ឯកឧត្តមបណ្ឌិតរដ្ឋលេខាធិការ យ៉ង សាំងកុមារ តំណាងដ៏ខ្ពង់ខ្ពស់ឯកឧត្តមរដ្ឋមន្ត្រី អញ្ជើញដឹកនាំក្រុមការងារចូលរួមកម្មវិធីបុណ្យពូជដំណាំដូនតា នៅសហគមន៍ភ្នំក្រោម ក្នុងខេត្តសៀមរាប

ចេញ​ផ្សាយ​ ១ មីនា ២០២៥ 2757

នៅថ្ងៃទី២៧ ខែកុម្ភៈ ២០២៤ ឯកឧត្តមបណ្ឌិតយ៉ង សាំងកុមារ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ តំណាងដ៏ខ្ពង់ខ្ពស់ឯកឧត្តមរដ្ឋមន្ត្រី បានអញ្ជើញដឹកនាំក្រុមការងារ រួមមានឯកឧត្តម ឃុន សាវឿន រដ្ឋលេខាធិការ ឯកឧត្តម ខាត់ សុធី អនុរដ្ឋលេខាធិការ លោក ឡោ ប៊ុណ្ណា ប្រធាន CARDI និងលោក ហៃ វាសនា អនុប្រធានមន្ទីរកសិកម្មខេត្តសៀមរាប ចូលរួមក្នុងកម្មវិធីបុណ្យពូជដំណាំដូនតា នៅសហគមន៍ភ្នំក្រោម ស្ថិតនៅក្រុងសៀមរាប ខេត្តសៀមរាប។

ពិធីបុណ្យនេះធ្វើឡើងក្នុងគោលបំណងបំផុសស្មារតី ចូលរួមអភិរក្ស ថែរក្សាពូជដំណាំបុរាណរបស់ដូនតាខ្មែរឱ្យបានល្អ ស្ថិតស្ថេរគង់វង្ស និងយូរអង្វែង។

នាឱកាសនោះ ឯកឧត្តម យ៉ង សាំងកុមារ បានថ្លែងអរគុណ និងស្វាគមន៍ ព្រមទាំងលើកទឹក ចិត្តដល់ប្រជាកសិករ ដែលមានស្មារតីក្នុងការថែរក្សា អភិរក្ស ពូជដំណាំដូនតាខ្មែរនាពេលកន្លងមក។ ជាមួយគ្នានេះ ឯកឧត្តមគូសបញ្ជាក់ថា ពូជដំណាំដូនតាមានច្រើន បើសិនជាប្រជាកសិករចង់ផលិតពូជមួយណា គួរតែសហការជាមួយក្រសួងកសិកម្ម មន្ទីរកសិកម្មខេត្ត ដើម្បីតម្រង់ទិសលើការងារបច្ចេកទេស គុណភាព ពូជសុទ្ធ ព្រមទាំងលើកទឹកចិត្តដល់កសិករឱ្យផលិតបែបសរីរាង្គផងដែរ។

ទន្ទឹមនឹងនេះ ឯកឧត្តមបានឱ្យដឹងទៀតថា ក្រសួងបាននិងកំពុងអនុវត្ត នូវគោលនយោបាយដាក់ពង្រាយមន្ត្រីកសិកម្មឃុំ ដើម្បីជួយដោះស្រាយរាល់បញ្ហាប្រឈមនានារបស់កសិករ។ ដូច្នេះ បើកសិករចង់ផលិតតាមស្តង់ដារកសិកម្មសរីរាង្គ ឬចង់ផលិតសម្រាប់ការនាំចេញ អាចចុះឈ្មោះ ដោយសហការជាមួយមន្ត្រីកសិកម្មឃុំ ដែលនៅរង់ចាំធ្វើការសហការជាមួយកសិករគ្រប់ពេលវេលា ក្នុងការប្រឹក្សាបច្ចេកទេស សម្របសម្រួលលើការងារផ្សេងៗ ជាពិសេសបញ្ហាទីផ្សារជាដើម។

ចំណែក លោក ឡោ ប៊ុណ្ណា ប្រធានវិទ្យាស្ថាន CARDI បានបញ្ជាក់ថា មកដល់ពេលនេះ វិទ្យាស្ថានបានរក្សាពូជដំណាំរបស់ដូនតាខ្មែរបានរាប់ពាន់ប្រភេទ ហើយពូជដែលប្រជាកសិករកំពុងបារម្ភពីការបាត់បង់ ត្រូវបានមន្ត្រីជំនាញនៅវិទ្យាស្ថាន CARDI បន្តអភិរក្ស និងថែរក្សាដោយយកចិត្តទុកដាក់រហូតមក ដល់ពេលបច្ចុប្បន្ននេះ មិនឱ្យមានការបាត់បង់ឡើយ។ ស្របពេលជាមួយគ្នានេះ លោកក៏បានណែនាំដល់កសិករលើការសរសេរឈ្មោះពូជនីមួយៗឱ្យបានច្បាស់លាស់ ចៀសវាងសរសេរខុស និងនាំហៅខុស ហើយបន្តខុស ធ្វើឱ្យបាត់ឈ្មោះដើមរបស់ពូជផងដែរ។ លោកបន្ថែមថា ពូជជាតិសព្វថ្ងៃដែលកំពុងមានតម្រូវការទីផ្សារខ្ពស់ រួមមាន ពូជផ្ការំដួល ពូជសែនក្រអូប០១ ពូជស្រងែ និងពូជឆ្មារព្រំ ជាដើម។

ក្នុងកម្មវិធីនេះ កសិករមកពីសហគមន៍ខេត្តផ្សេងៗ បានសួរនាំពិភាក្សាយ៉ាងផុសផុលលើបច្ចេកទេសដាំដុះ ការធ្វើកសិកម្មតាមស្តង់ដារសរីរាង្គ និងការប្រើប្រាស់ជីថ្នាំតាមស្តង់ដារបច្ចេកទេសជាដើម។ រីឯ លោកស្រីយក់ តាំង ប្រធានសហគមន៍ភ្នំក្រោម ក៏បានសម្តែងការសប្បាយរីករាយដោយឃើញវត្តមានថ្នាក់ដឹកនាំក្រសួងចុះគាំទ្រ។ ករណីនេះ លោកស្រីសន្យានឹងបន្តសហការជាមួយក្រសួងកសិកម្ម រុក្ខាប្រមាញ់ និងនេសាទ ឱ្យកាន់តែស៊ីជម្រៅថែមទៀត៕