ធ្វើជី និងបម្រើឱ្យឡជីឧស្ម័នទៀតផងដែលការងារទាំងអស់នេះយើងអនុវត្ដបានជោគជ័យនៅកន្លែងផ្សេងៗ ជាពិសេសស្រុកត្រាំកក់ ខេត្ដតាកែវ ។ ឯកឧត្ដមបានស្នើឱ្យខណ្ឌរដ្ឋបាលព្រៃឈើរៀបចំឱ្យមានដំណើរទស្សនកិច្ចនៅស្រុកត្រាំកក់ក្នុងពេលឆាប់ៗខាងមុខនេះដោយការចំណាយជាបន្ទុករបស់ឯកឧត្ដមផ្ទាល់ ។
នាឱកាសនោះ ឯកឧត្ដមរដ្ឋមន្ដ្រីបានឧបត្ដម្ភដល់សហគមន៏នូវស៊ីម៉ងត៏២តោនផងដែរ ៕
