អធិការដ្ឋានរដ្ឋបាលជលផលទន្លេមេគង្គ ខណ្ឌរដ្ឋបាលជលផលខេត្តក្រចេះ សហការជាមួយ សមត្ថកិច្ចពាក់ព័ន្ធ ចុះល្បាតត្រួតពិនិត្យ និងបង្ក្រាបបទល្មើសនេសាទតាមដងទន្លេមេគង្គ ក្នុងខេត្តក្រចេះ

ចេញ​ផ្សាយ​ ៣ មីនា ២០២៤ 3108

នៅថ្ងៃទី០១ ខែមីនា ឆ្នាំ២០២៤នេះ សមត្ថកិច្ចជំនាញអធិការដ្ឋានរដ្ឋបាលជលផលទន្លេមេគង្គ និងខណ្ឌរដ្ឋបាលជលផលខេត្តក្រចេះ ដែលមានក្រុមឆ្មាំទន្លេអភិរក្សសត្វផ្សោតតំបន់កាំពី (ក្រុមធំ១) សហការជាមួយសហគមន៍នេសាទសំបុក មានសមាសភាពចំនួន ១២រូប បានប្រើប្រាស់ទូកម៉ាស៊ីនចំនួន ០៤គ្រឿង ចុះល្បាត ត្រួតពិនិត្យ និងបង្ក្រាបបទល្មើសនេសាទតាមដងទន្លេមេគង្គ កន្លែងគ្រប់គ្រង និងការពារសត្វផ្សោត អន្លង់កាំពី និងជ្រោយបន្ទាយ នៅក្នុងខេត្តក្រចេះ។

ប្រតិបត្តិការបង្ក្រាបដោយក្រុមសមត្ថកិច្ចខាងលើ ធ្វើឡើងលើយន្តការ២៤ម៉ោងលើ២៤ម៉ោង ជាលទ្ធផលនៃការចុះបង្រ្កាបនេះ នៅតំបន់ស្នូល ពុំជួបប្រទះបទល្មើសនេសាទឡើយ។ ប៉ុន្តែនៅតំបន់ទ្រនាប់ សមត្ថកិច្ចរឹបអូសបាននូវវត្ថុតាងមួយចំនួនរួមមាន៖ បានដកហូតមងដាក់ក្នុងអន្លង់បាន ០២ត្បូង ប្រវែង ៨០ម ក្រលា ១៥សម នៅចំណុចភូមិវឌ្ឍនៈ ឃុំវឌ្ឍនៈ ស្រុកសំបូរ ហើយវត្ថុតាងដែលបានរឹបអូសនោះត្រូវបានដុតបំផ្លាញចោល៕