ឯកឧត្តមរដ្ឋមន្ត្រី វេង សាខុន បានដឹកនាំគណៈប្រតិភូក្រសួងកសិកម្ម រុក្ខាប្រមាញ់ និងនេសាទអញ្ជើញទៅបំពេញទស្សនកិច្ចផ្លូវការទៅខេត្តជាំងស៊ូ នៃសាធារណរដ្ឋប្រជាមានិតចិន

ចេញ​ផ្សាយ​ ២៦ វិច្ឆិកា ២០១៨ 2402

ដោយទទួលបានការអនុញ្ញាតដ៏ខ្ពង់ខ្ពសពីប្រមុខរាជរដ្ឋាភិបាលនៃព្រះរាជាណាចក្រកម្ពុជា នៅរសៀលថ្ងៃពុធ ១៤កើត ខែកត្តិក ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី២១ ខែវិច្ឆិកា ឆ្នាំ២០១៨ ដែលជាថ្ងៃទី១នៃព្រះរាជពិធីបុណ្យអុំទូក បណ្ដែតប្រទីប សំពះព្រះខែ និអកអំបុក ឯកឧត្តមរដ្ឋមន្ត្រី វេង សាខុន បានដឹកនាំគណៈប្រតិភូក្រសួងកសិកម្ម រុក្ខាប្រមាញ់ និងនេសាទអញ្ជើញទៅបំពេញទស្សនកិច្ចផ្លូវការទៅខេត្តជាំងស៊ូ នៃសាធារណរដ្ឋប្រជាមានិតចិន។ ដំណើរទស្សនកិច្ចនេះមានបំណងពង្រឹងនិងពង្រីកកិច្ចសហប្រតិបត្តិការរវាងប្រទេសទាំងពីរ និងធ្វើការទាក់ទាញវិនិយោគិនឲ្យមកវិនិយោគលើវិស័យកសិកម្ម ជាពិសេសផលិតកម្មដំណាំស្រូវនិងការកែច្នៃកសិផល។

ក្នុងឱកាសនៃដំណើរទស្សនកិច្ចនេះ ឯកឧត្ដមរដ្ឋមន្ត្រីនឹងអញ្ជើញធ្វើជាអធិបតីក្នុងពិធីចុះហត្ថលេខាលើអនុស្សរណៈយោគយល់គ្នារវាងក្រសួងកសិកម្ម រុក្ខាប្រមាញ់ និងនេសាទ និងក្រុមហ៊ុន Jiangsu Lianfa Group Co., Ltd ដើម្បីរួមគ្នាអភិវឌ្ឍវិស័យផលិតកម្មស្រូវពូជហាយប្រីឌ ដែលពូជនេះមានសក្តានុពលខ្ពស់ក្នុងការផ្តល់ទិន្នផល គុណភាពល្អ ធុននិងជំងឺ ការប្រែប្រួលអាកាសធាតុ សមស្របតាមតម្រូវការទីផ្សារនាំចេញ។ ក្រៅពីផលិតកម្មស្រូវ ក្រុមហ៊ុនក៏មានគម្រោងវិនិយោគដាំកប្បាស ដើម្បីយកវត្ថុធាតុដើមនេះទៅកែច្នៃជាក្រណាត់ កាត់បន្ថយការនាំចូល ដែលបច្ចុប្បន្នក្រុមហ៊ុនមានរោងចក្រកំពុងដំណើរការកាត់ដេរសំលៀកបំពាក់នៅខេត្តពោធិ៍សាត់រួចជាស្រេច។

ក្នុងឱកាសនេះដែរ ឯកឧត្តមរដ្ឋមន្ត្រីនិងគណៈប្រតិភូនឹងទៅពិនិត្យការអនុវត្តកសិកម្មទំនើប ជាប្រព័ន្ធមានលក្ខណៈឧស្សាហកម្មដែលក្នុងនោះរួមមានការពិសោធន៍ ការផលិតពូជ រោងម៉ាស៊ីនកិននិងកែច្នៃ ឃ្លាំងស្តុក និងការធ្វើអាជីវកម្មស្រូវ រួមជាមួយការធ្វើវារីវប្បកម្ម និងចិញ្ចឹមសត្វដើម្បីបំពេញនូវខ្សែចង្វាក់ផលិតកម្មកសិកម្ម ដែលរំពឹងថានឹងផ្ដល់អត្ថប្រយោជន៍ជាច្រើនដល់គណៈប្រតិភូជាពិសេសក្នុងការជម្រុញ និងអនុវត្តផែនការយុទ្ធសាស្រ្តអភិវឌ្ឍន៍វិស័យកសិកម្ម ២០១៩-២០២៣ របស់ក្រសួងកសិកម្ម រុក្ខាប្រមាញ់ និងនេសាទ ឲ្យមានប្រសិទ្ធភាពខ្ពស់តាមការរំពឹងទុក។

ក្នុងឱកាសព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក ឯកឧត្តមរដ្ឋមន្ត្រីសូមជូនពរដល់ឯកឧត្តម លោកជំទាវ លោក លោកស្រីនិងបងប្អូនប្រជាពលរដ្ឋខ្មែរទាំងអស់ជួបប្រទះតែនឹងពុទ្ធពរទាំងបួនប្រការកុំបីឃ្លៀងឃ្លាតឡើយ។