ឯកឧត្តមរដ្ឋមន្ត្រី និងអភិបាលរងខេត្ត បានបន្តមកភូមិតាជ័យ ឃុំកំពង់ចម្លង ស្រុកស្វាយជ្រុំ មកពិនិត្យការភ្ញាស់ស៊ុតមាន់របស់បង តូច សេង

ចេញ​ផ្សាយ​ ២៦ សីហា ២០១៩ 2921

-កម្មវិធីទី៤÷
ចេញពីក្រុងស្វាយរៀង ឯកឧត្តមរដ្ឋមន្ត្រី និងអភិបាលរងខេត្ត បានបន្តមកភូមិតាជ័យ ឃុំកំពង់ចម្លង ស្រុកស្វាយជ្រុំ មកពិនិត្យការភ្ញាស់ស៊ុតមាន់របស់បង តូច សេង។ បង សេង បានឲ្យដឹងថា គ្រួសារគាត់ដំបូងឡើយបានទទួលមេមាន់ចំនួន ២៨ក្បាល និងឈ្មោល៤ក្បាលពីគម្រោងឈ្មោះថា "ការជំរុញកំណើនវិស័យកសិកម្មប្រកបដោយចីរភាព និងបរិយាប័ន្នលើអនុវិស័យជលផល និងផលិតកម្មសត្វ" ដែលទទួលបានថវិកាពីសហភាពអឺរ៉ុប។ ដោយទទួលបានការបណ្តុះបណ្តាលបច្ចេកទេសចិញ្ចឹម និងភ្ញាស់ពីមន្រ្តីជំនាញនៃអគ្គនាយកដ្ឋានសុខភាពសត្វ និងផលិតកម្មសត្វ រួមផ្សំជាមួយការខិតខំប្រឹងប្រែងជាបណ្តើរៗកន្លែងភ្ញាស់ស៊ុតមាន់របស់លោកមានការវិវឌ្ឍន៍រីកចម្រើននាថ្ងៃនេះ។ ជាក់ស្តែងក្នុង១ខែ លោកអាចបញ្ចេញកូនមាន់ឲ្យទីផ្សារពី ៤-៥ពាន់ក្បាល ក្នុង១ក្បាល តម្លៃ៥ពាន់រៀល ហើយកំពុងតែពង្រីកបន្ថែមដើម្បីឆ្លើយតបតាមតម្រូវការទីផ្សារ។ និយាយក្នុងទឹកចិត្តសប្បាយរីករាយថា ដោយសារគម្រោងនេះធ្វើឲ្យគាត់មានអាជីពមួយស្ថិតស្ថេរ រឹងមាំ ដែលអាចរកចំណូលបានជាង ២ម៉ឺនដុល្លារក្នុង១ឆ្នាំ។ ដោយសារចំណូលដ៏ខ្ពស់នេះ ធ្វើឲ្យគ្រួសារលោកសេងមានជីវភាពធូរធារ ជួបជុំកូនចៅ មានការសិក្សា និងមានសុភមង្គលក្នុងគ្រួសារ។

ឯកឧត្តមរដ្ឋមន្ត្រី ក្នុងនាមឯកឧត្តមអភិបាលខេត្តបានកោតសរសើរពីឆន្ទះរបស់បង តូច សេង ដែលឆ្លៀតយកមេមាន់ ២៨ក្បាល ឈ្មោល ៤ក្បាល ពីជំនួយរបស់គម្រោងមកធ្វើជាដើមទុនក្នុងការកសាងសេដ្ឋកិច្ចគ្រួសារយ៉ាងល្អប្រសើរ។ លោកបន្តថាចំណូលជាង ២ម៉ឺនដុល្លារក្នុងមួយឆ្នាំ វាពិបាកទទួលបានសម្រាប់គ្រួសារមួយចំនួននាពេលបច្ចុប្បន្ន ប៉ុន្តែប្រសិនបើមានការចូលរួម និងគាំទ្រពីគ្រប់ភាគីពាក់ព័ន្ធ ពិសេសវិស័យឯកជន នោះចក្ខុវិស័យរបស់រាជរដ្ឋាភិបាលនាឆ្នាំ២០៣០ និង២០៥០ ពិតជាអាចសម្រេចបានជាប្រាកដ។

ចំពោះការងារបច្ចេកទេស លោកសុំឲ្យអគ្គនាយកដ្ឋានសុខភាពសត្វ និងផលតកម្មសត្វ សហការជាមួយមន្ទីរបន្តជួយបំពេញបន្ថែមនូវចំណុចខ្វះខាត ធ្វើយ៉ាងណាឲ្យផលិតកម្មភ្ញាស់ស៊ុតមាន់របស់លោកសេងបន្តរីកចម្រើនថែមទៀត។