គោលបំណងនៃសិក្ខាសាលា គឺដើម្បីពង្រឹងសមត្ថភាពមន្រ្តីថ្នាក់ខេត្តក្នុងការអនុវត្តការងារឲ្យកាន់តែមានប្រសិទ្ធភាព តាមរយៈការពង្រឹងចំណេះដឹងទាក់ទងនឹងការប្រើប្រាស់ឧបករណ៍បច្ចេកវិទ្យាព័ត៌មានវិទ្យាក្នុងវិស័យកសិកម្ម រួមជាមួយនឹងការណែនាំអំពីការប្រើប្រាស់ និងបច្ចុប្បន្នភាពចង្កោមគេហទំព័ររបស់ក្រសួងកសិកម្ម រុក្ខាប្រមាញ់ និងនេសាទ ដែលបានចូលរួមចំណែកដល់ការផ្សព្វផ្សាយពីសកម្មភាពរបស់ថ្នាក់ដឹកនាំក្រសួង មន្ទីរ និងបានផ្សព្វផ្សាយព័ត៌មានកសិកម្ម និងឯកសារកសិកម្មឲ្យកាន់តែទូលំទូលាយ។ ក្នុងនោះផងដែរ គួររំលឹកផងដែរ នៅដើមឆ្នាំ២០១៩ មជ្ឈមណ្ឌលព័ត៌មាន និងឯកសារកសិកម្ម បានរៀបចំសិក្ខាសាលាបានចំនួន១វគ្គ នៅទីរួមខេត្តសៀមរាបនេះផងដែរ ដែលមានការអញ្ជើញចូលរួមពីមន្ទីរកសិកម្ម រុក្ខាប្រមាញ់ និងនេសាទខេត្តចំនួន១១ មានដូចជា៖ ខេត្តស្វាយរៀង កណ្តាល កំពង់ចាម កំពង់ឆ្នាំង ត្បូងឃ្មុំ កំពត ក្រចេះ ស្ទឹងត្រែង រតនគិរី មណ្ឌលគិរី សៀមរាប។

ក្នុងឱកាសថ្ងៃនេះផងដែរ មជ្ឈមណ្ឌលព័ត៌មាន និងឯកសារកសិកម្ម រៀបចំសិក្ខាសាលានេះជាលើកទី២ដោយមានការអញ្ជើញចូលរួមពីមន្ទីរកសិកម្ម រុក្ខាប្រមាញ់ និងនេសាទរាជធានី-ខេត្តចំនួន០៧ខេត្តខាងលើ ដើម្បីផ្តល់ចំណេះដឹងថ្មីបន្ថែមទៀត ដោយក្នុងនោះរួមមាន៖
-គន្លឹះក្នុងការការពារប្រព័ន្ធព័ត៌មាន ដោយបានផ្តោតសំខាន់លើហានិភ័យនៃការប្រើប្រាស់បណ្តាញ Wifi សាធារណៈ និងវិធានការការងារ និងការប្រើប្រាស់អ៊ីនធើណែតប្រកបដោយសុវតិ្ថភាព
-ការប្រើប្រាស់បច្ចុប្បន្ននៃចង្កោមគេហទំព័ររបស់ក្រសួងកសិកម្ម រុក្ខាប្រមាញ់ និងនេសាទ ដោយក្នុងនោះបានបង្ហាញពីមុខងារសំខាន់ៗនៃគេហទំព័ររបស់ក្រសួង កម្មវិធីរបស់ក្រសួងកសិកម្ម រុក្ខាប្រមាញ់ និងនេសាទ ដែលប្រើលើទូរសព្ទដៃ និងបានបង្ហាញពីមុខងារថ្មីៗផ្សេងៗបន្ថែមទៀត
-ការប្រើប្រាស់បណ្ណាល័យកសិកម្មអេឡិចត្រូនិក
-ការផលិតវីដេអូ