ព័ត៌មានផ្សេងៗទៀត
ឯកឧត្តមរដ្ឋលេខាធិការ ឃុន សាវឿន អញ្ជើញចូលរួមក្នុងពិធីប្រគល់លិខិតថ្លែងអំណរគុណជូនដល់ក្រុមហ៊ុន និងសប្បុរសជននានា ដែលបានជួយឧបត្ថម្ភរៀបចំកសិដ្ឋានបន្លែកាយឬទ្ធិ នៅខេត្តសៀមរាប
ចេញផ្សាយ ១១ មករា ២០២៦ 3157
នៅថ្ងៃទី១០ ខែមករា ឆ្នាំ២០២៦ ឯកឧត្តម ឃុន សាវឿន រដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ និងឯកឧត្ដម ឃឹម ហ្វីណង់ អនុរដ្ឋលេខាធិការ បានអញ្ជើញចូលរួមក្នុងពិធីប្រគល់លិខិតថ្លែងអំណរគុណជូនដល់ក្រុមហ៊ុន និងសប្បុរសជន នានាដែលបានជួយឧបត្ថម្ភរៀបចំកសិដ្ឋានបន្លែកាយឬទ្ធិ នៅខេត្តសៀមរាប។
ពិធីនេះរៀបចំនៅកសិដ្ឋានបន្លែកាយឬទ្ធិ ស្ថិតនៅឃុំបាគង (ផ្លូវបេតុងជិតស្ពានក្អែក) មានការចូលរួមពី ឯកឧត្តម ឈឿង គីរីរ័ត្ន ទីប្រឹក្សាក្រសួង លោក ឌី រ៉ាដូ អភិបាលរងខេត្ត លោកប្រធានមន្ទីរកសិកម្មខេត្តសៀមរាប លោកស្រីប្រធានមន្ទីរកិច្ចការនារី និងជាប្រធានសមាគមកាយឫទ្ធិនារីកម្ពុជា សាខាខេត្តសៀមរាប លោកអភិបាលស្រុកប្រាសាទបាគង និងក្រុមហ៊ុនវិស័យឯកជន និងសប្បុរសជននានា សរុបអ្នកចូលរួមប្រមាណ១០០នាក់។
សូមបញ្ជាក់ថា ក្រុមហ៊ុនដែលជួយគាំទ្រឧបត្ថម្ភរួមមាន៖ ក្រុមហ៊ុនជីក្បាលក្របី ក្រុមហ៊ុនជីត្រីកោណ ក្រុមហ៊ុនម៉ាលីសានគ្រុប ក្រុមហ៊ុន EGE ក្រុមហ៊ុនវិរៈប៊ុនថាំ ក្រុមហ៊ុនទុយោជីបម៉ុង។ ចំណែកកសិដ្ឋានបន្លែរបស់សមាគមកាយឫទ្ធិនារីកម្ពុជា សាខាខេត្តសៀមរាប ដាំដុះលើផ្ទៃដីទំហំ ២ហិកតា ដែលទទួលបានការគាំទ្របច្ចេកទេសពីក្រសួងកសិកម្ម រដ្ឋបាលខេត្តសៀមរាប និងរដ្ឋបាលស្រុកប្រាសាទបាគង បានរៀបចំចប់សព្វគ្រប់ទាំងស្រុង និងធ្វើការផ្ទេរជូនដល់សមាគមកាយឫទ្ធិនារី សាខាខេត្តសៀមរាប ដើម្បីគ្រប់គ្រងបន្ត ហើយក្រសួងកសិកម្មនឹងនៅបន្តគាំទ្រដោយមានមន្ត្រីកសិកម្មឃុំ និងមន្ត្រីជំនាញជួយចុះពិនិត្យជាប្រចាំផងដែរ៕
