ឯកឧត្ដមរដ្ឋមន្រ្តី វេង សាខុន បានអញ្ជើញជាអធិបតីក្នុងពិធីបើកសិក្ខាសាលាពិគ្រោះយោបល់ថ្នាក់ជាតិស្តីពី “សេចក្តីព្រាងផែនការយុទ្ធសាស្រ្តគ្រប់គ្រង ព្រៃផ្តល់ផល”

ចេញ​ផ្សាយ​ ៣១ សីហា ២០១៨ 3893

នៅសណ្ឋាគារ Raffles Hotel Le Royal រាជធានីភ្នំពេញ នាព្រឹកថ្ងៃព្រហស្បតិ៍ ៤រោច ខែស្រាពណ៍ ឆ្នាំច ព.ស ២៥៦២ ត្រូវនឹងថ្ងៃទី៣០ ខែសីហា ឆ្នាំ២០១៨ ឯកឧត្ដម វេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ បានអញ្ជើញជាអធិបតីក្នុងពិធីបើកសិក្ខាសាលាពិគ្រោះយោបល់ថ្នាក់ជាតិស្តីពី “សេចក្តីព្រាងផែនការយុទ្ធសាស្រ្តគ្រប់គ្រង ព្រៃផ្តល់ផល”។ សិក្ខាសាលានេះត្រូវបានសហការរៀបចំឡើងដោយរដ្ឋបាលព្រៃឈើ ជាមួយអង្គការ UNDP និងមានការ ចូលរួមពីសំណាក់ឯកឧត្តមរដ្ឋលេខាធិការ អនុរដ្ឋលេខាធិការ ឯកឧត្តមតំណាងឲ្យអង្គការ UNDP អស់លោក លោក ស្រី និងដៃគូអភិវឌ្ឍជាច្រើនរូបទៀត។ ជារួមអង្គសិក្ខាសាលានេះមានគោលបំណងសំខាន់គឺ៖ ទី១-តាមដានពីវឌ្ឍនភាពនៃការរៀបចំឯកសារផែនការយុទ្ធសាស្រ្តគ្រប់គ្រងព្រៃផ្តល់ផលឆ្នាំ២០១៨-២០៣២ ទី២-ស្វែងរកធាតុចូលពីគ្រប់តួអង្គពាក់ព័ន្ធទាំងចំណេះដឹង បទពិសោធន៍ និងអនុសាសន៍ល្អៗរួចដាក់បញ្ចូលទៅក្នុងសេចក្តីព្រាងនេះប្រយោជន៍ដើម្បីកែសម្រួល ឲ្យបានកាន់តែល្អប្រសើរថែមទៀតទាំងជាលក្ខណៈច្បាប់ និងបច្ចេកទេសរួចដាក់ជូនក្រសួងកសិកម្ម រុក្ខាប្រមាញ់ និងនេសាទដើម្បីពិនិត្យនិងអនុម័ត។ នាឱកាសនេះ ឯកឧត្តមរដ្ឋមន្រ្តីបានថ្លែងអំណរគុណ កោតសរសើរ និងវាយតម្លៃខ្ពស់ចំពោះថ្នាក់ដឹកនាំរដ្ឋបាលព្រៃឈើ អង្កការ UNDP និងមន្រ្តីពាក់ព័ន្ធទាំងអស់ដែលបានខិតខំប្រឹងប្រែង សម្របសម្រួល និងឧបត្ថម្ភគ្រប់បែបយ៉ាងអស់ពីលទ្ធភាព និងរួមសហការគ្នាបានល្អធ្វើឲ្យអង្គសិក្ខាសាលាដ៏មានសារៈសំខាន់ ប្រព្រឹត្តបានយ៉ាងល្អប្រសើរនាថ្ងៃនេះ។
នាឱកាសនេះ ឯកឧត្តមរដ្ឋមន្រ្តីបានលើយកចំណុចសំខាន់ៗនៃវិស័យព្រៃឈើមកបញ្ជាក់ជូនអង្គសិក្ខាសាលាជ្រាបដោយសង្ខេបជាបន្តបន្ទាប់ថា៖ ព្រៃឈើបានដើរតួនាទីយ៉ាងសំខាន់ក្នុងការការពារថែរក្សាលំនឹងបរិស្ថាន ការកាត់បន្ថយការប្រែប្រួលអាកាសធាតុ ចូលរួមចំណែកដល់ការអភិវឌ្ឍសេដ្ឋកិច្ចជាតិ និងកាត់បន្ថយភាពក្រីក្រ។ យល់ឃើញពីអត្ថប្រយោជន៍នៃធនធានព្រៃឈើជាតិដែលមិនអាចកាត់ថ្លែបាន រាជរដ្ឋាភិបាលបានប្តេជ្ញាយ៉ាងម៉ឺងម៉ាត់បន្តធ្វើសកម្មភាពកំណែទម្រង់ស៊ីជម្រៅលើវិស័យព្រៃឈើតាមយៈការដាក់ចេញនូវគោលនយោបាយ និងបទបញ្ជាជាបន្តបន្ទាប់ក្នុងគោលបំណងសំខាន់គឺ៖ ទី១.ការគ្រប់គ្រងធនធានព្រៃឈើប្រកបដោយនិរន្តរភាពតាមរយៈការត្រួតពិនិត្យលើការធ្វើអាជីវកម្មព្រៃឈើ ការថែរក្សាព្រៃបម្រុងទុកសម្រាប់ការប្រើប្រាស់ក្នុងស្រុក និងរក្សាបាននូវតំបន់ដីសើមដែលជាដែនជម្រកមច្ឆជាតិ ទី២.ការពារធនធានធម្មជាតិ ជីវចម្រុះ និងប្រភេទរុក្ខជាតិ និងសត្វព្រៃដែលរកកលជិតផុតពូជ និងទី៣.អភិវឌ្ឍសហគមន៍ព្រៃឈើប្រកបដោយតម្លាភាព និរន្តរភាព តាមរយៈការអភិវឌ្ឍនៅនឹងកន្លែងដោយប្រជាសហគមន៍នៅមូលដ្ឋានផ្ទាល់ សមស្របទៅតាមសក្តានុពលនៅតាមភូមិសាស្រ្តនីមួយៗ ជាពិសេសការអភិវឌ្ឍសហគមន៍ទេសចរណ៍ធម្មជាតិ ដើម្បីបង្កើតការងារ បង្កើនប្រាក់ចំណូល កាត់បន្ថយការពឹងផ្អែកទាំងស្រុងលើផលនិងអនុផលព្រៃឈើ ការកាប់ទន្ទ្រានរានដីព្រៃធ្វើចំការ រួចឈានទៅធ្វើការកាត់បន្ថយភាពក្រីក្រ និងចំណាកស្រុក។ ទោះជាយ៉ាងណា វិស័យព្រៃឈើបាននិងកំពុងប្រឈមជាមួយបញ្ហាធំៗជាច្រើនដូចជាការថយចុះទំហំផ្ទៃដីព្រៃឈើដែលបណ្តាលមកពីកំណើនតម្រូវការដីកសិកម្ម ស្របទៅនឹងកំណើនប្រជាជន ការរីកលូតលាស់ផ្នែកសេដ្ឋកិច្ច ឧស្សាហកម្ម ទេសចរណ៍ កសិកម្មខ្នាតតូចនិងមធ្យម ការកាប់ព្រៃទន្ទ្រានយកដីធ្វើជាកម្មសិទ្ធិខុសច្បាប់ ការកំណត់ព្រំរវាងតំបន់ព្រៃឈើ និងព្រៃផ្តល់ផលនៅមិនទាន់ច្បាស់លាស់ ប្រសិទ្ធភាពនៃការអនុវត្តច្បាប់ស្តីពីព្រៃឈើនៅមានកម្រិត និងគម្លាតធំរវាងការផ្គត់ផ្គង់ និងការប្រើប្រាស់ឈើ ផលិតផលឈើ និងអនុផលព្រៃឈើជាដើម។ល។
ផ្តើមចេញពីបញ្ហាទាំងអស់នេះ រាជរដ្ឋាភិបាលដែលមានក្រសួងកសិកម្ម រុក្ខាប្រមាញ់ និងនេសាទជាសេនាធិការបានដាក់ចេញនូវកម្មវិធីកែទម្រង់វិស័យព្រៃឈើ ដែលក្នុងនោះមានផែនការសកម្មភាពសំខាន់ៗជាច្រើនរួមមានការពង្រឹងការអនុវត្តច្បាប់ស្តីពីព្រៃឈើ ការបង្កើតនិងពង្រឹងសហគមន៍ព្រៃឈើ ការអនុវត្តវិធានការយ៉ាងម៉ឺងមាត់ក្នុងការគ្រប់គ្រងនិងទប់ស្កាត់បទល្មើសព្រៃឈើ ការពង្រឹងប្រសិទ្ធភាពគ្រប់គ្រងព្រៃបម្រុងទុក ការបង្កើតតំបន់ព្រៃសម្រាប់អភិរក្សធនធានពន្ធុរុក្ខជាតិ និងសត្វព្រៃ ព្រមទាំងបោះបង្គោលព្រំប្រទល់ព្រៃបម្រុងទុកអចិន្ត្រៃយ៍ ការបណ្តុះកូនឈើនៅតាមស្ថានីយផ្សព្វផ្សាយ ការដាំកូនឈើនៅតំបន់ស្ដារព្រៃឈើឡើងវិញ និងទីតាំងផ្សេងៗ ពិសេសការរៀបចំពិធី “រុក្ខទិវា” ជារៀងរាល់ឆ្នាំដើម្បីបំផុសចលនាមហាជនទាំងអស់ឱ្យចូលរួមដាំដើមឈើ ថែរក្សា ការពារធនធានព្រៃឈើ និងជីវចម្រុះដែលជាមរតកដ៏មានតម្លៃសម្រាប់មនុស្សជាតិទាំងមូល។ ពិតណាស់សមិទ្ធផលដែលសម្រេចបានគឺជាភាពជោគជ័យនៃការអនុវត្តគោលនយោបាយនិងយុទ្ធសាស្រ្តរបស់រាជរដ្ឋាភិបាលដែលមានសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី។ ក្រៅពីការងារបច្ចេកទេស ក្រសួងបាននិងកំពុងខិតខំប្រឹងប្រែងរៀបចំលិខិតបទដ្ឋានគតិយុត្ត និងផែនការជាតិនានាដែលគាំទ្រដល់ការគ្រប់គ្រងព្រៃឈើប្រកបដោយចីរភាពមានជាអាទិ៍៖ -ផែនការយុទ្ធសាស្រ្តអភិវឌ្ឍន៍ជាតិ(២០១៤-២០១៨) -គោលដៅអភិវឌ្ឍន៍វិស័យព្រៃឈើប្រកបដោយចីរភាព (២០១៧-២០៣០) -ផែនការយុទ្ធសាស្រ្តអភិវឌ្ឍន៍វិស័យកសិកម្ម(២០១៤-២០១៨) -យុទ្ធសាស្រ្តរេដបូកជាតិ(២០១៧-២០២៦) -ការពិនិត្យឡើងវិញនូវកម្មវិធីព្រៃឈើជាតិ(២០០៩-២០២៩) រួមទាំងកម្មវិធីសកម្មភាពជាតិដើម្បីប្រយុទ្ធប្រឆាំងនឹងការធ្លាក់ចុះគុណភាពដីឆ្នាំ២០១៨-២០២៧ ផងដែរ។
ដោយឡែក សេចក្តីព្រាងផែនការយុទ្ធសាស្រ្តគ្រប់គ្រងព្រៃផ្តល់ផលដែលយើងកំពុងរៀបចំធ្វើនាពេលនេះគឺក្នុងគោលបំណងបង្កើននិងពង្រឹងសមត្ថភាពគ្រប់គ្រងព្រៃផ្តល់ផលឲ្យមាននិរន្តរភាពនាពេលអនាគតដើម្បីរួមចំណែកកាត់បន្ថយភាពក្រីក្រ បង្កើនកម្រិតជីវភាពរបស់ប្រជាសហគមន៍ រក្សាកំណើនសេដ្ឋកិច្ច និងអេកូឡូស៊ីរបស់ព្រៃផ្តល់ផល ពង្រីកជំនួញផលិតផលព្រៃឈើដោយឈរលើគោលការណ៍ច្បាប់ទាំងថ្នាក់ជាតិនិងអន្តរជាតិ ពង្រឹងអភិបាលកិច្ចព្រៃឈើ អភិវឌ្ឍសមត្ថភាពស្ថាប័ននិងធនធានមនុស្ស ជំរុញឲ្យមានការចូលរួមពីសហគមន៍ គាំទ្រការគ្រប់គ្រងព្រៃឈើដោយនិរន្តរភាព ពង្រឹងកិច្ចសហការជាតិ អន្តរជាតិ ដៃគូអភិវឌ្ឍ អាជ្ញាធរមូលដ្ឋាន និងកងកំលាំងប្រដាប់អាវុធគ្រប់លំដាប់ថ្នាក់ ។
ឆ្លៀតយកឱកាសដ៏មានតម្លៃនេះ ឯកឧត្តមរដ្ឋមន្រ្តីបានផ្តាំផ្ញើឲ្យសមាជិក សមាជិកានៃអង្គសិក្ខាសាលាទាំងមូលយកអស់ប្រាជ្ញាស្មារតី ចំណេះដឹងនិងបទពិសោធន៍ល្អៗដើម្បីធ្វើការពិនិត្យឲ្យបានល្អិតល្អន់ និងស៊ីជម្រៅលើធាតុចូលសំខាន់ៗដែលបានលើកឡើងក្នុងសេចក្តីព្រាងលើកទី៥ស្តីពីផែនការយុទ្ធសាស្រ្តគ្រប់គ្រងព្រៃផ្តល់ផលនេះ និងជាពិសេសចំណុចសំខាន់ៗដែលត្រូវពិនិត្យពិចារណា និងផ្តល់យោបល់ឲ្យបានទូលំទូលាយស៊ីជម្រៅជាងគេនោះគឺ៖ ទី១-ភាពស្របគ្នាទៅនឹង គោលនយោបាយព្រៃឈើជាតិនិងបទប្បញ្ញត្តិនានារបស់រាជរដ្ឋាភិបាលកម្ពុជា ទី២-ការលើកឡើងនូវគោលដៅយុទ្ធសាស្រ្ត និងសកម្មភាពរួមទាំងគម្រោងហិរញ្ញប្បទានក្នុងការដោះស្រាយឧបសគ្គដែលកើតឡើងក្នុងការគ្រប់គ្រងព្រៃផ្តល់ផល ទី៣-សមត្ថភាពនិងធនធានរបស់ស្ថាប័នក្នុងការអនុវត្តផែនការយុទ្ធសាស្រ្តឲ្យបានសមស្របតាមនីតិវិធី និងទី៤-បញ្ហាប្រឈមនានាដែលអាចជាឧបសគ្គក្នុងការអនុវត្តផែនការយុទ្ធសាស្រ្តនេះ។