ឯកឧត្តមរដ្ឋលេខាធិការ សេន សុវណ្ណ អញ្ជើញចុះពិនិត្យកសិដ្ឋានចិញ្ចឹមនិងបង្កាត់ពូជសត្វស្វាក្តាម និងមន្ទីរពិសោធន៍សុខភាពសត្វរបស់ក្រុមហ៊ុនចំនួន៣ក្នុងខេត្តចំនួន៣

ចេញ​ផ្សាយ​ ២២ មីនា ២០២៥ 3935

នៅថ្ងៃទី១៨ ដល់២០ ខែមីនា ឆ្នាំ២០២៥ ឯកឧត្តម សេន សុវណ្ណ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ រួមដំណើរដោយ ឯកឧត្តម ស្រី វុឌ្ឍី អនុរដ្ឋលេខាធិការ លោក ឈាន ដានី អនុប្រធានរដ្ឋបាលព្រៃឈើ និងសហការី បានអញ្ជើញចុះពិនិត្យកសិដ្ឋានចិញ្ចឹមនិងបង្កាត់ពូជសត្វស្វាក្តាម និងមន្ទីរពិសោធន៍សុខភាពសត្វរបស់ក្រុមហ៊ុន KF Cambodia នៅខេត្តកំពង់ធំ ក្រុមហ៊ុន VANNY Bio-Research នៅខេត្តពោធិ៍សាត់ និងក្រុមហ៊ុន Orient Cam នៅខេត្តកំពង់ឆ្នាំង។

ឯកឧត្តមរដ្ឋលេខាធិការ និងក្រុមការងារ បានអញ្ជើញចុះពិនិត្យដោយផ្ទាល់ដល់កសិដ្ឋានចិញ្ចឹម និងបង្កាត់ពូជស្វាក្តាមទាំង៣ក្រុមហ៊ុន សម្រាប់នាំចេញ ព្រមទាំងសកម្មភាពទាំងឡាយដែលកំពុងប្រតិបត្តិការក្នុងកសិដ្ឋាន ការផ្តល់ចំណីសត្វ ការថែទាំ ការធ្វើ ចត្តាឡីស័ក្ត ការកសាងនូវហេដ្ឋារចនាសម្ព័ន្ធកសិដ្ឋាន និងប្រសិទ្ធភាពនៃការគ្រប់គ្រងកសិដ្ឋានជាដើម។ ទន្ទឹមនឹងនេះ អ្នកគ្រប់គ្រងកសិដ្ឋាន បានបង្ហាញពីកិច្ចខិតខំប្រឹងប្រែងរបស់ក្រុមហ៊ុនក្នុងការអនុវត្តច្បាប់ និងបទដ្ឋានគតិយុត្ត ក៏ដូចជាការគោរពតាមគោលការណ៍សាយតេស ដើម្បីធានានិរន្តរភាពរបស់ក្រុមហ៊ុនក្នុងពេលបច្ចុប្បន្ន និងបន្តទៅថ្ងៃអនាគត។

ឯកឧត្តមរដ្ឋលេខាធិការបានគូសបញ្ជាក់ថា សត្វស្វាក្តាម គឺជាធនធានដ៏មានតម្លៃបំផុតសម្រាប់ការស្រាវជ្រាវ ឱសថ ដើម្បីជួយដល់មនុស្សរាប់លាននាក់លើពិភពលោក ពិសេសក្នុងពេលឆ្លងរាលដាលនៃជំងឺកូវីដ-១៩។ ជាមួយគ្នានេះ ឯកឧត្តមក៏បានណែនាំដល់ម្ចាស់កសិដ្ឋានបន្តដំណើរការចិញ្ចឹម និងបង្កាត់ពូជសត្វស្វាក្តាមនេះឱ្យបានល្អបន្ថែមទៀត ពិសេសការគ្រប់គ្រងកសិដ្ឋានប្រកបដោយប្រសិទ្ធភាព និងនិរន្តរភាព៕