លោកជំទាវអនុរដ្ឋលេខាធិការ អ៊ឹម រចនា អញ្ជើញដឹកនាំក្រុមការងារ​ជំនាញ​អភិរក្សជលផល និងខណ្ឌជលផល២ខេត្ត ប្រជុំបង្កើន​ប្រសិទ្ធភាពការងារគ្រប់គ្រង ការពារ អភិរក្សសត្វផ្សោតតំបន់​ទន្លេមេគង្គ សម្រាប់ឆ្នាំថ្មី ឆ្នាំ២០២៦

ចេញ​ផ្សាយ​ ១០ មករា ២០២៦ 3290

នៅថ្ងៃទី៩ ខែមករា ឆ្នាំ២០២៦ លោកជំទាវ អ៊ឹម រចនា អនុរដ្ឋលេខា​ធិការ​ក្រសួងកសិកម្ម រុក្ខាប្រមាញ់ និងនេសាទ បានអញ្ជើញដឹកនាំ​ក្រុមការងារជំនាញអភិរក្សជលផល និងខណ្ឌជលផលខេត្តក្រចេះ និងខេត្តស្ទឹងត្រែង ដើម្បីជួបប្រជុំពិភាក្សាបង្កើនប្រសិទ្ធភាព​ការងារ​គ្រប់គ្រង ការពារ អភិរក្សសត្វផ្សោតនៅតំបន់ទន្លេមេគង្គ សម្រាប់ឆ្នាំ​ថ្មី ឆ្នាំ២០២៦។ កិច្ចប្រជុំធ្វើឡើងនៅមន្ទីរកសិកម្ម រុក្ខាប្រមាញ់ និង​នេសាទ​ខេត្តក្រចេះ។
កិច្ចប្រជុំមានការចូលរួម ពីលោកបណ្ឌិត អ៊ុក វិបុល ប្រធាន​នាយក​ដ្ឋាន​អភិរក្សជលផល នៃរដ្ឋបាលជលផល លោក ផៃ សុម៉ានី អនុ​ប្រធាននាយកដ្ឋានអភិរក្សជលផល លោក អោក ដារុន អនុប្រធាន​មន្ទីរកសិកម្មខេត្តក្រចេះ លោក ភួង ទីណា នាយរងអធិការដ្ឋាន​រដ្ឋបាល​ជលផលមេគង្គ លោក ម៉ុក ពន្លក នាយខណ្ឌរដ្ឋបាល​ជល​ផលក្រចេះ និងតំណាងមកពីខណ្ឌ​រដ្ឋបាលជលផលស្ទឹងត្រែង និង​លោក អៀម សំអ៊ន់ ប្រធានកម្មវិធីតំណាងអង្គការ WWF កម្ពុជា និងមន្រ្តីឆ្មាំទន្លេ សរុបអ្នកចូលរួមប្រមាណ២០នាក់។
លោកជំទាវ អ៊ឹម រចនា បានគូសបញ្ជាក់ថា ភារកិច្ចអភិរក្សសត្វ​ផ្សោត​ទន្លេមេគង្គ ដែលមន្រ្តីជំនាញពាក់ព័ន្ធ ឆ្មាំ និងអង្គការWWF​កម្ពុជា បានសហការគ្នាធ្វើកន្លងមកបានល្អប្រកបដោយប្រសិទ្ធភាព ក្នុងឆន្ទៈរួមតែមួយ អភិរក្សធនធានជលផលពិសេសសត្វផ្សោត ដែល​លោកជំទាវចាត់ទុកជា «ដង្ហើមនៃទន្លេមេគង្គ» គឺជារតន​សម្បត្តិ​របស់ជាតិមិនអាចកាត់ថ្លៃបាន។ ដូច្នេះត្រូវមានការលើក​ទឹក​ចិត្តចំពោះកិច្ចការងារនេះ ដែលនឹងរៀបចំមានជាបណ្ណសរសើរ​ចំពោះ​អ្នកមានស្នាដៃបំពេញការងារ។
ជាមួយគ្នានេះ លោកជំទាវ និងក្រុមការងារក៏បានជជែកពិភាក្សា ពីការរៀបចំប្លង់មជ្ឈមណ្ឌលនៃបន្ទប់ផ្តល់ព័ត៌មាន នៃការ​ពិនិត្យ​វីដេអូ​ផ្សាយផ្ទាល់ ប្រព័ន្ធត្រួតពិនិត្យពីចម្ងាយនិងដ្រូន ដែលនឹងត្រូវ​ធ្វើ​ក្នុងឆ្នាំ២០២៦នេះ ក្រោមកិច្ចសហការគាំទ្រថវិកាពីអង្គការ WWF ប្រចាំនៅកម្ពុជា និងគាំទ្របច្ចេកទេសពីវិទ្យាស្ថានវារីសាស្ត្រ (IHB) នៃបណ្ឌិត្យសភាវិទ្យាសាស្ត្រចិន។ ការប្រើប្រាស់ប្រព័ន្ធត្រួត​ពិនិត្យ​ពីចម្ងាយនេះ ធ្វើឡើងក្នុងគោលដៅឃ្លាំមើលសកម្មភាព ប្រចាំថ្ងៃ​របស់សត្វផ្សោត និងជាពិសេសបទល្មើសនេសាទ​នៅក្នុងតំបន់​អភិរក្សសត្វផ្សោត តាមរយៈការបំពាក់ម៉ាស៊ីនថតស្វ័យប្រវត្តិ និង​ការបង្ហោះដ្រូន។
ជាចុងបញ្ចប់ លោកជំទាវ អ៊ឹម រចនា សូមសម្តែងការកោតសរសើរ និងថ្លែងអំណរគុណដល់អ្នកពាក់ព័ន្ធទាំងអស់ ក្នុងការជួយគាំទ្រ ហើយក៏ជាយន្តការបន្ថែមរបស់ក្រសួង ក្នុងគោលដៅការពារ អភិរក្ស ធនធានជលផលសម្រាប់កូនចៅជំនាន់ក្រោយ។ ទន្ទឹមគ្នានេះ ការងារ​ដោយ​ប្រើបច្ចេកវិទ្យាក្នុងឆ្នាំថ្មី ក៏ជាឱកាសសម្រាប់មន្ដ្រីឆ្មាំ រៀនសូត្រ​ចំណេះជំនាញថ្មីៗបន្ថែម ទៀតដើម្បីអាចអនុវត្តការងារ​នេះ​បាន​ប្រកបដោយប្រសិទ្ធភាពនិងប្រសិទ្ធផលខ្ពស់៕