ព័ត៌មានផ្សេងៗទៀត
ឯកឧត្តមរដ្ឋលេខាធិការ ហាស់ សារ៉េត អញ្ជើញជាអធិបតីភាព ក្នុងសិក្ខាសាលាបច្ចេកទេសបិទបញ្ចប់គម្រោង CAPFISH-Capture (លទ្ធផលទី២) ស្តីពី «ការជំរុញសមត្ថភាពប្រកួតប្រជែង ដើម្បីកំណើនអាជីវកម្មក្នុងវិស័យជលផលកាន់តែប្រសើរឡើងនៅកម្ពុជា»
ចេញផ្សាយ ៨ តុលា ២០២៥ 754
នៅថ្ងៃទី៨ ខែតុលា ឆ្នាំ២០២៥ ឯកឧត្តម ហាស់ សារ៉េត រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានអញ្ជើញជាអធិបតីភាព ក្នុងសិក្ខាសាលាបច្ចេកទេសបិទបញ្ចប់គម្រោង CAPFISH-Capture (លទ្ធផលទី២)ស្តីពី «ការជំរុញសមត្ថភាពប្រកួតប្រជែង ដើម្បីកំណើនអាជីវកម្មក្នុងវិស័យជលផលកាន់តែប្រសើរឡើងនៅកម្ពុជា» និងមានការចូលរួមពី ឯកឧត្តមអនុរដ្ឋលេខាធិការ ទឹម បូរក្ស លោក Koen Everaert អនុប្រធានកិច្ចសហប្រតិបត្តិការសហភាពអឺរ៉ុបប្រចាំកម្ពុជា លោក ណូ លីដា អគ្គនាយកនៃសាជីវកម្មធានាឥណទានកម្ពុជា លោកបណ្ឌិត ឈួន ចំណាន ប្រធាននាយកដ្ឋានបច្ចេកវិទ្យាកែច្នៃនិងគុណភាពនៃរដ្ឋបាលជលផល បណ្ឌិត សេតធី ស៊ីថារ៉ាម៉ា ថមបាធូ ប្រធានទីប្រឹក្សាបច្ចេកទេស គម្រោង CAPFish-Capture, UNIDO និងលោក មៀវ សុខទ្រី ប្រធានសមាគមអ្នកផលិតចំណីអាហារកម្ពុជា និងស្ថាប័នដៃគូអភិវឌ្ឍន៍ផ្សេងៗ សរុបចំនួន១១២នាក់ ដែលកម្មវិធីប្រព្រឹត្តទៅនៅសណ្ឋាគារកាំបូឌីយ៉ាណា រាជធានីភ្នំពេញ។
នាឱកាសនោះ ឯកឧត្តមរដ្ឋលេខាធិការ ហាស់ សារ៉េត បានសម្តែងនូវការកោតសរសើរ និងវាយតម្លៃខ្ពស់ចំពោះកិច្ចសហការល្អប្រសើររវាងរដ្ឋបាលជលផលនិងអង្គការ UNIDO និងដៃគូអភិវឌ្ឍន៍នានា ជាពិសេសវិស័យឯកជន ដែលរួមគ្នាសម្រេចបាននូវលទ្ធផល និងសមិទ្ធផលគួរឱ្យមោទនភាពក្នុងការចូលរួមគាំទ្រ និងអភិវឌ្ឍន៍សហគ្រាសកែច្នៃជលផល និងអ្នកពាក់ព័ន្ធក្នុងខ្សែច្រវាក់តម្លៃជលផលក្រោយប្រមូលផល។
ឯកឧត្តមរដ្ឋលេខាធិការ បញ្ជាក់បន្ថែមថា គម្រោង CAPFISH-Capture នេះ បានជួយកែលម្អប្រតិបត្តិការអាជីវកម្មដោយធ្វើទំនើបកម្មលើសម្ភារបរិក្ខារនិងទីកន្លែងកែច្នៃរបស់សហគ្រាសជលផលក្រោយប្រមូលផលចំនួន ៦៤សហគ្រាស និងតួអង្គពាក់ព័ន្ធក្នុងខ្សែច្រវាក់តម្លៃជលផលប្រមាណជាង ៥០០ដៃគូអាជីវកម្មតាមរយៈការអនុវត្តន៍កម្មវិធីគាំទ្រវិនិយោគខ្សែច្រវាក់តម្លៃ (VCIS)ដែលបានចំណាយអស់ថវិកាជាង ២លាន ដុល្លារអាមេរិក ព្រមទាំងទុនបដិភាគពីសហគ្រាស និងគ្រឹះស្ថានហិរញ្ញវត្ថុប្រមាណ ៤លានដុល្លារអាមេរិក បន្ថែមទៀត។
ជាចុងក្រោយ ក្នុងនាមក្រសួងកសិកម្ម រុក្ខាប្រមាញ់ និងនេសាទ ឯកឧត្តមរដ្ឋលេខាធិការ បានផ្តល់អនុសាសន៍ណែនាំ ដល់ភាគីពាក់ព័ន្ធនានាក្នុងខ្សែច្រវាក់តម្លៃទាំងមូលចូលរួមសហការគ្នាឱ្យបានល្អ ជាពិសេសវិស័យឯកជនជាមួយអាជ្ញាធរមានសមត្ថកិច្ចពាក់ព័ន្ធ ដើម្បីចូលរួមសម្រេចឱ្យបាននូវគោលនយោបាយអភិវឌ្ឍន៍វិស័យកសិកម្ម ២០២២-២០៣០ ក្នុងទិសដៅលើកកម្ពស់ផលិតកម្មក្នុងស្រុក និងជំរុញការនាំចេញឱ្យកាន់តែមានភាពប្រសើរឡើង៕
