អធិការដ្ឋានរដ្ឋបាលជលផលទន្លេមេគង្គ ខណ្ឌរដ្ឋបាលជលផល ខេត្តត្បូងឃ្មុំ សហការជាមួយ សមត្ថកិច្ចពាក់ព័ន្ធ ចុះល្បាត ត្រួតពិនិត្យ ការពារព្រៃលិចទឹក នៅតាមចំណុចទីតាំង ៤កន្លែង ក្នុងភូមិសាស្ត្រស្រុកក្រូចឆ្មារ ខេត្តត្បូងឃ្មុំ

ចេញ​ផ្សាយ​ ៣ មីនា ២០២៤ 3143

នៅថ្ងៃទី០១ ខែមីនា ឆ្នាំ២០២៤នេះ អធិការដ្ឋានរដ្ឋបាលជលផលទន្លេមេគង្គ ខណ្ឌរដ្ឋបាលជលផលខេត្តត្បូងឃ្មុំ សហការជាមួយ សមត្ថកិច្ចពាក់ព័ន្ធ ចុះល្បាតត្រួតពិនិត្យការពារព្រៃលិចទឹក នៅតាមចំណុចទីតាំង ៤កន្លែង ក្នុងភូមិសាស្ត្រស្រុកក្រូចឆ្មារ ខេត្តត្បូងឃ្មុំ។

ប្រតិបត្តិការចុះត្រួតពិនិត្យ ល្បាតការងារនោះ ដឹកនាំដោយ លោក អៀម ម៉ាយ៉ុងរី នាយខណ្ឌរដ្ឋបាលជលផលខេត្តត្បូងឃ្មុំ និងកញ្ញា យីន ចាន់ធៀង នាយរងផ្នែករដ្ឋបាលជលផល សហការ ជាមួយកម្លាំងប្រដាប់អាវុធទាំងបីឈរជើងការពារព្រៃលិចទឹក នៅតាម ចំណុចទីតាំងទាំង ៤កន្លែង ក្នុងភូមិសាស្ត្រស្រុកក្រូចឆ្មារ ដែលមានដូចខាងក្រោម៖

ទី១. ចំណុចក្របីក្រៀក ស្ថិតនៅឃុំឈូក (ចុះល្បាតចំនួន២លើក) នៅចំណុចខាងកើតភូមិឈូក ឃុំឈូក សមត្ថកិច្ចបានប្រទះឃើញមានស្លាកស្នាមកាប់ព្រៃឫស្សីថ្មីៗ មានទំហំប្រមាណ១,៥០អា កម្លាំងសមត្ថកិច្ចនឹងចាត់វិធានការស្រាវជ្រាវបន្ត។

ទី២. ចំណុចចំការចិន ស្ថិតនៅឃុំប៉ើស២(ចុះល្បាត ចំនួន១លើក) សមត្ថកិច្ចពុំបានប្រទះឃើញ មានការកាប់ឈូសឆាយថ្មីនោះទេ។

ទី៣.ចំណុចជ្រោយជលា ស្ថិតនៅឃុំទ្រា (ល្បាតចំនួន១លើក) សមត្ថកិច្ចពុំប្រទះឃើញមានការកាប់ឈូសឆាយថ្មីៗនោះទេ។

ទី៤. ចំណុចពោះអំបែងស្ថិតនៅ ឃុំទួលស្នួល(ល្បាតចំនួន១លើក) ពុំប្រទះឃើញមានការឈូសឆាយថ្មីនោះទេ៕