ព័ត៌មានផ្សេងៗទៀត
លោកជំទាវអនុរដ្ឋលេខាធិការ យ៉ើ អាស៊ីគីន អញ្ជើញចូលរួមជាវាគ្មិននៅក្នុងកម្មវិធីកិច្ចសន្ទនា AVI-SGDs ស្តីពី «យេនឌ័រ-គោលនយោបាយឆ្លើយតបក្នុងវិស័យព្រៃឈើ-ការចូលរួមរបស់ស្រ្តីក្នុងការកាត់បន្ថយការប្រែប្រួលអាកាសធាតុ»
ចេញផ្សាយ ១៩ កញ្ញា ២០២៥ 991
នៅថ្ងៃទី១៨ ខែកញ្ញា ឆ្នាំ២០២៥ លោកជំទាវ យ៉ើ អាស៊ីគីន អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ អញ្ជើញចូលរួមជាវាគ្មិននៅក្នុងកម្មវិធីកិច្ចសន្ទនា AVI-SGDs ស្តីពី «យេនឌ័រ-គោលនយោបាយឆ្លើយតបក្នុងវិស័យព្រៃឈើ-ការចូលរួមរបស់ស្រ្តីក្នុងការកាត់បន្ថយការប្រែប្រួលអាកាសធាតុ»។
កម្មវិធីដែលធ្វើឡើងនៅសណ្ឋាគារជ័យ៉ាស្វីត រាធានីភ្នំពេញ មានការចូលរួមពី លោកបណ្ឌិត ងួត ផាន់ភក្តី នាយករងនៃវិទ្យាស្ថានចក្ខុវិស័យអាស៊ី (AVI) Ms.Meloney C.lindberg តំណាងប្រទេសកម្ពុជានៃកម្មវិធីពន្លកចំណេះរបស់អង្គការមូលនិធិអាស៊ី (The Asia Foundation) Ms.Evangeline Larsen លេខាធិកាទី២ នៃស្ថានទូតអូស្ត្រាលី និងកញ្ញា ឆន រដ្ឋា អគ្គនាយករងនៃក្រសួងកិច្ចការនារី តំណាង UNDP និងស្ថាប័នពាក់ព័ន្ឋផ្សេងទៀត។
គោលបំណងនៃកម្មវិធីកិច្ចសន្ទនា AVI-SGDs ដើម្បីផ្តល់វេទិកាសម្រាប់ការពិភាក្សាពហុភាគី កិច្ចសន្ទនានឹងធ្វើបច្ចុប្បន្នភាព ជូនដំណឹង និងលើកកម្ពស់ការយល់ដឹងអំពីវឌ្ឍនភាពដែលកំពុងបន្តនៃការអនុវត្តន៍ SDG នៅកម្ពុជាដល់អ្នកចូលរួមទាំងអស់ ដោយមិនកំណត់ចំពោះតែស្ថាប័នរដ្ឋាភិបាល រួមទាំងអ្នកជំនាញ បញ្ញាវ័ន្ត អ្នកសិក្សាវ័យក្មេង និងសាធារណៈជនទូទៅ។
នាឱកាសនោះ លោកជំទាវអនុរដ្ឋលេខាធិការ បានផ្តល់បទបង្ហាញអំពីទិដ្ឋភាពទូទៅនៃកំណើនកសិកម្ម ការគ្រប់គ្រង និងការអភិវឌ្ឍន៍ធនធានព្រៃឈើ និងសត្វព្រៃ គោលនយោបាយបញ្ជ្រាបយេនឌ័រ និងក្របខណ្ឌយុទ្ធសាស្រ្តក្នុងវិស័យ កសិកម្ម (២០២២-២០២៦) ផែនការយុទ្ធសាស្ត្របញ្ជ្រាបយេនឌ័រសម្រាប់វិស័យព្រៃឈើ ការគ្រប់គ្រងព្រៃឈើប្រកបដោយនិរន្តរភាព និងការអភិរក្សជីវចម្រុះ ឱកាសយេនឌ័រក្នុងការកាត់បន្ថយអាកាសធាតុ សកម្មភាពរបស់ក្រសួងកសិកម្ម រុក្ខាប្រមាញ់ និងនេសាទ ក្នុងការគ្រប់គ្រងធនធានជាតិ។
នៅចុងបញ្ចប់ លោកជំទាវបានអំពាវនាវដល់ស្ថាប័ន ដៃគូអភិវឌ្ឍន៍ និងស្ថាប័ននានា គួរបន្តគាំទ្រនិងចូលរួមផ្សព្វផ្សាយនិងការបញ្ជ្រាបយេនឌ័រ បង្កើនចំណេះដឹងដល់អ្នកពាក់ព័ន្ធជាពិសេសកសិករ ជនជាតិដើមភាគតិច និងសហគមន៍ទាំងចំណេះដឹងទូទៅ ជំនាញរឹង-ទន់ បច្ចេកទេសកសិកម្ម ដែលចូលរួមបង្កើនប្រាក់ចំណូលនិងកាត់បន្ថយការប្រែប្រួលអាកាសធាតុ និងការសិក្សាស្រាវជ្រាវអំពីការវិភាគពីប្រសិទ្ធភាពនៃការចូលរួមរបស់ស្រ្តីជាថ្នាក់ដឹកនាំក្នុងសហគមន៍ព្រៃឈើ ឬវិស័យនានា៕
