ក្រុមការងារមជ្ឈមណ្ឌលព័ត៌មាន និងឯកសារកសិកម្ម បានអញ្ជើញចុះពង្រឹងសមត្ថភាពមន្ត្រីបង្គោលក្នុងការប្រើប្រាស់ថ្នាល និងយល់ដឹងពី CamDX និង CamDigiKey ការបង្កើត QR តាមរយៈ qr.gov.kh និងការប្រើប្រាស់ ChatGPT AI នៅខេត្តកណ្តាល

ចេញ​ផ្សាយ​ ២៦ កុម្ភៈ ២០២៥ 11790

ថ្ងៃទី២៥ ខែកុម្ភៈ ឆ្នាំ២០២៥ ក្រុមការងារការិយាល័យគ្រប់គ្រងកម្មវិធីឌីជីថល នៃមជ្ឈមណ្ឌលព័ត៌មាន និងឯកសារកសិកម្ម ដឹកនាំដោយលោក សៀ ប៉េង ប្រធានការិយាល័យគ្រប់គ្រងកម្មវិធីឌីជីថល នៃមជ្ឈមណ្ឌលព័ត៌មាន និងឯកសារកសិកម្ម បានចុះបណ្តុះបណ្តាលពង្រឹងសមត្ថភាពមន្ត្រីបង្គោលក្នុងការប្រើប្រាស់ថ្នាល និងយល់ដឹងពី CamDX និង CamDigiKey ការបង្កើត QR តាមរយៈ qr.gov.kh  និងការប្រើប្រាស់បច្ចេកវិទ្យាបញ្ញាសុបនិមិត្ត ChatGPT នៅមន្ទីរកសិកម្ម រុក្ខាប្រមាញ់ និងនេសាទខេត្តកណ្តាល ដែលមានសមាសភាពចូលរួមសរុបចំនួន ១៥រូប។

មន្ត្រីបង្គោលទាំងអស់បានចូលរួមយ៉ាងសកម្មក្នុងការជជែកពិភាក្សាជាមួយគ្រូបង្គោល  និងសំដែងការចាប់អារម្មណ៍លើប្រធានបទ ការប្រើប្រាស់ថ្នាល CamDX និង CamDigiKey  ការបង្កើត QR Code សម្រាប់ប្រើប្រាស់លើឯកសារផ្លូវការផ្សេងៗ និងការប្រើប្រាស់បណ្តុំបច្ចេកវិទ្យា AI ដែលជាផ្នែកមួយសំខាន់សម្រាប់ប្រើប្រាស់ក្នុងការងារប្រចាំថ្ងៃរបស់ពួកគាត់។ បន្ថែមពីការធ្វើបទបង្ហាញ ក៏មានការជជែកពិភាក្សា និងអនុវត្តផ្ទាល់នៅលើកុំព្យួទ័រ និងទូរស័ព្ទស្មាតហ្វូនផងដែរ។

ជាទីបញ្ចប់ ក្រុមការងារការិយាល័យគ្រប់គ្រងកម្មវិធីឌីជីថល បានជួយសម្របសម្រួលដោះស្រាយបញ្ហាមួយចំនួនលើការគ្រប់គ្រងទំព័រហ្វេសបុកផ្លូវការរបស់មន្ទីរ និងពន្យល់បន្ថែមពីសុវត្ថិភាពនៃការប្រើប្រាស់ និងគ្រប់គ្រងទំព័រហ្វេសបុក តេលេក្រាម និងគេហទំព័ររបស់មន្ទីរ។ បន្ថែមពីនេះទៀតក្រុមការងារស្នើសុំឱ្យ មានជនបង្គោលទទួលខុសត្រូវការងារឌីជីថល ភ្ជាប់ទំនាក់ទំនងជាមួយមន្ត្រីបច្ចេកទេសថ្នាក់ជាតិ ដើម្បីបន្តធ្វើការជាមួយគ្នាឱ្យកាន់តែមានប្រសិទ្ធភាពខ្ពស់។