ព័ត៌មានផ្សេងៗទៀត
គំនិតច្នៃប្រឌិតនឹងធ្វើឱ្យមូលដ្ឋានមានការកែប្រែប្រួល
ចេញផ្សាយ ២២ មករា ២០១៨ 4725
ឯកឧត្តមបណ្ឌិត ច័ន្ទ សារុន រដ្ឋមន្ត្រីក្រសួងកសិកម្ម បានជូនជាយោបល់ដល់ប្រជាពលរដ្ឋថា គំនិតច្នៃប្រឌិតពុំមានព្រំដែនទេ។ កាលណាមានការច្នៃប្រឌិត បង្កើតអ្វីដែលថ្មីនោះ នឹងធ្វើឱ្យទទួលបានប្រយោជន៏ច្រើន ពីសកម្មភាពនេះ ។
នៅចំពោះមុខលោកគ្រូ អ្នកគ្រូសិស្សានុសិស្ស ប្រជាពលរដ្ឋជាច្រើនរយនាក់ នៅស្រុកត្រាំកក់ ឯកឧត្ដមបណ្ឌិតច័ន្ទ សារុន រដ្ឋមន្ដ្រីក្រសួងកសិកម្ម រុក្ខាប្រមាញ់ និងនេសាទ បានមានប្រសាសន៏ថា ការពង្រឹងគុណភាពសិក្សា គឺជាអនាគតនៃកម្ពុជា ហើយមួយផ្នែកធំដោយផ្ទាល់ គឺលោកគ្រូ អ្នកគ្រូ ត្រូវទទួលខុស នៅក្នុងរឿងនេះជាសំខាន់។ យើងជៀសវាងការអប់រំដោយទូលំទូលាយ។ ចំណេះដឹងមានព្រំដែន ប៉ុន្ដែគំនិតច្នៃប្រឌិត ពុំមានព្រំដែនទេ គឺវាស្ថិតនៅជុំវិញពិភពលោក។ គំនិតច្នៃប្រឌិត បានបង្កើតអ្វីថ្មីៗច្រើន សម្រាប់ពេលនេះ និងអនាគត។
ឯកឧត្ដមរដ្ឋមន្ដ្រី បានបន្ដទៀតថា បើចង់មានគំនិតច្នៃប្រឌិត លុះតែខំអាន។ បណ្ណាល័យ គឺជាឃ្លាំងសម្រាប់ការអាន។ ឯកឧត្ដម បានពន្យល់ពីសារសំខាន់ នៃការច្នៃប្រឌិត វានឹងមានប្រយោជន៏ណាស់ សម្រាប់ជីវភាពប្រចាំថ្ងៃរបស់កសិករ នៅមូលដ្ឋាន ពិសេសសម្រាប់ចំណូល ដល់គ្រួសារបើយើង ប្រើប្រាស់នូវការច្នៃប្រឌិតទាំងនេះ ។
ឯកឧត្ដម បានរំលឹកផងដែរ ដល់មន្ដ្រីក្រុមការងាររបស់ឯកឧត្ដម ឱ្យសំលឹងទៅរកគ្រូចូលនិវត្ដន៏ ដើម្បីចងក្រង និងឱ្យក្រុមនេះ ជួយដល់វិស័យអប់រំនៅមូលដ្ឋាន។ ឯកឧត្ដម បានបញ្ជាក់ផងដែរអំពីតួនាទី របស់នាយកសាលាដែលមានឥទ្ធិពល ទៅដល់ការរីកចម្រើន របស់សាលា ដែលទាំងនេះសុទ្ធសឹងតែទាក់ទង ទៅនឹងការច្នៃប្រឌិតផងដែរ ។
គួរបញ្ជាក់ថា ការលើកឡើងខាងលើ ខណៈដែលឯកឧត្ដមរដ្ឋមន្ដ្រី អញ្ជើញចូលរួមប្រគល់តុសិស្សចំនួន២០០ និងតុគ្រូចំនួន៧ជូនដល់សាលាចំនួន៣ ដែលក្នុងនោះមានវិទ្យាល័យអង្គរកា សាលាបឋមសិក្សា និងអនុវិទ្យាល័យត្នោតជុំកាលពីថ្មីៗនេះ។ ជាមួយនឹងការផ្ដល់តុសិស្សនេះ ក៏មានការជូនសៀវភៅបច្ចេកទេសកសិកម្មចំនួន១២មុខស្មើនឹង១.០៨០ក្បាលជូនដល់សាលាទាំងនេះដែរ ៕
