ព័ត៌មានផ្សេងៗទៀត
ឯកឧត្តមរដ្ឋលេខាធិការ តូច ប៊ុនហួរ បានដឹកនាំកិច្ចប្រជុំវាយតម្លៃ និងបញ្ចេញពូជពោតអ៊ីប្រ៊ីដ ចំនួន២ ប្រភេទ នៅទីស្តីការក្រសួងកសិកម្ម រុក្ខាប្រមាញ់ និងនេសាទ
ចេញផ្សាយ ៨ មេសា ២០២៦ 4129
នៅថ្ងៃទី០៨ ខែមេសា ឆ្នាំ២០២៦ ឯកឧត្តម តូច ប៊ុនហួរ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានដឹកនាំកិច្ចប្រជុំ គណៈកម្មាធិការបញ្ចេញពូជដំណាំ ដើម្បីពិនិត្យ និងវាយតម្លៃលើការបញ្ចេញពូជពោតអ៊ីប្រ៊ីដថ្មីចំនួន ០២ ប្រភេទ រួមមានលេខកូដ BH-3577 និង BH-4187 ដែលជាសមិទ្ធផលនៃការស្រាវជ្រាវ និងអភិវឌ្ឍន៍ដោយក្រុមអ្នកបច្ចេកទេសនៃអគ្គនាយកដ្ឋានកសិកម្ម។ ក្នុងកិច្ចប្រជុំនេះ មានដោយមានការផ្តល់កិត្តិយសអញ្ជើញចូលរួមពីឯកឧត្តមថ្នាក់ដឹកនាំក្រសួង និងសមាជិកគណៈកម្មាធិការ និងអ្នកជំនាញពាក់ព័ន្ធ។
ឯកឧត្តមរដ្ឋលេខាធិការ បានគូសបញ្ជាក់ថា ពូជពោតអ៊ីប្រ៊ីដទាំងពីរនេះ បានឆ្លងកាត់ការពិសោធន៍យ៉ាងហ្មត់ចត់ ចាប់តាំងពីឆ្នាំ២០២០ ដល់ឆ្នាំ២០២៦ (រយៈពេល ០៦ឆ្នាំ) នៅលើទីតាំងចម្ការកសិករក្នុងខេត្តគោលដៅចំនួន ០៥ រួមមាន៖ ខេត្តកំពត បាត់ដំបង កំពង់ចាម ត្បូងឃ្មុំ និងខេត្តកណ្តាល។ ពូជនេះ មានលក្ខណៈសម្បត្តិលេចធ្លោ ដូចជា ពូជ BH-3577: ជាប្រភេទពូជដែលមានដើមរឹងមាំ ធន់នឹងការដួលរលំនិងផ្តល់ទិន្នផលខ្ពស់ជាមធ្យម ៨,៨ តោន/ហិកតា និងពូជ BH-4187: ជាប្រភេទពូជដែលមានអាយុកាលប្រមូលផលខ្លី (Short Duration) ដែលងាយស្រួលដល់កសិករក្នុងការរៀបចំផែនការដាំដុះបង្វិលមុខដំណាំ ប៉ុន្តែនៅតែរក្សាបាននូវទិន្នផលខ្ពស់រហូតដល់ ៨,៥ តោន/ហិកតា។
មិនត្រឹមតែប៉ុណ្ណោះ ពូជទាំងពីរមានសមត្ថភាពខ្ពស់ក្នុងការទប់ទល់នឹងជំងឺផ្សិត (Fungal Diseases) ស៊ាំទៅនឹងការប្រែប្រួលអាកាសធាតុ (Climate Resilience) និងមានតម្រូវការទីផ្សារខ្ពស់ ដែលជាកត្តាគន្លឹះក្នុងការជួយបង្កើនឧត្តមភាពប្រកួតប្រជែងជូនដល់កសិករ។ ជាក់ស្តែង កាលពីថ្ងៃទី២៥ ខែមីនា ឆ្នាំ២០២៦ កន្លងទៅគណៈកម្មាធិការបញ្ចេញពូជដំណាំ ក៏បានចុះទៅពិនិត្យវាយតម្លៃផ្ទាល់ដល់ចម្ការបង្ហាញរបស់កសិករ ស្ថិតនៅភូមិជីរោក្រោម១ ឃុំជីរោ១ ស្រុកត្បូងឃ្មុំ ខេត្តត្បូងឃ្មុំ ដើម្បីពិនិត្យមើលស្ថានភាពលូតលាស់ និងទិន្នផលជាក់ស្តែងមុននឹងសម្រេចបញ្ចេញពូជ។
ចុងបញ្ចប់ ឯកឧត្តមបានឱ្យដឹងទៀតថា ផ្អែកលើលទ្ធផលបច្ចេកទេស និងការចុះពិនិត្យជាក់ស្តែង អង្គប្រជុំបានវាយតម្លៃខ្ពស់ និងសម្រេច យល់ព្រមបញ្ចេញពូជពោតអ៊ីប្រ៊ីដ BH-3577 និង BH-4187 ដើម្បីដាក់ឱ្យប្រើប្រាស់ជាផ្លូវការ និងចែកចាយជូនបងប្អូនកសិករដាំដុះក្នុងពេលឆាប់ៗខាងមុខនេះ៕
