ឯកឧត្តមអនុរដ្ឋលេខាធិការ សៀក ឡេង អញ្ជើញដឹកនាំមន្ត្រីជំនាញ ដើម្បីពិនិត្យលទ្ធផលការងារអភិវឌ្ឍន៍ប្រព័ន្ធនានារបស់ក្រសួងកសិកម្ម រុក្ខាប្រមាញ់ និងនេសាទ

ចេញ​ផ្សាយ​ ៧ មីនា ២០២៥ 10103

នៅថ្ងៃទី៦ ខែមីនា ឆ្នាំ២០២៥ ឯកឧត្តម សៀក ឡេង អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានអញ្ជើញដឹកនាំមន្ត្រីជំនាញនៃអគ្គនាយកដ្ឋានសុខភាពសត្វ និងផលិតកម្មសត្វ និងក្រុមការងារសម្របសម្រួលបច្ចេកទេសឌីជីថល នៃការិយាល័យគ្រប់គ្រងកម្មវិធីបច្ចេកវិទ្យាឌីជីថល នៃមជ្ឈមណ្ឌលព័ត៌មាន និងឯកសារកសិកម្ម ដើម្បីពិនិត្យ “ប្រព័ន្ធផ្តល់សេវាសាធារណៈរបស់ក្រសួងកសិកម្ម ក្នុងការស្នើសុំវិញ្ញាបនបត្របង្កើតកសិដ្ឋានចិញ្ចឹមសត្វ ឬបង្កាត់ពូជសត្វ គេហទំព័របណ្ណាល័យកសិកម្ម និងប្រព័ន្ធបញ្ជរតែមួយជាតិ”។

ក្រោយពីបានបញ្ចប់ការធ្វើបទបង្ហាញ ការពិនិត្យលទ្ធផល និងការពិភាក្សាលម្អិត ឯកឧត្តម សៀក ឡេង អនុរដ្ឋលេខាធិការ បានគូសបញ្ជាក់ថា អង្គប្រជុំបានសម្រេចកែសម្រួលលើមុខងារមួយចំនួននៃប្រព័ន្ធផ្តល់សេវាសាធារណៈរបស់ក្រសួងកសិកម្ម ក្នុងការស្នើសុំវិញ្ញាបនបត្របង្កើតកសិដ្ឋានចិញ្ចឹមសត្វ ឬបង្កាត់ពូជសត្វ ដើម្បីផ្តល់ភាពងាយស្រួលដល់អ្នកប្រើប្រាស់ អ្នកត្រួតពិនិត្យ និងការទូទាត់ប្រាក់តាមប្រព័ន្ធ ដូចជាការភ្ជាប់នូវ KHQR ជាដើម។

បន្ថែមពីនេះ ឯកឧត្តមអនុរដ្ឋលេខាធិការ និងក្រុមការងារជំនាញក៏បានពិនិត្យលើការកែសម្រួលមាតិកា ខ្លឹមសារ និងរូបរាង នៃគេហទំព័របណ្ណាល័យកសិកម្ម ដើម្បីធ្វើយ៉ាងណាឱ្យកាន់តែមានភាពងាយស្រួលដល់អ្នកប្រើប្រាស់ក្នុងការងារស្វែងរកឯកសារបច្ចេកទេសកសិកម្ម (សៀវភៅ និងវីដេអូ) ក៏ដូចជាណែនាំដល់ក្រុមការងារក្នុងការប្រមូល និងបញ្ចូលនូវឯកសារកសិកម្មថ្មីៗបន្ថែមទៀតលើគេហទំព័របណ្ណាល័យកសិកម្មនេះឱ្យកាន់តែសម្បូរបែប។ មួយវិញទៀត ឯកឧត្តមអនុរដ្ឋលេខាធិការក៏បានពិនិត្យ “ប្រព័ន្ធបញ្ជរតែមួយជាតិ” ឃើញថាសមិទ្ធិផលបានល្អ និងមានចំណុចដែលត្រូវយកជាគម្រូតាមសម្រាប់ការរៀបចំធ្វើប្រព័ន្ធផ្សេងៗបន្ថែមទៀត។