ថ្នាក់ដឹកនាំក្រសួងកសិកម្ម អញ្ជើញចូលរួមពិព័រណ៌ការវិនិយោគឧស្សាហកម្មកែច្នៃផលិតផលកសិកម្ម និងពាណិជ្ជកម្មចិន និងសន្និសីទលើកកម្ពស់កិច្ចសហប្រតិបត្តិការកសិកម្មចិន-អាស៊ាន នៅសារធារណរដ្ឋប្រជាមានិតចិន

ចេញ​ផ្សាយ​ ២៤ កញ្ញា ២០២៦ 2187

នាថ្ងៃទី២២​ និងទី២៣ ខែកញ្ញា ឆ្នាំ២០២៦ ប្រតិភូក្រសួងកសិកម្ម រុក្ខាប្រមាញ់ និងនេសាទ ដឹកនាំដោយ ឯកឧត្តម គី ច័ន្ទរំដួល អនុរដ្ឋលេខាធិការទទួលបន្ទុកវិស័យឯកជន​ និងអង្គការសង្គមសុីវិល បានអញ្ជេីញចូលរួមពិព័រណ៌ការវិនិយោគឧស្សាហកម្មកែច្នៃផលិតផលកសិកម្ម និងពាណិជ្ជកម្មចិន និងសន្និសីទលើកកម្ពស់កិច្ចសហប្រតិបត្តិការកសិកម្មចិន-អាស៊ាន ក្នុងគោលបំណងជំរុញលើកកម្ពស់ការនាំចេញផលិតផលកសិកម្មសក្ដានុពល និងការកែច្នៃកសិ-ស្បៀងអាហារ នៅទីក្រុងជូម៉ាទៀន ខេត្តហឺណាន សារធារណរដ្ឋប្រជាមានិតចិន។
ថ្លែងក្នុងឱកាសនៃសន្និសីទលើកកម្ពស់កិច្ចសហប្រតិបត្តិការកសិកម្មចិន-អាស៊ាន ឯកឧត្តម​ គី​ ច័ន្ទរំដួល បានលើកឡេីងអំពីវឌ្ឍនភាពគួរឲ្យកត់សម្គាល់របស់វិស័យកសិកម្មកម្ពុជា ដែលបានចុះហត្ថលេខាលើពិធីសារនាំចេញរវាងក្រសួងកសិកម្ម រុក្ខាប្រមាញ់ និងនេសាទកម្ពុជា ជាមួយនឹងអគ្គរដ្ឋបាលគយចិន ចំនួន១៩មុខ គិតត្រឹមឆ្នាំ២០២៦នេះ រួមមាន៖ អង្ករ ចេក មៀន ស្វាយ ធុរេន ដំឡូងមី ស្វាយចន្ទី ម្រេច ទឹកមាត់ត្រចៀកកាំ ផលិតផលជលផល និងកសិផលសក្តានុពលជាច្រេីនទៀត។ 
ជាមួយគ្នានេះដែរ ឯកឧត្តម​ គី​ ច័ន្ទរំដួល​ បានជម្រាបជូនអង្គពិធីនូវកាលានុវត្តភាពក្រោមគំនិតផ្ដួចផ្ដើមតាមរយៈច្រករបៀងមច្ឆានិងអង្ករ វិនិយោគគិនអាចបណ្ដាក់ទុនវិនិយោគលើ (១)ការបង្កើតរោងចក្រកែច្នៃអាហារដោយផ្ទាល់នៅប្រទេសកម្ពុជា ក្រោមទម្រង់វិនិយោគមានលក្ខណៈគ្រប់គ្រាន់(QIP) ដើម្បីជំរុញការកែច្នៃ និងនាំចេញផ្ទាល់តែម្ដង (២)វិនិយោគលើមជ្ឈមណ្ឌលឃ្លាំងស្ដុកទុក និងសម្ងួត និង(៣)​ការវិនិយោគលេីប្រព័ន្ធភស្តុភារកម្មត្រជាក់​ ដែលជាតម្រូវការបច្ចុប្បន្ន​ និងនាពេលអនាគត៕